ಜೈಪುರ: ರಾಜಸ್ಥಾನದ ಡಿಗ್ ಜಿಲ್ಲೆಯ ಮದುವೆಯೊಂದರಲ್ಲಿ ವರನಿಗೆ ಬರೋಬ್ಬರಿ 100 ಅಡಿ ಉದ್ದದ ನೋಟಿನ ಹಾರ ಹಾಕಿ ಸ್ವಾಗತಿಸಿರುವ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಮೂಡಿಸಿದೆ. ಹಾರ ಎಷ್ಟು ಉದ್ದವಿತ್ತೆಂದರೆ, ಅದನ್ನು ಧರಿಸಲು ವರನು ಏಣಿಯನ್ನು ಹತ್ತಬೇಕಾದ ಪರಿಸ್ಥಿತಿ ಬಂದೊದಗಿತ್ತು.
ಸುಮಾರು 100 ಅಡಿ ಉದ್ದದ ಈ ದೈತ್ಯ ಹಾರವನ್ನು ₹500 ಮುಖಬೆಲೆಯ ನೋಟುಗಳಿಂದ ತಯಾರಿಸಲಾಗಿತ್ತು. ಇದನ್ನು ಹಿಡಿದುಕೊಳ್ಳಲು ಸುಮಾರು 10-15 ಜನರು ಹರಸಾಹಸ ಪಡುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ.
ಹಾರವನ್ನು ವರನ ಕೊರಳಿಗೆ ಹಾಕಲು ಸಾಧ್ಯವಾಗದ ಕಾರಣ, ವರನು ಏಣಿಯನ್ನು ಹತ್ತಿ ಎತ್ತರಕ್ಕೆ ಹೋದ ನಂತರ ಹಾರವನ್ನು ಅವನಿಗೆ ತೊಡಿಸಲಾಯಿತು. ಈ ಅಪರೂಪದ ದೃಶ್ಯವನ್ನು ನೋಡಲು ಮದುವೆಯಲ್ಲಿ ನೆರೆದಿದ್ದವರು ಮುಗಿಬಿದ್ದಿದ್ದರು.
ರಾಜಸ್ಥಾನದ ಮೆವಾತ್ ಪ್ರಾಂತ್ಯದಲ್ಲಿ ಇಂತಹ ಅದ್ದೂರಿ ಹಾರಗಳನ್ನು ಧರಿಸುವುದು ಒಂದು ಸಂಪ್ರದಾಯ ಮತ್ತು ಪ್ರತಿಷ್ಠೆಯ ಸಂಕೇತ ಎಂದು ಸ್ಥಳೀಯರು ಹೇಳುತ್ತಾರೆ.
ಕುತೂಹಲಕಾರಿ ವಿಷಯವೆಂದರೆ, ಈ ಹಾರವನ್ನು ವರನ ಕುಟುಂಬದವರು ಬಾಡಿಗೆಗೆ ತಂದಿದ್ದರು. ಡಿಗ್ ಜಿಲ್ಲೆಯ ಪೊಲೀಸ್ ವರಿಷ್ಠಾಧಿಕಾರಿ ಶರಣ್ ಗೋಪಿನಾಥ್ ಕಾಂಬ್ಳೆ ಅವರು ಈ ಬಗ್ಗೆ ಪ್ರತಿಕ್ರಿಯಿಸಿ, “ಈ ಹಾರವನ್ನು ಹರಿಯಾಣದ ನುಹ್ನಿಂದ ಬಾಡಿಗೆಗೆ ಪಡೆಯಲಾಗಿತ್ತು. ಇದರಲ್ಲಿ ಯಾವುದೇ ಕಾನೂನುಬಾಹಿರ ಅಂಶ ಕಂಡುಬಂದಿಲ್ಲ,” ಎಂದು ತಿಳಿಸಿದ್ದಾರೆ. ಈ ರೀತಿಯ ಹಾರಗಳನ್ನು ಪ್ರದರ್ಶನಕ್ಕಾಗಿ ಬಾಡಿಗೆ ನೀಡುವ ವ್ಯವಸ್ಥೆ ಅಲ್ಲಿನ ಭಾಗಗಳಲ್ಲಿ ಚಾಲ್ತಿಯಲ್ಲಿದೆ.
100-Foot Cash Garland for Groom Goes Viral
In Rajasthan’s Deeg district, a groom was welcomed with a massive 100-foot garland made of ₹500 notes. The unique Mewat tradition showcasing status has now gone viral on social media.#Rajasthan #WeddingViral #MoneyGarland pic.twitter.com/W7nqV9yz8D
— Telangana Ahead (@telanganaahead) April 24, 2026
