ವಾಷಿಂಗ್ಟನ್: ಅಮೆರಿಕದಲ್ಲಿ ವಾಸಿಸುತ್ತಿರುವ ಲಕ್ಷಾಂತರ ವಿದೇಶಿ ವೃತ್ತಿಪರರು, ವಿಶೇಷವಾಗಿ ದಶಕಗಳಿಂದ ಗ್ರೀನ್ ಕಾರ್ಡ್ಗಾಗಿ ಕಾಯುತ್ತಿರುವ ಭಾರತೀಯ ಐಟಿ ಉದ್ಯೋಗಿಗಳಲ್ಲಿ ಟ್ರಂಪ್ ಸರ್ಕಾರದ ವಲಸೆ ನೀತಿಯು ಭಾರಿ ಆತಂಕ ಮತ್ತು ಅನಿಶ್ಚಿತತೆಯನ್ನು ಸೃಷ್ಟಿಸಿದೆ. ತಾತ್ಕಾಲಿಕ ವೀಸಾಗಳ ಮೇಲೆ ಅಮೆರಿಕದಲ್ಲಿರುವ ವಿದೇಶಿಗರು ಗ್ರೀನ್ ಕಾರ್ಡ್ ಪಡೆಯಲು ಇನ್ಮುಂದೆ ಅಮೆರಿಕದಲ್ಲೇ ಉಳಿದುಕೊಳ್ಳುವಂತಿಲ್ಲ, ಬದಲಿಗೆ ತಮ್ಮ ತಾಯ್ನಾಡಿಗೆ ಮರಳಿ ಯುಎಸ್ ರಾಯಭಾರ ಕಚೇರಿಗಳ ಮೂಲಕವೇ ಪ್ರಕ್ರಿಯೆ ಮುಗಿಸಬೇಕು ಎಂದು ಯುಎಸ್ ಸಿಟಿಜನ್ಶಿಪ್ ಅಂಡ್ ಇಮಿಗ್ರೇಷನ್ ಸರ್ವೀಸಸ್ (USCIS) ಶುಕ್ರವಾರ ಹೊಸ ನೀತಿ ಜ್ಞಾಪನಾ ಪತ್ರ (Policy Memo) ಹೊರಡಿಸಿದೆ.
12 ಲಕ್ಷ ಭಾರತೀಯ ಕುಟುಂಬಗಳು ಸಂಕಷ್ಟಕ್ಕೆ!
ಅಮೆರಿಕದ ಅಧ್ಯಕ್ಷ ಜೋ ಬೈಡನ್ ಅವರ ಮಾಜಿ ಶ್ವೇತಭವನದ ಸಲಹೆಗಾರ ಹಾಗೂ ವಲಸೆ ಪರ ಹೋರಾಟಗಾರ ಅಜಯ್ ಭುಟೋರಿಯಾ ಅವರ ಪ್ರಕಾರ, ಈ ಹೊಸ ನಿರ್ಧಾರದಿಂದಾಗಿ ಸುಮಾರು 1.2 ಮಿಲಿಯನ್ (12 ಲಕ್ಷ) ಭಾರತೀಯ-ಅಮೆರಿಕನ್ ಕುಟುಂಬಗಳ ಭವಿಷ್ಯ ತೂಗುಯ್ಯಾಲೆಯಲ್ಲಿ ಸಿಲುಕಲಿದೆ. “ದಶಕಗಳಿಂದ ಎಲ್ಲಾ ಕಾನೂನುಗಳನ್ನು ಪಾಲಿಸಿ, ಪ್ರಾಮಾಣಿಕವಾಗಿ ತೆರಿಗೆ ಪಾವತಿಸಿ, ಕಾನೂನುಬದ್ಧವಾಗಿ ಕಾಯುತ್ತಿದ್ದ 12 ಲಕ್ಷ ಭಾರತೀಯ ಅಮೆರಿಕನ್ನರನ್ನು ಈ ನಿರ್ಧಾರವು ದಿಕ್ಕುತೋಚದಂತೆ ಮಾಡಿದೆ” ಎಂದು ಭುಟೋರಿಯಾ ಕಳವಳ ವ್ಯಕ್ತಪಡಿಸಿದ್ದಾರೆ.
