ಮಧ್ಯಪ್ರಾಚ್ಯವನ್ನು ನಡುಗಿಸಿ, ಜಾಗತಿಕ ಇಂಧನ ಮಾರುಕಟ್ಟೆಯನ್ನು ಅಸ್ತವ್ಯಸ್ತಗೊಳಿಸಿದ್ದ ಮೂರು ತಿಂಗಳಿಗೂ ಹೆಚ್ಚು ಕಾಲದ ಭೀಕರ ಸಂಘರ್ಷವನ್ನು ಕೊನೆಗೊಳಿಸಲು ವಾಷಿಂಗ್ಟನ್ ಮತ್ತು ಟೆಹ್ರಾನ್ ಒಪ್ಪಂದವನ್ನು ಪ್ರಕಟಿಸಿದ ಕೆಲವೇ ಗಂಟೆಗಳಲ್ಲಿ, ಸೋಮವಾರ (ಜೂನ್ 15) ಇರಾನ್ ಮಿಲಿಟರಿ ಅಮೆರಿಕ ಮತ್ತು ಇಸ್ರೇಲ್ ವಿರುದ್ಧ ತನಗೆ “ವಿಜಯ” ಸಿಕ್ಕಿರುವುದಾಗಿ ಘೋಷಿಸಿಕೊಂಡಿದೆ. ವರದಿಗಳ ಪ್ರಕಾರ, ಸಂಘರ್ಷ ನಿರತ ಉಭಯ ದೇಶಗಳು ಮುಂಬರುವ ಶುಕ್ರವಾರ (ಜೂನ್ 19) ಬಹುನಿರೀಕ್ಷಿತ ಶಾಂತಿ ಒಪ್ಪಂದಕ್ಕೆ ಸಹಿ ಹಾಕಲಿವೆ.
ಇರಾನ್ನ ಸರ್ಕಾರಿ ದೂರದರ್ಶನದಲ್ಲಿ ಪ್ರಸಾರವಾದ ಹೇಳಿಕೆಯಲ್ಲಿ, ದೇಶದ ಸಶಸ್ತ್ರ ಪಡೆಗಳು ತಮ್ಮ ಶತ್ರುಗಳನ್ನು ಸೋಲನ್ನು ಒಪ್ಪಿಕೊಳ್ಳುವಂತೆ ಮಾಡಿರುವುದಾಗಿ ತಿಳಿಸಿವೆ. “ಇರಾನ್ ಪಡೆಗಳು, ಅವಮಾನಕ್ಕೊಳಗಾದ ಅಮೆರಿಕ ಮತ್ತು ಜಿಯೋನಿಸ್ಟ್ (ಇಸ್ರೇಲ್) ಶತ್ರುಗಳ ಮೇಲೆ ತಮ್ಮ ದೈವಿಕ ಹಾಗೂ ಉಕ್ಕಿನಂತಹ ಇಚ್ಛಾಶಕ್ತಿಯನ್ನು ಹೇರುವ ಮೂಲಕ, ಶತ್ರುಗಳಿಗೆ ಸೋಲು ಮತ್ತು ಶರಣಾಗತಿಯನ್ನು ಒಪ್ಪಿಕೊಳ್ಳುವುದನ್ನು ಬಿಟ್ಟು ಬೇರೆ ಯಾವುದೇ ಮಾರ್ಗವಿಲ್ಲ ಎಂಬುದನ್ನು ಬಲಶಾಲಿಯಾಗಿ ತೋರಿಸಿಕೊಟ್ಟಿವೆ” ಎಂದು ಇರಾನ್ ಮಿಲಿಟರಿಯ ಜನರಲ್ ಸ್ಟಾಫ್ ಹೇಳಿದೆ.
ಸಂಘರ್ಷಕ್ಕೆ ‘ತಕ್ಷಣದ ಮತ್ತು ಶಾಶ್ವತ’ ಅಂತ್ಯ ಹಾಡಲು ಯುಎಸ್, ಇರಾನ್ ಸಮ್ಮತಿ
ಲೆಬನಾನ್ ಸೇರಿದಂತೆ ಇಡೀ ಪ್ರದೇಶದಲ್ಲಿ ಮಿಲಿಟರಿ ಕಾರ್ಯಾಚರಣೆಗಳನ್ನು “ತಕ್ಷಣವೇ ಮತ್ತು ಶಾಶ್ವತವಾಗಿ” ಕೊನೆಗೊಳಿಸುವ ಶಾಂತಿ ಒಪ್ಪಂದವನ್ನು ಅಮೆರಿಕ ಮತ್ತು ಇರಾನ್ ಖಚಿತಪಡಿಸಿದ ಬೆನ್ನಲ್ಲೇ ಈ ಹೇಳಿಕೆ ಹೊರಬಿದ್ದಿದೆ.
