ಪ್ರಧಾನಿ ನರೇಂದ್ರ ಮೋದಿ ಅವರು ಭಾನುವಾರ (ಸ್ಥಳೀಯ ಕಾಲಮಾನ) ಸ್ಲೋವಾಕಿಯಾದ ಬ್ರಾಟಿಸ್ಲಾವಾಗೆ ಆಗಮಿಸುತ್ತಿದ್ದಂತೆ, ಅಲ್ಲಿನ ಪ್ರಸಿದ್ಧ ‘ಲುಕ್ನಿಕಾ ಎನ್ಸೆಂಬಲ್’ (Lucnica Ensemble) ತಂಡದ ಕಲಾವಿದರು ಭಾರತದ ರಾಷ್ಟ್ರೀಯ ಗೀತೆ “ವಂದೇ ಮಾತರಂ” ಅನ್ನು ಹಾಡುವ ಮೂಲಕ ಅವರಿಗೆ ಆತ್ಮೀಯ ಸ್ವಾಗತ ಕೋರಿದರು. ಈ ಐತಿಹಾಸಿಕ ಯುರೋಪ್ ಪ್ರವಾಸದ ವೇಳೆ ಅಲ್ಲಿನ ಅನಿವಾಸಿ ಭಾರತೀಯರು ಪ್ರಧಾನಿಯವರನ್ನು ಅತ್ಯಂತ ಉತ್ಸಾಹದಿಂದ ಬರಮಾಡಿಕೊಂಡರು.
1993ರಲ್ಲಿ ಸ್ಲೋವಾಕಿಯಾ ಸ್ವತಂತ್ರ ರಾಷ್ಟ್ರವಾದ ನಂತರ, ಭಾರತದ ಪ್ರಧಾನಿಯೊಬ್ಬರು ಆ ದೇಶಕ್ಕೆ ಭೇಟಿ ನೀಡುತ್ತಿರುವುದು ಇದೇ ಮೊದಲು. ಈ ಪ್ರವಾಸವು ಉಭಯ ದೇಶಗಳ ನಡುವೆ ಬೆಳೆಯುತ್ತಿರುವ ದ್ವಿಪಕ್ಷೀಯ ಬಾಂಧವ್ಯಕ್ಕೆ ಸಾಕ್ಷಿಯಾಗಿದೆ.
ಈ ಐತಿಹಾಸಿಕ ಭೇಟಿಯ ಮಹತ್ವವನ್ನು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ (MEA) ವಕ್ತಾರರು ತಮ್ಮ ‘X’ (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಂಡಿದ್ದು, “ಪ್ರಧಾನಿ ನರೇಂದ್ರ ಮೋದಿ ಅವರು ಸ್ಲೋವಾಕಿಯಾಗೆ ತಲುಪಿದ್ದಾರೆ. ಸ್ಲೋವಾಕಿಯಾ ಸ್ವಾತಂತ್ರ್ಯ ಪಡೆದ ನಂತರ ಭಾರತದ ಪ್ರಧಾನಿಯೊಬ್ಬರು ನೀಡುತ್ತಿರುವ ಮೊದಲ ಭೇಟಿ ಇದಾಗಿದ್ದು, ಭಾರತ-ಸ್ಲೋವಾಕಿಯಾ ಸಂಬಂಧದಲ್ಲಿ ಇದೊಂದು ಐತಿಹಾಸಿಕ ಮೈಲಿಗಲ್ಲು. ಹೋಟೆಲ್ಗೆ ಆಗಮಿಸಿದ ಪ್ರಧಾನಿಯವರನ್ನು ಸ್ಲೋವಾಕಿಯಾ ಗಣರಾಜ್ಯದ ವಿದೇಶಾಂಗ ಮತ್ತು ಯುರೋಪಿಯನ್ ವ್ಯವಹಾರಗಳ ಸಚಿವ ಮಿಶ್ನೆರ್ ಜುರಾಜ್ ಬ್ಲಾನರ್ ಅವರು ಬರಮಾಡಿಕೊಂಡರು. ಸ್ಲೋವಾಕಿಯಾದ ಸಾಂಪ್ರದಾಯಿಕ ಪದ್ಧತಿಯಾದ ‘ಬ್ರೆಡ್ ಮತ್ತು ಉಪ್ಪು’ ನೀಡುವ ಮೂಲಕ ಆತಿಥ್ಯ, ಗೌರವ ಹಾಗೂ ಸೌಹಾರ್ದತೆಯ ಸ್ವಾಗತ ಕೋರಲಾಯಿತು. ಈ ಭೇಟಿಯು ದ್ವಿಪಕ್ಷೀಯ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸಲಿದೆ ಮತ್ತು ಪಾಲುದಾರಿಕೆಗೆ ಹೊಸ ಅವಕಾಶಗಳನ್ನು ತೆರೆಯಲಿದೆ” ಎಂದು ಬರೆದುಕೊಂಡಿದ್ದಾರೆ.