ಅರ್ಜಿದಾರರು ಎಲ್ಲಾ ಕಾನೂನು ಅಗತ್ಯತೆಗಳನ್ನು ಪೂರೈಸಿದ್ದರೂ ಸಹ, ಅವರ ದೇಶೀಯ ಐ-೪೮೫ (I-485) ಅರ್ಜಿಗಳನ್ನು ತಿರಸ್ಕರಿಸಲು ಈ ಹೊಸ ನೀತಿಯು ವಲಸೆ ಅಧಿಕಾರಿಗಳಿಗೆ ‘ಅನಿಯಂತ್ರಿತ ವಿವೇಚನಾ ಅಧಿಕಾರ’ವನ್ನು ನೀಡುತ್ತದೆ. ಕೇವಲ ಕಾನೂನುಬದ್ಧ ಅರ್ಹತೆಗಳನ್ನು ಹೊಂದಿರುವುದು ಇನ್ಮುಂದೆ ಗ್ರೀನ್ ಕಾರ್ಡ್ ಪಡೆಯಲು ಸಾಕಾಗುವುದಿಲ್ಲ ಎಂಬುದು ಅತ್ಯಂತ ಆಘಾತಕಾರಿ ವಿಷಯವಾಗಿದೆ ಎಂದು ಅವರು ವಿವರಿಸಿದ್ದಾರೆ.
ಹೆಚ್-೧ಬಿ ಸೇರಿದಂತೆ ಎಲ್ಲಾ ಪ್ರಮುಖ ವೀಸಾಗಳಿಗೆ ಕಂಟಕ
ಈ ಹೊಸ ನೀತಿಯು ಉದ್ಯೋಗ ಆಧಾರಿತ ವಲಸೆ ಮಾರ್ಗಗಳನ್ನೇ ನೇರವಾಗಿ ಗುರಿಯಾಗಿಸಿಕೊಂಡಿದೆ. ಹೆಚ್-೧ಬಿ (H-1B), ಹೆಚ್-೪ (H-4), ಎಲ್-೧ (L-1), ಎಲ್-೨ (L-2), ಬಿ-೧ (B-1) ಮತ್ತು ಬಿ-೨ (B-2) ವೀಸಾ ಹೊಂದಿರುವವರು ಇನ್ಮುಂದೆ ತೀವ್ರ ತಪಾಸಣೆಗೆ ಒಳಗಾಗಬೇಕಾಗುತ್ತದೆ. ಈ ವೀಸಾಗಳು ಕಾನೂನುಬದ್ಧವಾಗಿ ‘ದ್ವಿ-ಉದ್ದೇಶ’ (Dual-Intent) ಹೊಂದಿದ್ದರೂ ಸಹ, ಕೇವಲ ಅಮೆರಿಕದಲ್ಲಿ ವೀಸಾ ಸ್ಥಿತಿಯನ್ನು ಕಾಯ್ದುಕೊಂಡಿರುವುದು ಮಾತ್ರವೇ ಇನ್ಮುಂದೆ ಗ್ರೀನ್ ಕಾರ್ಡ್ಗೆ ಅರ್ಹತೆಯಾಗುವುದಿಲ್ಲ ಎಂದು ಯುಎಸ್ಸಿಐಎಸ್ ಸ್ಪಷ್ಟಪಡಿಸಿದೆ. ಅರ್ಜಿ ಪರಿಶೀಲಿಸುವ ಅಧಿಕಾರಿಗಳು ಇನ್ಮುಂದೆ ಅರ್ಜಿದಾರರ ಸಂಪೂರ್ಣ ವಲಸೆ ಇತಿಹಾಸವನ್ನು ಜಾಲಾಡಲಿದ್ದು, ಈ ಹಿಂದೆ ಆಗಿರುವ ಸಣ್ಣಪುಟ್ಟ ವೀಸಾ ಅವಧಿಯ ವ್ಯತ್ಯಾಸಗಳು ಅಥವಾ ಅನಧಿಕೃತ ಕೆಲಸಗಳ ಸಣ್ಣ ತಪ್ಪುಗಳಿಗೂ ಗ್ರೀನ್ ಕಾರ್ಡ್ ಅರ್ಜಿಗಳನ್ನು ತಿರಸ್ಕರಿಸಿ, ಅಮೆರಿಕದಿಂದ ಹೊರಗೆ ಕಳುಹಿಸಬಹುದಾಗಿದೆ.
ತೀವ್ರ ಆಕ್ರೋಶದ ಬೆನ್ನಲ್ಲೇ ನಿಯಮ ಸಡಿಲಿಸಿದ ಅಮೆರಿಕ!