ಉಭಯ ದೇಶಗಳ ನಡುವೆ ಮಾತುಕತೆಯ ಮಧ್ಯಸ್ಥಿಕೆ ವಹಿಸಿದ್ದ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಶರೀಫ್ ಈ ಮಹತ್ವದ ಬೆಳವಣಿಗೆಯನ್ನು ಪ್ರಕಟಿಸಿದ್ದಾರೆ. ಜೂನ್ 19 ರಂದು ಸ್ವಿಟ್ಜರ್ಲೆಂಡ್ನಲ್ಲಿ ಈ ಒಪ್ಪಂದಕ್ಕೆ ಅಧಿಕೃತವಾಗಿ ಸಹಿ ಹಾಕಲಾಗುವುದು ಎಂದು ಶರೀಫ್ ತಿಳಿಸಿದ್ದಾರೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂಡ ಈ ಒಪ್ಪಂದವನ್ನು ಖಚಿತಪಡಿಸಿದ್ದು, ಇದು ಸಂಪೂರ್ಣವಾಗಿದೆ ಎಂದು ಬಣ್ಣಿಸಿದ್ದಾರೆ. ಅಲ್ಲದೆ ಇರಾನ್ ಮೇಲಿನ ಅಮೆರಿಕ ನೌಕಾಪಡೆಯ ದಿಗ್ಬಂಧನವನ್ನು ತಕ್ಷಣವೇ ಹಿಂಪಡೆಯಲು ಆದೇಶಿಸಿದ್ದಾರೆ.
”ನಾನು ಇಂದಿನಿಂದ ಹೊರ್ಮುಜ್ ಜಲಸಂಧಿಯನ್ನು ಯಾವುದೇ ಸುಂಕವಿಲ್ಲದೆ ಮುಕ್ತಗೊಳಿಸಲು ಪೂರ್ಣ ಅಧಿಕಾರ ನೀಡುತ್ತಿದ್ದೇನೆ ಮತ್ತು ಇದರೊಂದಿಗೆ ತಕ್ಷಣವೇ ಜಾರಿಗೆ ಬರುವಂತೆ ಅಮೆರಿಕ ನೌಕಾಪಡೆಯ ದಿಗ್ಬಂಧನವನ್ನು ಹಿಂಪಡೆಯಲು ಆದೇಶಿಸುತ್ತಿದ್ದೇನೆ” ಎಂದು ಟ್ರಂಪ್ ಬರೆದುಕೊಂಡಿದ್ದಾರೆ.
ಮತ್ತೊಂದು ಪೋಸ್ಟ್ನಲ್ಲಿ ಟ್ರಂಪ್, “ಈ ಮಹಾನ್ ಒಪ್ಪಂದವು ಇಡೀ ಪ್ರದೇಶಕ್ಕೆ ಶಾಂತಿ ಮತ್ತು ಭದ್ರತೆಯನ್ನು ತರಲಿದೆ” ಎಂದು ಉಲ್ಲೇಖಿಸಿದ್ದಾರೆ. ತಮಗೆ ತಾವೇ ಬೆನ್ನುತಟ್ಟಿಕೊಳ್ಳುತ್ತಾ, “ನನಗಿಂತ ಮುಂಚೆ ಹಲವು ಅಧ್ಯಕ್ಷರು ಇರಾನ್ ಜೊತೆ ಶಾಂತಿ ಸ್ಥಾಪಿಸಲು ಪ್ರಯತ್ನಿಸಿದರು, ಆದರೆ ಅವರೆಲ್ಲರೂ ವಿಫಲರಾದರು. ಪ್ರಾದೇಶಿಕ ನಾಯಕರಿಗೆ, ತಮಗೆ ನಿಜವಾದ ಶಾಂತಿಯನ್ನು ಸಾಧಿಸಲು ಸಹಾಯ ಮಾಡಬಲ್ಲ ಅಧ್ಯಕ್ಷರೊಬ್ಬರು ಮೊದಲ ಬಾರಿಗೆ ಸಿಕ್ಕಿದ್ದಾರೆ” ಎಂದು ಸೇರಿಸಿದ್ದಾರೆ.