ಬ್ರಾಟಿಸ್ಲಾವಾದ ಹೋಟೆಲ್ನಲ್ಲಿ, ಪ್ರಧಾನಿಯವರ ಗೌರವಾರ್ಥವಾಗಿ ‘ಲುಕ್ನಿಕಾ ಎನ್ಸೆಂಬಲ್’ ಕಲಾ ತಂಡವು “ವಂದೇ ಮಾತರಂ” ಗೀತೆಯನ್ನು ಪ್ರಸ್ತುತಪಡಿಸಿತು. ಇದೇ ಕಲಾ ತಂಡವು 2025ರಲ್ಲಿ ಭಾರತದ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಸ್ಲೋವಾಕಿಯಾಗೆ ಭೇಟಿ ನೀಡಿದ್ದ ಸಂದರ್ಭದಲ್ಲೂ ಭಾರತದ ರಾಷ್ಟ್ರಗೀತೆಯನ್ನು ಹಾಡಿತ್ತು.
ಈ ಅಪೂರ್ವ ಅನುಭವದ ಬಗ್ಗೆ ಮಾತನಾಡಿದ ಕಲಾ ತಂಡದ ಸದಸ್ಯರೊಬ್ಬರು, “ಇದು ನಮಗೆ ಅದ್ಭುತ ಅನುಭವವಾಗಿತ್ತು. ಪ್ರಧಾನಿಯವರು ಅತ್ಯಂತ ವಿನಮ್ರವಾಗಿ ನಮಗೆ ಕೃತಜ್ಞತೆ ಸಲ್ಲಿಸಿದರು. ನಾನು ಈ ಹಿಂದೆ ಎಂದಿಗೂ ಯಾವುದೇ ದೇಶದ ಪ್ರಧಾನಮಂತ್ರಿಯವರ ಮುಂದೆ ಪ್ರದರ್ಶನ ನೀಡಿರಲಿಲ್ಲ, ಹಾಗಾಗಿ ಇದು ನನಗೆ ಯಾವಾಗಲೂ ನೆನಪಿನಲ್ಲಿ ಉಳಿಯುತ್ತದೆ” ಎಂದಿದ್ದಾರೆ. ತಂಡದ ಮತ್ತೊಬ್ಬ ಸದಸ್ಯೆ ಇವಾ ಮಾತನಾಡಿ, “ಅವರು ತುಂಬಾ ಸೌಮ್ಯ ಸ್ವಭಾವದವರಾಗಿದ್ದಾರೆ. ಭಾರತೀಯರು ತುಂಬಾ ದಯಾಳುಗಳಾಗಿದ್ದು, ನನಗೆ ಅವರು ತುಂಬಾ ಇಷ್ಟ” ಎಂದರು.
