ವಾಷಿಂಗ್ಟನ್: ಇರಾನ್ ಮತ್ತು ಅಮೆರಿಕ ನಡುವಿನ ಯುದ್ಧದ ಕಾರ್ಮೋಡ ಮತ್ತಷ್ಟು ಕಪ್ಪಾಗುತ್ತಿದ್ದು, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸರಣಿ ಡೆಡ್ಲೈನ್ಗಳು ಇಡೀ ಜಗತ್ತನ್ನು ತುದಿಗಾಲಿನಲ್ಲಿ ನಿಲ್ಲುವಂತೆ ಮಾಡಿದೆ. ಇರಾನ್ನ ಪ್ರಮುಖ ಜಲಸಂಧಿಯಾದ ‘ಸ್ಟ್ರೈಟ್ ಆಫ್ ಹಾರ್ಮುಜ್’ (Strait of Hormuz) ಅನ್ನು ಮುಕ್ತಗೊಳಿಸಲು ಟ್ರಂಪ್ ನೀಡಿದ್ದ 48 ಗಂಟೆಗಳ ಗಡುವು ಈಗ ಬರೋಬ್ಬರಿ 408 ಗಂಟೆಗಳಿಗೆ ವಿಸ್ತರಣೆಯಾಗಿದ್ದು, ಇಂದಿನ (ಏಪ್ರಿಲ್ 7) ಗಡುವು ಅಂತಿಮವೇ ಎಂಬ ಪ್ರಶ್ನೆ ಮೂಡಿದೆ.
ಬಾಂಬ್ ಎಚ್ಚರಿಕೆ ಮತ್ತು ಸರಣಿ ವಿಳಂಬ
ಮಾರ್ಚ್ 22 ರಂದು ಟ್ರಂಪ್ ತಮ್ಮ ಮೊದಲ ಗಂಭೀರ ಎಚ್ಚರಿಕೆ ನೀಡಿದ್ದರು. “ಇರಾನ್ ತಕ್ಷಣವೇ ಜಲಸಂಧಿಯನ್ನು ತೆರೆಯದಿದ್ದರೆ, ಅಲ್ಲಿನ ಅತಿದೊಡ್ಡ ವಿದ್ಯುತ್ ಸ್ಥಾವರಗಳಿಂದ ಹಿಡಿದು ಇಂಧನ ಕೇಂದ್ರಗಳವರೆಗೆ ಎಲ್ಲವನ್ನೂ ಧ್ವಂಸ ಮಾಡುತ್ತೇವೆ” ಎಂದು ಗುಡುಗಿದ್ದರು. ಆದರೆ, ಅಂದಿನಿಂದ ಇಂದಿನವರೆಗೆ ಟ್ರಂಪ್ ಮೂರು ಬಾರಿ ಗಡುವನ್ನು ವಿಸ್ತರಿಸುವ ಮೂಲಕ ಜಗತ್ತನ್ನು ಅಚ್ಚರಿಯಲ್ಲಿ ಹಾಕಿದ್ದಾರೆ.
ಟ್ರಂಪ್ ಅವರ ‘ವಾರ್ ಗೇಮ್’ ಸಾಗಿಬಂದ ಹಾದಿ:
-
ಮಾರ್ಚ್ 22: 48 ಗಂಟೆಗಳ ಮೊದಲ ಅಲ್ಟಿಮೇಟಮ್.
-
ಮಾರ್ಚ್ 23: ಸಂಧಾನದ ಮಾತುಕತೆಗಳ ನೆಪವೊಡ್ಡಿ 5 ದಿನಗಳ ಕಾಲ (ಮಾರ್ಚ್ 28 ರವರೆಗೆ) ದಾಳಿ ಮುಂದೂಡಿಕೆ.
-
ಮಾರ್ಚ್ 26: “ಇರಾನ್ ಗಂಭೀರವಾಗಲಿ” ಎಂದು ಎಚ್ಚರಿಸಿ, ಗಡುವನ್ನು ಏಪ್ರಿಲ್ 6 ರವರೆಗೆ ಮತ್ತೆ ವಿಸ್ತರಿಸಿದರು.
-
ಏಪ್ರಿಲ್ 6: ಕೊನೆಯ ಕ್ಷಣದಲ್ಲಿ ಮತ್ತೆ 24 ಗಂಟೆಗಳ ಕಾಲಾವಕಾಶ ನೀಡಿ, ಏಪ್ರಿಲ್ 7 ರ ರಾತ್ರಿ 8 ಗಂಟೆಗೆ (ET) ಹೊಸ ಗಡುವು ನಿಗದಿಪಡಿಸಿದರು.
“ಇರಾನ್ನಲ್ಲಿ ಮಂಗಳವಾರ ಪವರ್ ಪ್ಲಾಂಟ್ ಡೇ!”
