ನವದೆಹಲಿ: ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯು (NTA) ಜೂನ್ 21, 2026 ರಂದು ನಡೆಯಲಿರುವ ನೀಟ್ (NEET UG) ಪರೀಕ್ಷೆಯಲ್ಲಿ ವಿದ್ಯಾರ್ಥಿಗಳ ಹಿತದೃಷ್ಟಿಯಿಂದ ಕೆಲವು ಪ್ರಮುಖ ಹಾಗೂ ಅಭ್ಯರ್ಥಿ ಸ್ನೇಹಿ ಬದಲಾವಣೆಗಳನ್ನು ಪರಿಚಯಿಸಿದೆ. ಪರೀಕ್ಷೆಯನ್ನು ಅತ್ಯಂತ ನ್ಯಾಯಸಮ್ಮತ, ಸುರಕ್ಷಿತ ಮತ್ತು ಸುಲಭವಾಗಿ ನಡೆಸಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಎನ್ಟಿಎ ಪ್ರಕಟಣೆಯಲ್ಲಿ ತಿಳಿಸಿದೆ.
ಈ ಬಾರಿ ಜಾರಿಗೆ ತರಲಾಗಿರುವ ಪ್ರಮುಖ ಬದಲಾವಣೆಗಳು ಈ ಕೆಳಗಿನಂತಿವೆ:
1. ಹೆಚ್ಚುವರಿ ಪರೀಕ್ಷಾ ಸಮಯ (195 ನಿಮಿಷಗಳು)
ಕಳೆದ ಕೆಲವು ವರ್ಷಗಳಿಂದ ಅಭ್ಯರ್ಥಿಗಳಿಂದ ಬಂದ ಪ್ರತಿಕ್ರಿಯೆಗಳನ್ನು ಆಧರಿಸಿ, ಪರೀಕ್ಷಾ ಅವಧಿಯನ್ನು 195 ನಿಮಿಷಗಳಿಗೆ (3 ಗಂಟೆ 15 ನಿಮಿಷ) ವಿಸ್ತರಿಸಲಾಗಿದೆ. ಪರೀಕ್ಷೆಯು ಮಧ್ಯಾಹ್ನ 2:00 ಗಂಟೆಯಿಂದ ಸಂಜೆ 5:15 ರವರೆಗೆ ನಡೆಯಲಿದೆ. ಹಾಜರಾತಿ ಶೀಟ್ಗೆ ಸಹಿ ಮಾಡುವುದು ಮತ್ತು ಇತರ ಪರಿಶೀಲನಾ ಪ್ರಕ್ರಿಯೆಗಳಂತಹ ಕಡ್ಡಾಯ ಆಡಳಿತಾತ್ಮಕ ಕೆಲಸಗಳಿಂದಾಗಿ ಅಭ್ಯರ್ಥಿಗಳಿಗೆ ಪರೀಕ್ಷೆ ಬರೆಯಲು ಸಮಯದ ಕೊರತೆಯಾಗಬಾರದು ಎಂಬ ಉದ್ದೇಶದಿಂದ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.
2. ರಫ್ ವರ್ಕ್ ಹೆಚ್ಚಿನ ಪುಟಗಳ ಲಭ್ಯತೆ
ಲೆಕ್ಕಾಚಾರಗಳು ಮತ್ತು ರೇಖಾಚಿತ್ರಗಳನ್ನು ಬಿಡಿಸಲು ಅಭ್ಯರ್ಥಿಗಳಿಗೆ ಅನುಕೂಲವಾಗುವಂತೆ ಈ ಬಾರಿ ಪ್ರಶ್ನೆ ಪತ್ರಿಕೆ ಬುಕ್ಲೆಟ್ನಲ್ಲಿ ರಫ್ ವರ್ಕ್ (Rough work) ಮಾಡುವುದಕ್ಕಾಗಿ ಲಭ್ಯವಿರುವ ಸ್ಥಳವನ್ನು ಹೆಚ್ಚಿಸಲಾಗಿದೆ. ಈ ಮೊದಲು ಕೇವಲ ಎರಡು ಪುಟಗಳನ್ನು ನೀಡಲಾಗುತ್ತಿತ್ತು, ಆದರೆ ಈ ವರ್ಷದಿಂದ ನಾಲ್ಕು ಪುಟಗಳನ್ನು ನೀಡಲಾಗುತ್ತದೆ.
