ಥಾಣೆ: ಮಗನ ಮೂರನೇ ವರ್ಷದ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದ ಕುಟುಂಬವೊಂದಕ್ಕೆ ಕೇಕ್ ಅನಿರೀಕ್ಷಿತ ಆಘಾತ ನೀಡಿದೆ. ಕೇಕ್ ಮೇಲಿದ್ದ ಅಲಂಕಾರಿಕ ಚಾಕೊಲೇಟ್ ಬೌಲಿಂಗ್ ಪಿನ್ಗಳ ಒಳಗಿದ್ದ ಎರಡು ಕಬ್ಬಿಣದ ಪಿನ್ಗಳನ್ನು (ವೈರ್) ಮೂರು ವರ್ಷದ ಮಗುವೊಂದು ತಿಳಿಯದೇ ನುಂಗಿದ ಘಟನೆ ಮಹಾರಾಷ್ಟ್ರದ ಥಾಣೆಯಲ್ಲಿ ನಡೆದಿದೆ. ಸದ್ಯ ಮಗು ಪ್ರಾಣಾಪಾಯದಿಂದ ಪಾರಾಗಿದ್ದು, ಪೋಷಕರು ನಿಟ್ಟುಸಿರು ಬಿಟ್ಟಿದ್ದಾರೆ.
ಥಾಣೆಯ ಹಿರಾನಂದಾನಿ ಎಸ್ಟೇಟ್ ನಿವಾಸಿಯಾಗಿರುವ ಜೀವಶಾಸ್ತ್ರ ಶಿಕ್ಷಕಿ ಸ್ನೇಹಾ ಶೆಲಾರ್ ಎಂಬುವವರ ಮಗ ರೇಯಾಂಶ್ ಈ ಕರಾಳ ಅನುಭವದಿಂದ ಪಾರಾದ ಬಾಲಕ. ಮೇ 31 ರಂದು ರೇಯಾಂಶ್ ಹುಟ್ಟುಹಬ್ಬದ ಅಂಗವಾಗಿ ಕುಟುಂಬಸ್ಥರು ‘ಸ್ಪೈಡರ್ಮ್ಯಾನ್’ ಥೀಮ್ನ ಬೌಲಿಂಗ್ ಅಲೆ ವಿನ್ಯಾಸದ ಕೇಕ್ ತರಿಸಿದ್ದರು. ಆದರೆ ಮರುದಿನವೇ ಈ ಸಂಭ್ರಮ ದೊಡ್ಡ ದುರಂತಕ್ಕೆ ತಿರುಗುವ ಮುನ್ಸೂಚನೆ ನೀಡಿತ್ತು.
ಬೇಕರಿಯವರು ಕೇಕ್ ಮೇಲಿದ್ದ ಚಾಕೊಲೇಟ್ ಬೌಲಿಂಗ್ ಪಿನ್ ಗಳಿಗೆ ಆಧಾರ ನೀಡಲು ಒಳಭಾಗದಲ್ಲಿ ಕಬ್ಬಿಣದ ತಂತಿಗಳನ್ನು ಬಳಸಿದ್ದರು. ಆದರೆ ಈ ಬಗ್ಗೆ ಗ್ರಾಹಕರಿಗೆ ಯಾವುದೇ ಮುನ್ನೆಚ್ಚರಿಕೆ ನೀಡಿರಲಿಲ್ಲ. ಪಾರ್ಟಿಯಲ್ಲಿದ್ದ ಹಿರಿಯ ಮಕ್ಕಳು ಚಾಕೊಲೇಟ್ ಒಳಗಿದ್ದ ವೈರ್ಗಳನ್ನು ಗಮನಿಸಿ ಪೋಷಕರಿಗೆ ತಿಳಿಸಿದಾಗ ಸ್ನೇಹಾ ಅವರ ಕುಟುಂಬ ಆತಂಕಕ್ಕೊಳಗಾಗಿದೆ. ತಕ್ಷಣವೇ ಮಗ ರೇಯಾಂಶ್ನನ್ನು ಜುಪಿಟರ್ ಆಸ್ಪತ್ರೆಗೆ ಕರೆದೊಯ್ದು ಎಕ್ಸ್ರೇ ಮಾಡಿಸಿದಾಗ, ಮಗುವಿನ ಸಣ್ಣ ಕರುಳಿನಲ್ಲಿ ಎರಡು ದೊಡ್ಡ ಕಬ್ಬಿಣದ ಪಿನ್ಗಳು ಇರುವುದು ಪತ್ತೆಯಾಗಿದೆ.
“ನನ್ನ ಮಗನ ಬರ್ತ್ಡೇ ಕೇಕ್ ನನ್ನ ಜೀವನದ ಅತ್ಯಂತ ಭಯಾನಕ ರಾತ್ರಿಯಾಗಿ ಪರಿಣಮಿಸಿತು. ಎಕ್ಸ್ರೇಯಲ್ಲಿ ಆ ಎರಡು ದೊಡ್ಡ ಲೋಹದ ತುಂಡುಗಳನ್ನು ನೋಡಿ ನಡುಗಿಹೋಗಿದ್ದೆ” ಎಂದು ತಾಯಿ ಸ್ನೇಹಾ ಶೆಲಾರ್ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ.
