ಶಿಯಾನ್ (ಚೀನಾ): ತಾನು ಖರೀದಿಸಿದ ಫ್ಲಾಟ್ ಇರುವ 34ನೇ ಮಹಡಿಯೇ ಅಸ್ತಿತ್ವದಲ್ಲಿಲ್ಲ ಎಂದು ತಿಳಿದಾಗ ಚೀನಾದ ವ್ಯಕ್ತಿಯೊಬ್ಬರು ಕಂಗಾಲಾಗಿದ್ದಾರೆ. ಅಷ್ಟೇ ಅಲ್ಲ, ಕಟ್ಟಡದ ಒಟ್ಟು ಎತ್ತರವೇ 32 ಮಹಡಿ ಎಂದು ತಿಳಿದುಬಂದ ನಂತರ ಅವರು ತಮ್ಮ ಮನೆ ಮತ್ತು ಹಣ ಎರಡನ್ನೂ ಕಳೆದುಕೊಂಡಿದ್ದಾರೆ.
ಶೆನ್ ಎಂಬ ಉಪನಾಮದ ವ್ಯಕ್ತಿ 2013ರಲ್ಲಿ ಚೀನಾದ ಶಾಂಕ್ಸಿ ಪ್ರಾಂತ್ಯದ ಶಿಯಾನ್ ಬಳಿಯ ಹಳ್ಳಿಯೊಂದರಲ್ಲಿ ಈ ಅಪಾರ್ಟ್ಮೆಂಟ್ ಖರೀದಿಸಿದ್ದರು. ‘ಸೌತ್ ಚೈನಾ ಮಾರ್ನಿಂಗ್ ಪೋಸ್ಟ್’ ವರದಿಯ ಪ್ರಕಾರ, ಅವರು ರಿಯಲ್ ಎಸ್ಟೇಟ್ ಹಗರಣದ ಬಲಿಪಶುವಾಗಿದ್ದಾರೆ. ಇವರು ಪ್ರತಿ ಚದರ ಮೀಟರ್ಗೆ 2,646 ಯುವಾನ್ನಂತೆ 90 ಚದರ ಮೀಟರ್ನ ಫ್ಲಾಟ್ ಅನ್ನು ಖರೀದಿಸಿದ್ದರು. ಇದು ಆ ಪ್ರದೇಶದ ಮಾರುಕಟ್ಟೆ ದರದ ಮೂರನೇ ಒಂದು ಭಾಗದಷ್ಟು ಮಾತ್ರ ಇತ್ತು. ಅಗ್ಗದ ಬೆಲೆಗೆ ಕಾರಣವೆಂದರೆ, ಇದು ರಾಜ್ಯದ ಒಡೆತನದ ಭೂಮಿಯ ಬದಲಿಗೆ, ಗ್ರಾಮೀಣ ಭೂಮಿಯಲ್ಲಿ ನಿರ್ಮಿಸಲಾದ ‘ಲಿಮಿಟೆಡ್ ಪ್ರಾಪರ್ಟಿ ರೈಟ್ಸ್’ ಹೊಂದಿರುವ ಅಕ್ರಮ ವಸತಿ ಯೋಜನೆಯಾಗಿತ್ತು. ಇಂತಹ ಆಸ್ತಿಗಳಿಗೆ ಕಾನೂನಿನ ಮಾನ್ಯತೆ ಇರುವುದಿಲ್ಲ.
2013ರಲ್ಲಿ ಶೆನ್ ಸುಮಾರು 1,17,700 ಯುವಾನ್ (ಸುಮಾರು 17,400 ಅಮೆರಿಕನ್ ಡಾಲರ್) ಮುಂಗಡ ಹಣ ಪಾವತಿಸಿದ್ದರು. ಬಿಲ್ಡರ್ ಅಗತ್ಯವಿರುವ ಅನುಮೋದನೆ ಮತ್ತು ಪ್ರಮಾಣಪತ್ರಗಳನ್ನು ನಂತರ ಪಡೆದುಕೊಳ್ಳುವುದಾಗಿ ಭರವಸೆ ನೀಡಿದ್ದರು. ಆದರೆ, ಅಕ್ರಮವಾಗಿ ನಿರ್ಮಿತವಾದ ಇಂತಹ ಯೋಜನೆಗಳಿಗೆ ಕಾನೂನುಬದ್ಧ ದಾಖಲೆಗಳು ದೊರೆಯುವುದು ಅಸಾಧ್ಯವಾಗಿತ್ತು.
