ಇರಾನ್ ಯುದ್ಧದಲ್ಲಿ ಅಮೆರಿಕದ ‘ಬತ್ತಳಿಕೆ’ ಖಾಲಿ?: ಸಾವಿರಾರು ಕೋಟಿ ಮೌಲ್ಯದ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಸ್ವಾಹಾ!

ವಾಷಿಂಗ್ಟನ್: ಫೆಬ್ರವರಿ 28 ರಿಂದ ಆರಂಭವಾಗಿರುವ ಇರಾನ್ ವಿರುದ್ಧದ ಯುದ್ಧದಲ್ಲಿ ಅಮೆರಿಕವು ತನ್ನ ಅತ್ಯಂತ ಅಮೂಲ್ಯ ಮತ್ತು ದುಬಾರಿ ಶಸ್ತ್ರಾಸ್ತ್ರಗಳ ಸಂಗ್ರಹವನ್ನು ಅತಿ ವೇಗವಾಗಿ ಕಳೆದುಕೊಳ್ಳುತ್ತಿದೆ ಎಂದು ಸಂಶೋಧನಾ ವರದಿಯೊಂದು ತಿಳಿಸಿದೆ. ಕೇವಲ ಎರಡು ತಿಂಗಳ ಅವಧಿಯಲ್ಲಿ ಅಮೆರಿಕವು ಸುಮಾರು 25 ರಿಂದ 35 ಶತಕೋಟಿ ಡಾಲರ್ (ಅಂದಾಜು ₹2.1 ರಿಂದ ₹2.9 ಲಕ್ಷ ಕೋಟಿ) ಮೌಲ್ಯದ ಯುದ್ಧೋಪಕರಣಗಳನ್ನು ಬಳಸಿದೆ ಎಂದು ‘ನ್ಯೂಯಾರ್ಕ್ ಟೈಮ್ಸ್’ ತನಿಖಾ ವರದಿ ಮತ್ತು ‘CSIS’ ವರದಿಗಳು ಬಹಿರಂಗಪಡಿಸಿವೆ.

ಅಮೆರಿಕವು ಈಗಾಗಲೇ 1,200ಕ್ಕೂ ಹೆಚ್ಚು ಪೇಟ್ರಿಯಾಟ್ (Patriot) ಪ್ರತಿಬಂಧಕ ಕ್ಷಿಪಣಿಗಳನ್ನು ಬಳಸಿದೆ. ಇವುಗಳಲ್ಲಿ ಒಂದೊಂದರ ಬೆಲೆ ಸುಮಾರು $4 ಮಿಲಿಯನ್ (₹33 ಕೋಟಿಗೂ ಅಧಿಕ).ಚೀನಾ ವಿರುದ್ಧದ ಸಂಭವನೀಯ ಯುದ್ಧಕ್ಕಾಗಿ ಕಾಯ್ದಿರಿಸಿದ್ದ 1,100ಕ್ಕೂ ಹೆಚ್ಚು ಸುದೀರ್ಘ ವ್ಯಾಪ್ತಿಯ ‘ಸ್ಟೆಲ್ತ್ ಕ್ರೂಸ್ ಕ್ಷಿಪಣಿ’ಗಳನ್ನು ಇರಾನ್ ಮೇಲೆ ಪ್ರಯೋಗಿಸಲಾಗಿದೆ. ಇದು ಅಮೆರಿಕದ ಒಟ್ಟು ದಾಸ್ತಾನಿನ ಅರ್ಧಕ್ಕಿಂತಲೂ ಹೆಚ್ಚಾಗಿದೆ.

ವಾರ್ಷಿಕವಾಗಿ ಖರೀದಿಸುವ ಪ್ರಮಾಣಕ್ಕಿಂತ 10 ಪಟ್ಟು ಹೆಚ್ಚು, ಅಂದರೆ 1,000ಕ್ಕೂ ಹೆಚ್ಚು ಟೊಮಾಹಾಕ್ (Tomahawk) ಕ್ಷಿಪಣಿಗಳನ್ನು ಉಡಾಯಿಸಲಾಗಿದೆ.ಯುದ್ಧದ ಮೊದಲ ಎರಡು ದಿನಗಳಲ್ಲೇ ಅಮೆರಿಕವು ಸುಮಾರು $5.6 ಶತಕೋಟಿ ಮೌಲ್ಯದ ಮದ್ದುಗುಂಡುಗಳನ್ನು ಬಳಸಿದ್ದು, ಸರಾಸರಿ ದಿನಕ್ಕೆ ಸುಮಾರು $1 ಶತಕೋಟಿ (₹8,300 ಕೋಟಿ) ಹಣ ಈ ಯುದ್ಧದಲ್ಲಿ ಖರ್ಚಾಗುತ್ತಿದೆ.

 ಇರಾನ್ ಯುದ್ಧದಲ್ಲಿ ಶಸ್ತ್ರಾಸ್ತ್ರಗಳು ವೇಗವಾಗಿ ಖಾಲಿಯಾಗುತ್ತಿರುವುದು ರಷ್ಯಾ ಅಥವಾ ಚೀನಾದಂತಹ ಬಲಿಷ್ಠ ರಾಷ್ಟ್ರಗಳ ವಿರುದ್ಧ ಭವಿಷ್ಯದಲ್ಲಿ ಹೋರಾಡಲು ಅಮೆರಿಕಕ್ಕೆ ಅಡ್ಡಿಯಾಗಬಹುದು ಎಂದು ರಕ್ಷಣಾ ತಜ್ಞರು ಎಚ್ಚರಿಸಿದ್ದಾರೆ.