ಸರ್ಜರಿ ಇಲ್ಲದೆ ಪಾರಾದ ಮಗು
ಮಗುವಿನ ಕರುಳಿಗೆ ಪಿನ್ಗಳು ತಲುಪಿದ್ದರಿಂದ ತಕ್ಷಣವೇ ಶಸ್ತ್ರಚಿಕಿತ್ಸೆ ಮಾಡುವುದು ಬೇಡ ಎಂದು ವೈದ್ಯರು ಸಲಹೆ ನೀಡಿದ್ದರು. ಮಗುವಿನ ಆರೋಗ್ಯದ ಮೇಲೆ ನಿರಂತರ ನಿಗಾ ಇಡಲಾಗಿತ್ತು. ಅದೃಷ್ಟವಶಾತ್ 48 ಗಂಟೆಗಳ ನಂತರ ಆ ಎರಡು ಕಬ್ಬಿಣದ ಪಿನ್ಗಳು ಮಲ ವಿಸರ್ಜನೆಯ ಮೂಲಕ ನೈಸರ್ಗಿಕವಾಗಿ ಹೊರಬಂದಿವೆ.
ಪೋಷಕರಿಗೆ ಎಚ್ಚರಿಕೆ ಮತ್ತು ಕಾನೂನು ಹೋರಾಟ
ಕೇಕ್ ತಯಾರಕರು ಸಣ್ಣ ಮಕ್ಕಳಿಗಾಗಿ ಮಾಡುವ ಕೇಕ್ಗಳ ಬಗ್ಗೆ ನಿರ್ಲಕ್ಷ್ಯ ವಹಿಸಿರುವುದಕ್ಕೆ ಪೋಷಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಸ್ನೇಹಾ ಅವರು, “ಬೇಕರಿಗಳಲ್ಲಿ ಕೇಕ್ ಆರ್ಡರ್ ಮಾಡುವಾಗ ಅದರಲ್ಲಿ ಬಳಸಲಾದ ಅಲಂಕಾರಿಕ ವಸ್ತುಗಳು ಸಂಪೂರ್ಣ ತಿನ್ನಲು ಯೋಗ್ಯವೇ ಅಥವಾ ಒಳಗಡೆ ಏನಾದರೂ ಇಂತಹ ಅಪಾಯಕಾರಿ ವಸ್ತುಗಳನ್ನು ಬಳಸಲಾಗಿದೆಯೇ ಎಂಬುದನ್ನು ಪೋಷಕರು ಖಚಿತಪಡಿಸಿಕೊಳ್ಳಬೇಕು” ಎಂದು ಮನವಿ ಮಾಡಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ ಕುಟುಂಬಸ್ಥರು ಕಾಸರವಾಡವಲಿ ಪೊಲೀಸರನ್ನು ಸಂಪರ್ಕಿಸಿದಾಗ, ಇದು ಆಹಾರ ಮತ್ತು ಔಷಧ ಆಡಳಿತ (FDA) ವ್ಯಾಪ್ತಿಗೆ ಬರುತ್ತದೆ ಎಂದು ತಿಳಿಸಿದ್ದಾರೆ. ಆದರೆ ಎಫ್ಡಿಎ ಅಧಿಕಾರಿಗಳು ತನಿಖೆ ನಡೆಸಲು ಕೇಕ್ ಅಥವಾ ಆ ಚಾಕೊಲೇಟ್ ಪಿನ್ನ ಮಾದರಿ (Sample) ಇಲ್ಲದಿರುವುದಾಗಿ ಹೇಳಿದ್ದಾರೆ. ಮತ್ತೊಂದೆಡೆ, ಮಹಾರಾಷ್ಟ್ರ ಗ್ರಾಹಕ ಪರಿಷತ್ತಿನ ಶಿರೀಶ್ ದೇಶಪಾಂಡೆ ಅವರು, ಗ್ರಾಹಕ ಸಂರಕ್ಷಣಾ ಕಾಯ್ದೆಯಡಿ ಕೇವಲ ದೈಹಿಕ ಹಾನಿ ಮಾತ್ರವಲ್ಲದೆ, ಮಾನಸಿಕ ತಲ್ಲಣಕ್ಕೂ ಬೇಕರಿ ವಿರುದ್ಧ ಗ್ರಾಹಕ ನ್ಯಾಯಾಲಯದಲ್ಲಿ ಪರಿಹಾರ ಕೋರಬಹುದು ಎಂದು ತಿಳಿಸಿದ್ದಾರೆ.
⚠️ PARENTS, PLEASE WATCH THIS BEFORE BUYING A CUSTOM CAKE ⚠️
If your kid loves custom, shaped cakes, you cannot skip this video.
On May 31st, parents ordered a beautiful, custom designed cake for their child. It looked perfect, but hidden inside the design were small pins and… pic.twitter.com/oEKD0HgRoX
— Fight Intellect (@desikalesh1) June 8, 2026