ತಮ್ಮ ‘ಟ್ರುತ್ ಸೋಶಿಯಲ್’ ಖಾತೆಯಲ್ಲಿ ಟ್ರಂಪ್ ಬರೆದ ಗೂಢ ಸಂದೇಶ ಈಗ ಎಲ್ಲೆಡೆ ಭೀತಿ ಹುಟ್ಟಿಸಿದೆ. “ಮಂಗಳವಾರ ಇರಾನ್ನಲ್ಲಿ ಪವರ್ ಪ್ಲಾಂಟ್ ಡೇ ಮತ್ತು ಬ್ರಿಡ್ಜ್ ಡೇ ಒಟ್ಟಾಗಿ ಇರಲಿದೆ” ಎಂದು ಹೇಳುವ ಮೂಲಕ, ಒಂದು ವೇಳೆ ಸಂಧಾನ ವಿಫಲವಾದರೆ ಏಕಕಾಲಕ್ಕೆ ಇರಾನ್ನ ವಿದ್ಯುತ್ ಸ್ಥಾವರ ಮತ್ತು ಸೇತುವೆಗಳನ್ನು ಗುರಿಯಾಗಿಸಿ ದಾಳಿ ನಡೆಸುವುದಾಗಿ ಅವರು ಶಪಥ ಮಾಡಿದ್ದಾರೆ.
US President Donald Trump posts on Truth Social, "A whole civilization will die tonight, never to be brought back again. I don’t want that to happen, but it probably will. However, now that we have Complete and Total Regime Change, where different, smarter, and less radicalized… pic.twitter.com/jPxOxy9pRw
— ANI (@ANI) April 7, 2026
ಮಾತುಕತೆಯೋ ಅಥವಾ ಸ್ಫೋಟವೋ?
ಪ್ರಸ್ತುತ ಅಮೆರಿಕವು ಇರಾನ್ ಜೊತೆ ಪಾಕಿಸ್ತಾನ, ಟರ್ಕಿ ಮತ್ತು ಈಜಿಪ್ಟ್ ದೇಶಗಳ ಮಧ್ಯಸ್ಥಿಕೆಯಲ್ಲಿ ಮಾತುಕತೆ ನಡೆಸುತ್ತಿದೆ. ಟ್ರಂಪ್ ಅವರ ಪ್ರಕಾರ, ಅಮೆರಿಕದ ಅಧಿಕಾರಿಗಳು ಇರಾನ್ ಜೊತೆ ಟೆಕ್ಸ್ಟ್ ಮೆಸೇಜ್ಗಳ ಮೂಲಕವೂ ಸಂಪರ್ಕದಲ್ಲಿದ್ದಾರೆ.
ಆಕ್ಸಿಯೋಸ್ (Axios) ವರದಿಯ ಪ್ರಕಾರ, ಟ್ರಂಪ್ ಈ ಗಡುವನ್ನು ಅಂತಿಮ ಎಂದಿದ್ದಾರೆ. “ಒಪ್ಪಂದವಾಗುವ ಉತ್ತಮ ಸಾಧ್ಯತೆಯಿದೆ, ಒಂದು ವೇಳೆ ಅವರು ಒಪ್ಪದಿದ್ದರೆ ನಾನು ಅಲ್ಲಿನ ಎಲ್ಲವನ್ನೂ ಉಡಾಯಿಸುತ್ತೇನೆ” ಎಂದು ಟ್ರಂಪ್ ಎಚ್ಚರಿಸಿದ್ದಾರೆ. ಆದರೆ, ಇರಾನ್ ಮಾತ್ರ ಅಮೆರಿಕದ ಪ್ರಸ್ತಾಪಗಳನ್ನು ತಿರಸ್ಕರಿಸಿ, ತನ್ನದೇ ಆದ 10 ಅಂಶಗಳ ಪ್ರಸ್ತಾಪವನ್ನು ಮುಂದಿಟ್ಟಿದೆ.
ಮುಂದೇನು?
ಟ್ರಂಪ್ ಅವರ ಈ ಹಿಂದಿನ ನಡವಳಿಕೆಯನ್ನು ಗಮನಿಸಿದರೆ, ಸಂಧಾನದಲ್ಲಿ ಸ್ವಲ್ಪ ಪ್ರಗತಿ ಕಂಡರೂ ಅವರು ಗಡುವನ್ನು ಮತ್ತೆ ವಿಸ್ತರಿಸಬಹುದು ಎಂಬ ನಿರೀಕ್ಷೆ ಇರಾನ್ ಪಾಳಯದಲ್ಲಿದೆ. ಆದರೆ, ಅಧ್ಯಕ್ಷರ “ಕೊನೆಯ ಗಡುವು” ಏಪ್ರಿಲ್ 7ಕ್ಕೆ ಅಂತ್ಯಗೊಳ್ಳಲಿದ್ದು, ಇಂದು ರಾತ್ರಿ ಜಗತ್ತು ಯುದ್ಧದ ಕಡೆಗೆ ಸರಿಯುತ್ತದೆಯೇ ಅಥವಾ ಮತ್ತೊಂದು ರಾಜತಾಂತ್ರಿಕ ತಿರುವು ಸಿಗುತ್ತದೆಯೇ ಎಂಬುದು ಕುತೂಹಲಕಾರಿಯಾಗಿದೆ.
BREAKING: ಪಂಚ ರಾಜ್ಯಗಳ ಚುನಾವಣೆ: ಏ.೯ರಿಂದ 29 ರವರೆಗೆ ಎಕ್ಸಿಟ್ ಪೋಲ್ ಸಮೀಕ್ಷೆ ನಿಷೇಧಿಸಿ ಚುನಾವಣಾ ಆಯೋಗ ಆದೇಶ
Watch Video: ನೀವು ಬಾಯಿ ಚಪ್ಪರಿಸಿ ‘ಬಿರಿಯಾನಿ’ ತಿನ್ನೋ ಮುನ್ನಾ ತಪ್ಪದೇ ಈ ಸುದ್ದಿ ಓದಿ! ಶಾಕ್ ಗ್ಯಾರಂಟಿ!