ಅಪಾರ್ಟ್ಮೆಂಟ್ ಅನ್ನು 2015ರಲ್ಲಿ ಹಸ್ತಾಂತರಿಸಬೇಕಿತ್ತು, ಆದರೆ ನಿರ್ಮಾಣ ವಿಳಂಬವಾಯಿತು. 2017ರಲ್ಲಿ, ಕಟ್ಟಡದಲ್ಲಿರುವುದು ಕೇವಲ 32 ಮಹಡಿಗಳು ಮಾತ್ರ, ಹಾಗಾಗಿ 34ನೇ ಮಹಡಿಯಲ್ಲಿ ಫ್ಲಾಟ್ ನೀಡುವುದು ಅಸಾಧ್ಯ ಎಂದು ಬಿಲ್ಡರ್ ತಿಳಿಸಿದರು. ನಂತರ 32ನೇ ಮಹಡಿಯಲ್ಲಿ ಪರ್ಯಾಯ ಫ್ಲಾಟ್ ನೀಡುವುದಾಗಿ ಕಂಪನಿ ಹೇಳಿತಾದರೂ, ಶೆನ್ ಅವರಿಂದ ಬಾಕಿ ಹಣ ಪಾವತಿಸಲು ಸಾಧ್ಯವಾಗಲಿಲ್ಲ, ಹೀಗಾಗಿ ಆ ಫ್ಲಾಟ್ ಅನ್ನು ಬೇರೆಯವರಿಗೆ ಮಾರಾಟ ಮಾಡಲಾಯಿತು.
ನಂತರ ಶೆನ್ ತಮ್ಮ ಹಣವನ್ನು ಮರುಪಾವತಿಸುವಂತೆ ಕೋರಿದರು. ಆದರೆ ಕಂಪನಿ ಆರ್ಥಿಕ ಸಂಕಷ್ಟದಲ್ಲಿದೆ ಎಂದು ಹೇಳಿ ಹಣ ಕೊಡಲು ನಿರಾಕರಿಸಿತು. 2020 ಮತ್ತು 2022ರಲ್ಲಿ ಸ್ವಲ್ಪ ಹಣವನ್ನು ಮರಳಿಸಿದರೂ, ನಂತರ ಕಂಪನಿ ಸಂಪರ್ಕ ಕಡಿತಗೊಳಿಸಿತು.
ಶೆನ್ ಈ ವಿಷಯವನ್ನು ಮಧ್ಯಸ್ಥಿಕೆ ನ್ಯಾಯಾಲಯಕ್ಕೆ ಕೊಂಡೊಯ್ದರು. ಬಾಕಿ ಉಳಿದಿರುವ 47,700 ಯುವಾನ್ ಹಣ ಮತ್ತು 27,000 ಯುವಾನ್ ಬಡ್ಡಿಯನ್ನು ಮರುಪಾವತಿಸುವಂತೆ ನ್ಯಾಯಾಲಯ ಆದೇಶಿಸಿತು. ಹಣ ಪಾವತಿಸದಿದ್ದರೆ ಹೆಚ್ಚುವರಿಯಾಗಿ 47,000 ಯುವಾನ್ ಪರಿಹಾರ ನೀಡುವಂತೆಯೂ ಸೂಚಿಸಲಾಯಿತು. ಆದರೆ, ಈ ವರ್ಷದ ಮೇ ತಿಂಗಳವರೆಗೆ ಶೆನ್ ಅವರಿಗೆ ಹಣ ಸಿಕ್ಕಿಲ್ಲ. ಆ ಕಂಪನಿಯ ಹೆಸರಿನಲ್ಲಿ ಯಾವುದೇ ನೋಂದಾಯಿತ ಆಸ್ತಿ ಅಥವಾ ಉಳಿತಾಯ ಇಲ್ಲದಿರುವುದರಿಂದ ನ್ಯಾಯಾಲಯದ ಆದೇಶವನ್ನು ಜಾರಿಗೆ ತರುವುದು ಕಷ್ಟವಾಗಿದೆ.
ದಶಕದ ನಂತರವೂ, ಶೆನ್ ಈಗ ಮನೆ ಇಲ್ಲದೆ ಮತ್ತು ಪೂರ್ಣ ಪರಿಹಾರ ಸಿಗದೆ ಸಂಕಷ್ಟದಲ್ಲಿದ್ದಾರೆ. ಕಾನೂನಿನ ರಕ್ಷಣೆ ಇಲ್ಲದ ಅಗ್ಗದ ಆಸ್ತಿಗಳನ್ನು ಖರೀದಿಸುವ ಅಪಾಯಗಳ ಬಗ್ಗೆ ಈ ಪ್ರಕರಣ ಚೀನಾದಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ.
