ನವದೆಹಲಿ: ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ ಅವರನ್ನು ಮರಳಿ ತಮ್ಮ ದೇಶಕ್ಕೆ ಕಳುಹಿಸಿಕೊಡುವಂತೆ (Extradition) ಬಾಂಗ್ಲಾದೇಶದ ಹಂತಕ ಸರ್ಕಾರ ಮಾಡಿರುವ ಅಧಿಕೃತ ವಿನಂತಿಯನ್ನು ಭಾರತ ಸರ್ಕಾರವು “ಪರಿಶೀಲಿಸುತ್ತಿದೆ” ಎಂದು ವಿದೇಶಾಂಗ ಸಚಿವಾಲಯ ತಿಳಿಸಿದೆ. ಈ ಮೂಲಕ ಹಸೀನಾ ವಿಚಾರದಲ್ಲಿ ಭಾರತದ ನಿಲುವು ಸೂಕ್ಷ್ಮವಾಗಿ ಬದಲಾಗುತ್ತಿರುವ ಸೂಚನೆ ಸಿಕ್ಕಿದೆ.
ವಿದೇಶಾಂಗ ಸಚಿವಾಲಯದ ವಕ್ತಾರರು ಗುರುವಾರ ನಡೆಸಿದ ಸುದ್ದಿಗೋಷ್ಠಿಯಲ್ಲಿ, “ಬಾಂಗ್ಲಾದೇಶ ಸರ್ಕಾರದಿಂದ ಶೇಖ್ ಹಸೀನಾ ಅವರ ಹಸ್ತಾಂತರಕ್ಕೆ ಸಂಬಂಧಿಸಿದಂತೆ ನಮಗೆ ಮನವಿ ಬಂದಿದೆ. ಪ್ರಸ್ತುತ ನಮ್ಮ ಸಂಬಂಧಿತ ಇಲಾಖೆಗಳು ಮತ್ತು ಕಾನೂನು ತಜ್ಞರು ಈ ಮನವಿಯನ್ನು ಪರಿಶೀಲಿಸುತ್ತಿದ್ದಾರೆ” ಎಂದು ತಿಳಿಸಿದ್ದಾರೆ.
ಹಸೀನಾ ವಿರುದ್ಧ ಬಾಂಗ್ಲಾದೇಶದ ನ್ಯಾಯಾಲಯಗಳು ಅರೆಸ್ಟ್ ವಾರಂಟ್ ಜಾರಿಗೊಳಿಸಿವೆ. ಪ್ರತಿಭಟನೆಯ ವೇಳೆ ನಡೆದ ಹತ್ಯಾಕಾಂಡಗಳಿಗೆ ಹಸೀನಾ ಅವರೇ ಜವಾಬ್ದಾರರು ಎಂದು ಅಲ್ಲಿನ ಮಧ್ಯಂತರ ಸರ್ಕಾರ ಆರೋಪಿಸುತ್ತಿದೆ.
ಆಗಸ್ಟ್ನಿಂದ ಭಾರತದಲ್ಲಿ ಆಶ್ರಯ ಪಡೆದಿರುವ ಶೇಖ್ ಹಸೀನಾ ಅವರು ಭಾರತದ ದೀರ್ಘಕಾಲದ ಮಿತ್ರರಾಗಿದ್ದಾರೆ. ಆದರೆ, ಬಾಂಗ್ಲಾದೇಶದ ಪ್ರಸ್ತುತ ಸರ್ಕಾರದೊಂದಿಗೆ ಉತ್ತಮ ಬಾಂಧವ್ಯ ಕಾಪಾಡಿಕೊಳ್ಳುವುದು ಕೂಡ ಭಾರತಕ್ಕೆ ಅನಿವಾರ್ಯವಾಗಿದೆ.
ಈ ಮೊದಲು ಹಸೀನಾ ಅವರ ಹಸ್ತಾಂತರದ ಬಗ್ಗೆ ಪ್ರಶ್ನಿಸಿದಾಗ “ಅವರು ಇಲ್ಲಿ ಆಶ್ರಯದಲ್ಲಿದ್ದಾರೆ” ಎಂಬ ಸಾಂಪ್ರದಾಯಿಕ ಉತ್ತರ ಸಿಗುತ್ತಿತ್ತು. ಆದರೆ ಈಗ “ಅರ್ಜಿ ಪರಿಶೀಲನೆಯಲ್ಲಿದೆ” ಎಂದು ಹೇಳಿರುವುದು ಭಾರತವು ಈ ವಿಚಾರದಲ್ಲಿ ಕಾನೂನಾತ್ಮಕ ದಾರಿಗಳನ್ನು ಹುಡುಕುತ್ತಿದೆ ಅಥವಾ ಬಾಂಗ್ಲಾದೇಶದ ವಿನಂತಿಯನ್ನು ತಳ್ಳಿಹಾಕಿಲ್ಲ ಎಂಬ ಸಂದೇಶವನ್ನು ನೀಡಿದಂತಾಗಿದೆ.