ಇದೇ ವೇಳೆ ಪ್ರಧಾನಿ ಮೋದಿ ಅವರು ಸ್ಲೋವಾಕಿಯಾದ ‘ಮಹಾದೇವ ಕೀರ್ತನ್ ಪ್ರಾಜೆಕ್ಟ್’ ಎಂಬ ಸಂಗೀತ ತಂಡದ ಆಧ್ಯಾತ್ಮಿಕ ಗಾಯನ ಪ್ರದರ್ಶನವನ್ನು ವೀಕ್ಷಿಸಿದರು. ಈ ತಂಡದ ಸಂಸ್ಥಾಪಕ ಹಾಗೂ ಡ್ರಮ್ಮರ್ ಆದ ಮಾರೆಕ್ ಜಿಲಿನೆಕ್ ಅವರು ಭಾರತದ ನಾಯಕರ ಮುಂದೆ ಪ್ರದರ್ಶನ ನೀಡಲು ಅವಕಾಶ ಸಿಕ್ಕಿದ್ದಕ್ಕೆ ಕೃತಜ್ಞತೆ ಸಲ್ಲಿಸಿದರು. “ಭಾರತದ ಪ್ರಧಾನಿಯವರ ಮುಂದೆ ಪ್ರದರ್ಶನ ನೀಡಿರುವುದು ನಮಗೆ ಸಂದ ಗೌರವ. ಈ ಅವಕಾಶವನ್ನು ನೀಡಿದ ಸ್ಲೋವಾಕಿಯಾದಲ್ಲಿನ ಭಾರತೀಯ ರಾಯಭಾರ ಕಚೇರಿಗೆ ನಾನು ಧನ್ಯವಾದ ಅರ್ಪಿಸುತ್ತೇನೆ” ಎಂದು ಜಿಲಿನೆಕ್ ಹೇಳಿದರು.
ಸಾಂಸ್ಕೃತಿಕ ಸ್ವಾಗತದ ಅಂಗವಾಗಿ, ಸ್ಲೋವಾಕಿಯಾದ ಮೈಜಾವಾ ಪ್ರದೇಶದ ಪ್ರಸಿದ್ಧ ಮಕ್ಕಳ ಜಾನಪದ ತಂಡವಾದ ‘ಕೊಪಾನಿಸಿಯಾರಿಕ್’ (Kopaniciarik) ಪ್ರಸ್ತುತಪಡಿಸಿದ ಸಾಂಪ್ರದಾಯಿಕ ಸ್ಲೋವಾಕ್ ನೃತ್ಯ ಪ್ರದರ್ಶನವನ್ನೂ ಪ್ರಧಾನಿ ವೀಕ್ಷಿಸಿದರು.
ಉಪ್ಪು ಮತ್ತು ಬ್ರೆಡ್ ನೀಡುವ ಶತಮಾನಗಳ ಹಳೆಯ ಸಂಪ್ರದಾಯ:
ಪ್ರಧಾನಿ ಮೋದಿ ಅವರು ಆಗಮಿಸುತ್ತಿದ್ದಂತೆ ಅವರಿಗೆ ಸ್ಲೋವಾಕಿಯಾದ ಸಾಂಪ್ರದಾಯಿಕ ಶೈಲಿಯಲ್ಲಿ ‘ಬ್ರೆಡ್ ಮತ್ತು ಉಪ್ಪು’ ನೀಡಿ ಸ್ವಾಗತಿಸಲಾಯಿತು. ಇದು ಶತಮಾನಗಳ ಹಳೆಯ ಸಂಪ್ರದಾಯವಾಗಿದ್ದು ಆತಿಥ್ಯ, ಗೌರವ ಮತ್ತು ಸೌಹಾರ್ದತೆಯನ್ನು ಸೂಚಿಸುತ್ತದೆ. ಸ್ಲೋವಾಕ್ ಸಂಸ್ಕೃತಿಯಲ್ಲಿ ಬ್ರೆಡ್ ಎಂಬುದು ಸಮೃದ್ಧಿ ಮತ್ತು ಜೀವನದ ಆಧಾರವನ್ನು ಪ್ರತಿನಿಧಿಸಿದರೆ, ಉಪ್ಪು ಎಂಬುದು ಸ್ನೇಹ, ಮೌಲ್ಯ ಮತ್ತು ರಕ್ಷಣೆಯನ್ನು ಸೂಚಿಸುತ್ತದೆ. ಈ ವಿಶೇಷ ಸಾಂಪ್ರದಾಯಿಕ ಸ್ವಾಗತವನ್ನು ಕೇವಲ ಅತ್ಯಂತ ಗೌರವಾನ್ವಿತ ಅತಿಥಿಗಳಿಗೆ ಮಾತ್ರ ಮೀಸಲಾಗಿಡಲಾಗುತ್ತದೆ. ಇದು ಸ್ಲೋವಾಕಿಯಾ ಜನತೆ ಅತಿಥಿ ಸತ್ಕಾರಕ್ಕೆ ನೀಡುವ ಪ್ರಾಮುಖ್ಯತೆಯನ್ನು ಪ್ರತಿಬಿಂಬಿಸುತ್ತದೆ.
