ಕನಕಪುರ: ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಪತಿಯೊಬ್ಬ ಸಾರ್ವಜನಿಕ ಸ್ಥಳದಲ್ಲೇ ಪತ್ನಿಯ ಮೇಲೆ ಭೀಕರವಾಗಿ ಚಾಕುವಿನಿಂದ ಇರಿದು ಕೊಲೆಗೆ ಯತ್ನಿಸಿ, ಬಳಿಕ ಗ್ರಾಮಸ್ಥರು ಕೂಡಿಹಾಕಿದ್ದ ಕೋಣೆಯಲ್ಲೇ ತನಗೂ ಚಾಕು ಇರಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಭೀಕರ ಘಟನೆ ತಾಲೂಕಿನ ಅಚ್ಚಲು ಗ್ರಾಮದಲ್ಲಿ ಜರುಗಿದೆ.
ಸಂಜಯ್ (34) ಮೃತಪಟ್ಟ ದುರ್ದೈವಿ ಪತಿ. ಪತಿಯ ಚಾಕು ಇರಿತದಿಂದ ತೀವ್ರವಾಗಿ ಗಾಯಗೊಂಡಿರುವ ಪತ್ನಿ ನಿಸರ್ಗ (24) ಸದ್ಯ ಆಸ್ಪತ್ರೆಯಲ್ಲಿ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದಾರೆ.
ಸೈಬರ್ ಸೆಂಟರ್ ಬಳಿಯೇ ಪತ್ನಿ ಮೇಲೆ ಅಟ್ಯಾಕ್!
ಪತಿ ಸಂಜಯ್ ಹಾಗೂ ಪತ್ನಿ ನಿಸರ್ಗ ನಡುವೆ ಕಳೆದ ಕೆಲವು ದಿನಗಳಿಂದ ಕೌಟುಂಬಿಕ ವಿಚಾರವಾಗಿ ತೀವ್ರ ಜಗಳ ನಡೆಯುತ್ತಿತ್ತು ಎನ್ನಲಾಗಿದೆ. ಇದೇ ಸಿಟ್ಟಿನಲ್ಲಿ ಬುಧವಾರ ಪತ್ನಿ ನಿಸರ್ಗ ಕೆಲಸ ಮಾಡುತ್ತಿದ್ದ ಅಚ್ಚಲು ಗ್ರಾಮದ ಸೈಬರ್ ಸೆಂಟರ್ ಬಳಿಗೆ ಸಂಜಯ್ ತೆರಳಿದ್ದಾನೆ. ಅಲ್ಲಿ ಇಬ್ಬರ ನಡುವೆ ಮತ್ತೆ ಮಾತಿನ ಚಕಮಕಿ ನಡೆದಿದ್ದು, ಕೋಪೋದ್ರಿಕ್ತನಾದ ಸಂಜಯ್ ತಾನು ತಂದಿದ್ದ ಚಾಕುವಿನಿಂದ ಪತ್ನಿಯ ಮೇಲೆ ಮನಬಂದಂತೆ ಇರಿದು ಕೊಲೆ ಮಾಡಲು ಯತ್ನಿಸಿದ್ದಾನೆ.
ಗ್ರಾಮಸ್ಥರಿಂದ ಪತ್ನಿಯ ರಕ್ಷಣೆ, ಹಂತಕ ಪತಿ ರೂಮಿನಲ್ಲಿ ಲಾಕ್!
ನಿಸರ್ಗಳ ಕಿರುಚಾಟ ಕೇಳಿ ತಕ್ಷಣವೇ ಧಾವಿಸಿದ ಗ್ರಾಮಸ್ಥರು, ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಆಕೆಯನ್ನು ಸಂಜಯ್ನ ಕರಾಳ ಹಸ್ತದಿಂದ ರಕ್ಷಿಸಿದ್ದಾರೆ. ತಕ್ಷಣವೇ ಆಕೆಯನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸುವ ವ್ಯವಸ್ಥೆ ಮಾಡಿದ್ದಾರೆ.
ಇದೇ ವೇಳೆ, ಕೃತ್ಯ ಎಸಗಿ ತಪ್ಪಿಸಿಕೊಳ್ಳಲು ಯತ್ನಿಸುತ್ತಿದ್ದ ಪತಿ ಸಂಜಯ್ನನ್ನು ಹಿಡಿದು ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಂಡ ಗ್ರಾಮಸ್ಥರು, ಪೊಲೀಸರಿಗೆ ಮಾಹಿತಿ ನೀಡಿ ಆತನನ್ನು ಗ್ರಾಮದ ಒಂದು ಕೋಣೆಯಲ್ಲಿ (ರೂಮ್) ಹಾಕಿ ಹೊರಗಿನಿಂದ ಲಾಕ್ ಮಾಡಿದ್ದಾರೆ.
ಕೋಣೆಯ ಒಳಗೇ ಮುಗಿಯಿತು ಹಂತಕನ ಕಥೆ!
ಗ್ರಾಮಸ್ಥರು ಕೋಣೆಯ ಹೊರಗೆ ಪೊಲೀಸರ ಆಗಮನಕ್ಕಾಗಿ ಕಾಯುತ್ತಿದ್ದರು. ಆದರೆ ಒಳಗಿದ್ದ ಸಂಜಯ್ ತಾನು ಮಾಡಿದ ತಪ್ಪಿನ ಅರಿವಿನಿಂದಲೋ ಅಥವಾ ಪೊಲೀಸರ ಭೀತಿಯಿಂದಲೋ, ತಾನು ಪತ್ನಿಗೆ ಇರಿಯಲು ಬಳಸಿದ್ದ ಅದೇ ಚಾಕುವಿನಿಂದ ತನಗೆ ತಾನೇ ಗಂಭೀರವಾಗಿ ಇರಿದುಕೊಂಡಿದ್ದಾನೆ.
ಗ್ರಾಮಸ್ಥರು ಬಾಗಿಲು ತೆರೆದು ನೋಡುವಷ್ಟರಲ್ಲೇ ತೀವ್ರ ರಕ್ತಸ್ರಾವದಿಂದಾಗಿ ಸಂಜಯ್ ಕೋಣೆಯ ಒಳಗೇ ಕೊನೆಯುಸಿರೆಳೆದಿದ್ದ.
ಮಾಹಿತಿ ತಿಳಿಯುತ್ತಿದ್ದಂತೆ ಘಟನಾ ಸ್ಥಳಕ್ಕೆ ಧಾವಿಸಿದ ಕನಕಪುರ ಗ್ರಾಮಾಂತರ ಪೊಲೀಸರು ಮೃತದೇಹವನ್ನು ವಶಕ್ಕೆ ಪಡೆದು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದಾರೆ. ಈ ಘಟನೆಗೆ ಸಂಬಂಧಿಸಿದಂತೆ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಮುಂದಿನ ತನಿಖೆ ಕೈಗೊಂಡಿದ್ದಾರೆ. ಸಂಸಾರದ ಜಗಳ ಇಬ್ಬರ ಬದುಕನ್ನು ಬೀದಿಪಾಲು ಮಾಡಿರುವುದಕ್ಕೆ ಗ್ರಾಮಸ್ಥರು ತೀವ್ರ ವಿಷಾದ ವ್ಯಕ್ತಪಡಿಸಿದ್ದಾರೆ.