3. ಪ್ರಶ್ನೆ ಪತ್ರಿಕೆಯ ವಿನ್ಯಾಸದಲ್ಲಿ ಬದಲಾವಣೆ
ಈ ಹಿಂದೆ ರಫ್ ವರ್ಕ್ ಮಾಡಲು ಕೇವಲ ಪ್ರಶ್ನೆ ಪತ್ರಿಕೆಯ ಕೊನೆಯಲ್ಲಿ ಮಾತ್ರ ಪುಟಗಳನ್ನು ನೀಡಲಾಗುತ್ತಿತ್ತು. ಇದು ವಿಶೇಷವಾಗಿ ಎಡಗೈ ಅಭ್ಯರ್ಥಿಗಳಿಗೆ (Left-handed candidates) ಮತ್ತು ಇತರೆ ಕೆಲವು ವಿದ್ಯಾರ್ಥಿಗಳಿಗೆ ಅನಾನುಕೂಲವನ್ನು ಉಂಟುಮಾಡುತ್ತಿತ್ತು. ಈ ಸಮಸ್ಯೆಯನ್ನು ಬಗೆಹರಿಸಲು, ಈಗ ಎರಡು ರಫ್ ಪುಟಗಳನ್ನು ಬುಕ್ಲೆಟ್ನ ಆರಂಭದಲ್ಲಿ (ಸೂಚನಾ ಪುಟದ ತಕ್ಷಣವೇ) ಮತ್ತು ಇನ್ನುಳಿದ ಎರಡು ಪುಟಗಳನ್ನು ಬುಕ್ಲೆಟ್ನ ಕೊನೆಯಲ್ಲಿ ನೀಡಲಾಗುತ್ತದೆ. ಈ ಹೊಸ ವಿನ್ಯಾಸವು ಇಂಗ್ಲಿಷ್ ಹಾಗೂ ಪ್ರಾದೇಶಿಕ ಭಾಷೆಗಳೆರಡರ ಪ್ರಶ್ನೆ ಪತ್ರಿಕೆಗಳಿಗೂ ಅನ್ವಯಿಸಲಿದೆ.
NTA ಪ್ರಕಟಣೆ: “ಪರೀಕ್ಷಾ ವಿನ್ಯಾಸದಲ್ಲಿ ಮಾಡುವ ಸಣ್ಣ ಸುಧಾರಣೆಗಳು ಸಹ ವಿದ್ಯಾರ್ಥಿಗಳ ಪರೀಕ್ಷಾ ಅನುಭವದ ಮೇಲೆ ಧನಾತ್ಮಕ ಪರಿಣಾಮ ಬೀರುತ್ತವೆ. ಪರೀಕ್ಷೆಯ ಸುರಕ್ಷತೆ ಮತ್ತು ನ್ಯಾಯಸಮ್ಮತತೆಯ ಅತ್ಯುನ್ನತ ಗುಣಮಟ್ಟವನ್ನು ಕಾಯ್ದುಕೊಳ್ಳುತ್ತಲೇ, ಪ್ರಕ್ರಿಯೆಯನ್ನು ಅಭ್ಯರ್ಥಿಗಳಿಗೆ ಹೆಚ್ಚು ಆರಾಮದಾಯಕವಾಗಿಸುವುದು ನಮ್ಮ ಉದ್ದೇಶವಾಗಿದೆ” ಎಂದು ಎನ್ಟಿಎ ಹೇಳಿದೆ.
ಅಭ್ಯರ್ಥಿಗಳು ತಮ್ಮ ಪ್ರವೇಶ ಪತ್ರ (Admit Card) ಮತ್ತು ಮಾಹಿತಿ ಕೈಪಿಡಿಯಲ್ಲಿ (Information Bulletin) ನೀಡಿರುವ ಸೂಚನೆಗಳನ್ನು ಜಾಗರೂಕರಾಗಿ ಓದಬೇಕು ಮತ್ತು ಪರೀಕ್ಷೆಯ ಸುಗಮ ನಿರ್ವಹಣೆಗೆ ಪರೀಕ್ಷಾ ಸಿಬ್ಬಂದಿಯೊಂದಿಗೆ ಸಹಕರಿಸಬೇಕು ಎಂದು ಎನ್ಟಿಎ ಮುಖ್ಯಸ್ಥರು ತಿಳಿಸಿದ್ದಾರೆ.
The National Testing Agency (NTA) is committed to ensuring that NEET (UG)-2026 examination is conducted in a manner that is fair, secure and responsive to the needs of candidates. As part of this effort, a few candidate-friendly changes have been introduced for NEET (UG) 2026,… pic.twitter.com/eRw2KyleIU
— ANI (@ANI) June 12, 2026
