ನವದೆಹಲಿ : ಮನೆಯಲ್ಲಿ ಗಂಡ-ಹೆಂಡತಿ ಜಗಳ ಆಡುವಾಗ ಮೂಕಪ್ರೇಕ್ಷಕರಾಗಿ ನಿಂತಿದ್ದಕ್ಕೆ ಅಥವಾ ಸೊಸೆಯ ಪರವಾಗಿ ಮಾತನಾಡಲಿಲ್ಲ ಎಂಬ ಕಾರಣಕ್ಕೆ ಅತ್ತೆ-ಮಾವಂದಿರನ್ನು ಅಪರಾಧಿಗಳು ಎಂದು ಬಿಂಬಿಸಲು ಸಾಧ್ಯವಿಲ್ಲ ಎಂದು ಸುಪ್ರೀಂಕೋರ್ಟ್ ಐತಿಹಾಸಿಕ ತೀರ್ಪು ನೀಡಿದೆ.
ಕೇವಲ ಮೌನವಾಗಿದ್ದರು ಎಂಬ ಒಂದೇ ಕಾರಣಕ್ಕೆ ಅವರ ಮೇಲೆ ವರದಕ್ಷಿಣೆ ಕಿರುಕುಳ ಅಥವಾ ಕ್ರೌರ್ಯದ ಕೇಸ್ ದಾಖಲಿಸುವುದು ಕಾನೂನುಬದ್ಧವಾಗಿ ಸರಿಯಲ್ಲ ಎಂದು ದೇಶದ ಅತ್ಯುನ್ನತ ನ್ಯಾಯಾಲಯ ಸ್ಪಷ್ಟಪಡಿಸಿದೆ.
ನೈತಿಕವಾಗಿ ತಪ್ಪಿರಬಹುದು, ಆದರೆ ಕ್ರಿಮಿನಲ್ ಅಪರಾಧವಲ್ಲ!
ನ್ಯಾಯಮೂರ್ತಿಗಳಾದ ಸಂಜಯ್ ಕರೋಲ್ ಹಾಗೂ ಎನ್.ಕೆ. ಸಿಂಗ್ ಅವರನ್ನೊಳಗೊಂಡ ದ್ವಿಸದಸ್ಯ ಪೀಠವು ಈ ಕುರಿತು ಮಹತ್ವದ ಅವಲೋಕನ ಮಾಡಿದೆ. “ದಂಪತಿಗಳ ಕಲಹದ ಸಮಯದಲ್ಲಿ ಹಿರಿಯರು ಸೊಸೆಗೆ ಬೆಂಬಲ ನೀಡದೇ ಇರುವುದು ನೈತಿಕವಾಗಿ ತಪ್ಪು ಎಂದು ಮೇಲ್ನೋಟಕ್ಕೆ ಅನ್ನಿಸಬಹುದು. ಆದರೆ, ಅದನ್ನು ನೇರವಾಗಿ ಕ್ರಿಮಿನಲ್ ಅಪರಾಧ ಎಂದು ಕರೆಯಲು ಬರುವುದಿಲ್ಲ” ಎಂದು ಕೋರ್ಟ್ ಹೇಳಿದೆ. ಯಾವುದೇ ಸೂಕ್ತ ಆಧಾರಗಳಿಲ್ಲದೆ, ಕೇವಲ ಸಾಮಾನ್ಯ ಆರೋಪಗಳನ್ನು ಮುಂದಿಟ್ಟುಕೊಂಡು ಪತಿಯ ಇಡೀ ಕುಟುಂಬವನ್ನು ಕಾನೂನಿನ ಸುಳಿಗೆ ಸಿಲುಕಿಸುವುದು ಸರಿಯಲ್ಲ ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.
ನ್ಯಾಯಾಲಯದ ಪ್ರಮುಖ ವೀಕ್ಷಣೆ: “ಒಬ್ಬ ವ್ಯಕ್ತಿಯು ಮಹಿಳೆಗೆ ಕಿರುಕುಳ ನೀಡುವಲ್ಲಿ ಅಥವಾ ವರದಕ್ಷಿಣೆ ಬೇಡಿಕೆ ಇಡುವಲ್ಲಿ ನೇರವಾಗಿ ಮತ್ತು ಸಕ್ರಿಯವಾಗಿ ಭಾಗಿಯಾಗಿದ್ದಾನೆ ಎಂಬುದಕ್ಕೆ ಸ್ಪಷ್ಟ ಪುರಾವೆಗಳಿದ್ದರೆ ಮಾತ್ರ ಅವರ ವಿರುದ್ಧ ಕಾನೂನು ಕ್ರಮ ಜರುಗಿಸಬಹುದು.”
ಸೊಸೆಗೆ ಸಪೋರ್ಟ್ ಮಾಡದಿದ್ದರೆ ಅದು ಕೇಸ್ ಆಗಲ್ಲ!