ಈ ಕಠಿಣ ನಿಯಮ ಪ್ರಕಟವಾಗಿ ಇಡೀ ಜಾಗತಿಕ ವೃತ್ತಿಪರ ವಲಯದಲ್ಲಿ ಭಾರಿ ಆಕ್ರೋಶ ಮತ್ತು ಆತಂಕ ವ್ಯಕ್ತವಾದ ಬೆನ್ನಲ್ಲೇ, ಅಮೆರಿಕ ಸರ್ಕಾರವು ಕೆಲವೇ ಗಂಟೆಗಳಲ್ಲಿ ತನ್ನ ನಿಯಮದಿಂದ ಭಾಗಶಃ ಹಿಂದೆ ಸರಿದಿದ್ದು, ವಲಸಿಗರಿಗೆ ಸಣ್ಣ ಸಮಾಧಾನ ತಂದಿದೆ. ತೀವ್ರ ಟೀಕೆಗಳ ನಂತರ ಎಚ್ಚೆತ್ತ ಯುಎಸ್ಸಿಐಎಸ್, ತನ್ನ ಕಠಿಣ ನಿಯಮಕ್ಕೆ ಎರಡು ಪ್ರಮುಖ ವಿನಾಯಿತಿಗಳನ್ನು (Exceptions) ಸೇರ್ಪಡೆಗೊಳಿಸಿದೆ. ಅವುಗಳೆಂದರೆ: ‘ಆರ್ಥಿಕ ಲಾಭ’ (Economic Benefit) ಮತ್ತು ‘ರಾಷ್ಟ್ರೀಯ ಹಿತಾಸಕ್ತಿ’ (National Interest).
ಈ ಕುರಿತು ಯುಎಸ್ಸಿಐಎಸ್ ವಕ್ತಾರ ಜಾಕ್ ಕಾಹ್ಲರ್ ನೀಡಿರುವ ಹೇಳಿಕೆಯಲ್ಲಿ, “ಅಡ್ಜಸ್ಟ್ಮೆಂಟ್ ಆಫ್ ಸ್ಟೇಟಸ್ ಪ್ರಕ್ರಿಯೆಯಲ್ಲಿ ಕಾಂಗ್ರೆಸ್ನ ಮೂಲ ಆಶಯವನ್ನು ಕೇವಲ ನೆನಪಿಸುವ ಕೆಲಸವನ್ನು ನಾವು ಮಾಡುತ್ತಿದ್ದೇವೆ. ಇದರ ಅನುಷ್ಠಾನದ ನಡುವೆಯೂ, ಯಾರ ಅರ್ಜಿಗಳು ಅಮೆರಿಕಕ್ಕೆ ಆರ್ಥಿಕ ಲಾಭವನ್ನು ತರಲಿವೆಯೋ ಅಥವಾ ರಾಷ್ಟ್ರೀಯ ಹಿತಾಸಕ್ತಿಗೆ ಪೂರಕವಾಗಿವೆಯೋ ಅಂತಹ ವ್ಯಕ್ತಿಗಳು ಪ್ರಸ್ತುತ ಇರುವ ನಿಯಮದಂತೆಯೇ ಅಮೆರಿಕದಲ್ಲೇ ಇದ್ದು ಪ್ರಕ್ರಿಯೆ ಮುಂದುವರಿಸಬಹುದು. ಉಳಿದವರನ್ನು ಅವರ ವೈಯಕ್ತಿಕ ಸಂದರ್ಭಗಳ ಆಧಾರದ ಮೇಲೆ ವಿದೇಶದಿಂದ ಅರ್ಜಿ ಸಲ್ಲಿಸುವಂತೆ ಕೇಳಬಹುದು” ಎಂದು ತಿಳಿಸಿದ್ದಾರೆ.
ಮುಂದುವರಿದ ಗೊಂದಲ
ಸರ್ಕಾರವು ಎರಡು ವಿನಾಯಿತಿಗಳನ್ನು ಘೋಷಿಸಿ ಸಮಾಧಾನ ಮಾಡಲು ಯತ್ನಿಸಿದ್ದರೂ, ಈ ‘ಆರ್ಥಿಕ ಲಾಭ’ ಮತ್ತು ‘ರಾಷ್ಟ್ರೀಯ ಹಿತಾಸಕ್ತಿ’ ಎಂಬ ಪದಗಳಿಗೆ ನಿಖರವಾದ ವ್ಯಾಖ್ಯಾನವನ್ನು ನೀಡಿಲ್ಲ. ಯಾರಿಗೆ ಈ ವಿನಾಯಿತಿ ಅನ್ವಯಿಸುತ್ತದೆ ಮತ್ತು ಯಾರಿಗೆ ಅನ್ವಯಿಸುವುದಿಲ್ಲ ಎಂಬ ಬಗ್ಗೆ ಅಮೆರಿಕದ ಅಧಿಕಾರಿಗಳು ಇನ್ನು ಯಾವುದೇ ಸ್ಪಷ್ಟ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡದ ಕಾರಣ ಭಾರತೀಯ ಉದ್ಯೋಗಿಗಳಲ್ಲಿ ಗೊಂದಲ ಮತ್ತು ಆತಂಕ ಇನ್ನು ಯಥಾವತ್ತಾಗಿ ಮುಂದುವರಿದಿದೆ.
