ನವದೆಹಲಿ: ಕಾಂಬೋಡಿಯಾಕ್ಕೆ ಪ್ರವಾಸ ಹೋಗುವ ಭಾರತೀಯ ಪ್ರವಾಸಿಗರಿಗೆ ಇನ್ಮುಂದೆ ಹಣದ ಮುಗ್ಗಟ್ಟು ಅಥವಾ ಕರೆನ್ಸಿ ವಿನಿಮಯದ ಚಿಂತೆ ಇರುವುದಿಲ್ಲ. ಭಾರತದ ಡಿಜಿಟಲ್ ಪಾವತಿ ವ್ಯವಸ್ಥೆಯಾದ ಯುಪಿಐ (UPI) ಇದೀಗ ಕಾಂಬೋಡಿಯಾದಲ್ಲೂ ಲಭ್ಯವಾಗಿದ್ದು, ವಿದೇಶಗಳಲ್ಲಿ ಭಾರತದ ಡಿಜಿಟಲ್ ನೆಟ್ವರ್ಕ್ ವಿಸ್ತರಣೆಯಾಗುತ್ತಿರುವ ಮತ್ತೊಂದು ಮೈಲಿಗಲ್ಲಾಗಿದೆ.
ಭಾರತದ ‘ಎನ್ಪಿಸಿಐ ಇಂಟರ್ನ್ಯಾಷನಲ್ ಪೇಮೆಂಟ್ಸ್ ಲಿಮಿಟೆಡ್’ (NIPL) ಮತ್ತು ಕಾಂಬೋಡಿಯಾದ ‘ಅಕ್ಲೆಡಾ ಬ್ಯಾಂಕ್’ (ACLEDA Bank Plc) ಸಹಯೋಗದೊಂದಿಗೆ ಈ ಅಂತರಾಷ್ಟ್ರೀಯ ಪಾವತಿ ಸೌಲಭ್ಯ ಜಾರಿಗೆ ಬಂದಿದೆ. ಕಾಂಬೋಡಿಯಾದ ‘KHQR’ ವ್ಯವಸ್ಥೆಯನ್ನು ಭಾರತದ ಯುಪಿಐ ನೆಟ್ವರ್ಕ್ನೊಂದಿಗೆ ಜೋಡಿಸಲಾಗಿದ್ದು, ಇದರಿಂದ ಎರಡೂ ದೇಶಗಳ ನಡುವೆ ಡಿಜಿಟಲ್ ವಹಿವಾಟು ಸುಗಮವಾಗಲಿದೆ.
ಭಾರತೀಯರು ಕಾಂಬೋಡಿಯಾದ ಅಂಗಡಿಗಳಲ್ಲಿರುವ KHQR ಕೋಡ್ ಅನ್ನು ತಮ್ಮ ಯುಪಿಐ ಆ್ಯಪ್ ಮೂಲಕ ಸ್ಕ್ಯಾನ್ ಮಾಡುವ ಮೂಲಕ ಪಾವತಿ ಮಾಡಬಹುದು. ನೀವು ಭಾರತದಲ್ಲಿ ಹೇಗೆ ಯುಪಿಐ ಬಳಸಿ ಹಣ ಪಾವತಿಸುತ್ತೀರೋ, ಅದೇ ರೀತಿಯಲ್ಲಿ ಸ್ಕ್ಯಾನ್ ಮಾಡಿ, ಮೊತ್ತವನ್ನು ನಮೂದಿಸಿ ಮತ್ತು ಯುಪಿಐ ಪಿನ್ (UPI PIN) ಹಾಕುವ ಮೂಲಕ ವಹಿವಾಟು ಪೂರ್ಣಗೊಳಿಸಬಹುದು.
ಕಾಂಬೋಡಿಯಾದಾದ್ಯಂತ ಸುಮಾರು 40 ಲಕ್ಷಕ್ಕೂ ಹೆಚ್ಚು ಮಳಿಗೆಗಳಲ್ಲಿ ಈ ಸೌಲಭ್ಯ ಲಭ್ಯವಿರುತ್ತದೆ. ಪ್ರಮುಖ ಪ್ರವಾಸಿ ತಾಣಗಳಾದ ಫ್ನೋಮ್ ಪೆನ್ (Phnom Penh), ಸಿಯೆಮ್ ರೀಪ್ (Siem Reap) ಮತ್ತು ಸಿಹಾನೌಕ್ವಿಲ್ಲೆ (Sihanoukville) ಸೇರಿದಂತೆ ಹೋಟೆಲ್ಗಳು, ರೆಸ್ಟೋರೆಂಟ್ಗಳು, ಟ್ಯಾಕ್ಸಿ ಸೇವೆಗಳು ಮತ್ತು ಶಾಪಿಂಗ್ ಮಾಲ್ಗಳಲ್ಲಿ ಭಾರತೀಯ ಪ್ರವಾಸಿಗರು ಸುಲಭವಾಗಿ ಪಾವತಿ ಮಾಡಬಹುದು.
ನಗದು ಭೀತಿ ಇಲ್ಲ: ಹೆಚ್ಚಿನ ನಗದು ಹಣವನ್ನು ಜೇಬಿನಲ್ಲಿ ಕೊಂಡೊಯ್ಯುವ ಅಗತ್ಯವಿಲ್ಲ.
ಕಾರ್ಡ್ಗಳ ಮೇಲಿನ ಅವಲಂಬನೆ ತಗ್ಗಲಿದೆ: ವಿದೇಶಿ ಬ್ಯಾಂಕ್ ಕಾರ್ಡ್ಗಳು ಕೆಲಸ ಮಾಡದಿರುವ ಸಮಸ್ಯೆ ಅಥವಾ ಹೆಚ್ಚುವರಿ ಶುಲ್ಕಗಳಿಂದ ಮುಕ್ತಿ ಸಿಗುತ್ತದೆ.
ತ್ವರಿತ ದೃಢೀಕರಣ: ಪಾವತಿ ಮಾಡಿದ ತಕ್ಷಣವೇ ನಿಮಗೆ ದೃಢೀಕರಣ (Confirmation) ಸಂದೇಶ ಸಿಗುತ್ತದೆ.
ನೇರ ಖಾತೆ ಪಾವತಿ: ಹಣವು ನಿಮ್ಮ ಬ್ಯಾಂಕ್ ಖಾತೆಯಿಂದ ನೇರವಾಗಿ ಕಡಿತವಾಗುತ್ತದೆ.
ಕರೆನ್ಸಿ ವಿನಿಮಯದ ಸಮಸ್ಯೆ ಕಡಿಮೆ: ಕರೆನ್ಸಿ ಬದಲಾವಣೆಯ ಜಂಜಾಟ ಮತ್ತು ಅದರಿಂದಾಗುವ ನಷ್ಟ ತಪ್ಪುತ್ತದೆ.
ಎಲ್ಲಾ ರೀತಿಯ ವಹಿವಾಟು: ಸಣ್ಣ ಮೊತ್ತದಿಂದ ಹಿಡಿದು ದೊಡ್ಡ ಮೊತ್ತದವರೆಗೆ ಯಾವುದೇ ಅಡೆತಡೆಯಿಲ್ಲದೆ ಪಾವತಿಸಬಹುದು.