ಕೌಟುಂಬಿಕ ಕಲಹಗಳು ನಡೆದಾಗ ಸಂಬಂಧಿಕರು ಮೌನಕ್ಕೆ ಶರಣಾಗುವುದು ಅಥವಾ ಇಬ್ಬರ ನಡುವೆ ಹೊಂದಾಣಿಕೆ ಮಾಡಿಕೊಳ್ಳಿ ಎಂದು ಬುದ್ಧಿವಾದ ಹೇಳುವುದು ಸಾಮಾನ್ಯ ಸಂಗತಿ. ಇಂತಹ ಸಂದರ್ಭಗಳಲ್ಲಿ, “ಅವರು ನನಗೆ ಸಾಥ್ ಕೊಡಲಿಲ್ಲ, ಗಂಡನ ಜಗಳವನ್ನು ತಡೆಯಲಿಲ್ಲ” ಎಂದು ಮಹಿಳೆ ದೂಷಿಸಿದರೆ, ಅದು ತಾನಾಗಿಯೇ ಕ್ರಿಮಿನಲ್ ಅಪರಾಧವಾಗಿ ಬದಲಾಗುವುದಿಲ್ಲ. ಆರೋಪಿಗಳು ಕಿರುಕುಳದ ಸಂಚಿನಲ್ಲಿ ಭಾಗಿಯಾಗಿರುವ ಬಗ್ಗೆ ಅಥವಾ ನೇರ ಪಾತ್ರ ವಹಿಸಿರುವ ಬಗ್ಗೆ ಖಚಿತ ಸಾಕ್ಷ್ಯಗಳು ಅತ್ಯಗತ್ಯ ಎಂದು ಸುಪ್ರೀಂಕೋರ್ಟ್ ವಿವರಿಸಿದೆ.
ಏನಿದು ಘಟನೆ?
ಮಧ್ಯಪ್ರದೇಶದ ಗುಣಾ (Guna) ಜಿಲ್ಲೆಯ ಮಹಿಳೆಯೊಬ್ಬರು ತಮ್ಮ ಪತಿ ಹಾಗೂ ಅತ್ತೆ-ಮಾವಂದಿರ ವಿರುದ್ಧ ವರದಕ್ಷಿಣೆ ಕಿರುಕುಳದ ದೂರು ದಾಖಲಿಸಿದ್ದರು. ಆದರೆ, ಈ ಪ್ರಕರಣದಲ್ಲಿ ಅತ್ತೆ-ಮಾವಂದಿರ ವಿರುದ್ಧ ಯಾವುದೇ ನಿರ್ದಿಷ್ಟ ಅಥವಾ ನೇರ ಆರೋಪಗಳು ಇರಲಿಲ್ಲ. ಹೀಗಾಗಿ, ಅವರ ಮೇಲಿದ್ದ ಕ್ರಿಮಿನಲ್ ತನಿಖೆ ಹಾಗೂ ವಿಚಾರಣೆಯನ್ನು ಸುಪ್ರೀಂಕೋರ್ಟ್ ಸಂಪೂರ್ಣವಾಗಿ ರದ್ದುಗೊಳಿಸಿದೆ.
ನ್ಯಾಯಾಲಯಗಳಿಗೆ ಸುಪ್ರೀಂಕೋರ್ಟ್ ಕೊಟ್ಟ ಸಂದೇಶವೇನು?
ಭಾವನೆಗಳ ಅತಿಯಾದ ಪ್ರಭಾವ: ಸಂಸಾರದಲ್ಲಿ ಬಿರುಕು ಮೂಡಿದಾಗ ದಂಪತಿಗಳ ನಡುವೆ ತೀವ್ರ ಆಕ್ರೋಶ ಮತ್ತು ಭಾವನಾತ್ಮಕ ಉದ್ವೇಗ ಇರುತ್ತದೆ. ಇಂತಹ ಸಮಯದಲ್ಲಿ ಪತಿಯ ಇಡೀ ಕುಟುಂಬವನ್ನು ದೂರಿನಲ್ಲಿ ಎಳೆದು ತರುವ ಪ್ರವೃತ್ತಿ ಹೆಚ್ಚಾಗಿರುತ್ತದೆ ಎಂಬುದನ್ನು ಕೋರ್ಟ್ ಗುರುತಿಸಿದೆ.
ಎಚ್ಚರಿಕೆಯ ಪರಿಶೀಲನೆ: ಸಂಸಾರ ಮುರಿದುಬಿದ್ದಾಗ ಮಹಿಳೆಯು ಅನುಭವಿಸುವ ಮಾನಸಿಕ ನೋವು ನಿಜವಾಗಿದ್ದರೂ, ಕೌಟುಂಬಿಕ ನ್ಯಾಯಾಲಯಗಳು ಇಂತಹ ಪ್ರಕರಣಗಳನ್ನು ಅತಿ ಹೆಚ್ಚು ಎಚ್ಚರಿಕೆಯಿಂದ ಮತ್ತು ಸೂಕ್ಷ್ಮವಾಗಿ ಪರಿಶೀಲಿಸಬೇಕು.
ಸಾಕ್ಷ್ಯಾಧಾರ ಕಡ್ಡಾಯ: ದೂರಿನಲ್ಲಿ ಕೇವಲ ಹೆಸರು ಉಲ್ಲೇಖಿಸಿದರೆ ಸಾಲದು; ಕ್ರೌರ್ಯ ಮತ್ತು ವರದಕ್ಷಿಣೆ ಪೀಡನೆಯಲ್ಲಿ ಅವರ ನೇರ ಭಾಗಿತ್ವದ ನಿಖರ ಸಾಕ್ಷ್ಯಗಳಿದ್ದರೆ ಮಾತ್ರ ಸಂಬಂಧಿಕರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಗೈಡ್ಲೈನ್ಸ್ ನೀಡಿದೆ.
