ಮಧ್ಯಮ ವರ್ಗದ ಜನರಲ್ಲಿ ಹಣದುಬ್ಬರದ (ಬೆಲೆ ಏರಿಕೆ) ಭೀತಿ ಮೂಡಿಸಿರುವ ಬೆನ್ನಲ್ಲೇ, ಒಂದೇ ತಿಂಗಳಲ್ಲಿ ಮೂರನೇ ಬಾರಿಗೆ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಏರಿಕೆಯಾಗಿವೆ. ಮುಂಬರುವ ದಿನಗಳಲ್ಲಿ ತೈಲ ಬೆಲೆಗಳು ಹೆಚ್ಚಾಗಲಿವೆ ಎಂಬ ಸುಳಿವು ನೀಡಿ, ಇಂಧನವನ್ನು ಉಳಿತಾಯ ಮಾಡುವಂತೆ ನಾಗರಿಕರಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಮನವಿ ಮಾಡಿದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ. ಇದರೊಂದಿಗೆ, ದಿನಕ್ಕೆ 1,000 ಕೋಟಿ ರೂಪಾಯಿಗಳ ನಷ್ಟ ಅನುಭವಿಸುತ್ತಿರುವ ತೈಲ ಕಂಪನಿಗಳು ಬೆಲೆ ಏರಿಕೆ ಮಾಡುವುದನ್ನು ತಡೆಯಲು ಸರ್ಕಾರದ ಕೈಯಿಂದ ಸಾಧ್ಯವಿಲ್ಲ ಎಂದು ಕೇಂದ್ರ ಪೆಟ್ರೋಲಿಯಂ ಸಚಿವ ಹರ್ದೀಪ್ ಸಿಂಗ್ ಪುರಿ ಕೂಡ ಹೇಳಿದ್ದಾರೆ.
ಆದರೆ, ಇತರ ಉತ್ಪನ್ನಗಳಂತೆ ಪೆಟ್ರೋಲ್ ಮತ್ತು ಡೀಸೆಲ್ ಮೇಲೂ ಸರಕು ಮತ್ತು ಸೇವಾ ತೆರಿಗೆಯನ್ನು (ಜಿಎಸ್ಟಿ) ವಿಧಿಸಿದರೆ ಸಾರ್ವಜನಿಕರಿಗೆ ಎಷ್ಟು ಲಾಭ ಸಿಗಬಹುದು? ಎನ್ನುವುದು ಸದ್ಯದ ಅತಿ ದೊಡ್ಡ ಪ್ರಶ್ನೆಯಾಗಿದೆ. ಈ ಕುರಿತು ನೀವು ತಿಳಿದುಕೊಳ್ಳಬೇಕಾದ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಪ್ರಸ್ತುತ ಇಂಧನದ ಮೇಲಿರುವ ತೆರಿಗೆ ಹೊರೆ ಎಷ್ಟು?
ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳ ಮೇಲೆ ಜಿಎಸ್ಟಿ ಬೀರುವ ಪ್ರಭಾವವನ್ನು ಅರ್ಥಮಾಡಿಕೊಳ್ಳಲು, ಮೊದಲು ಎರಡೂ ಇಂಧನಗಳ ಮೇಲಿರುವ ಪ್ರಸ್ತುತ ತೆರಿಗೆ ರಚನೆಯನ್ನು ಪರಿಶೀಲಿಸುವುದು ಅಗತ್ಯವಾಗಿದೆ. ಮೇ 23 ರಂದು ದೆಹಲಿಯಲ್ಲಿ ಪೆಟ್ರೋಲ್ ಬೆಲೆ ಲೀಟರ್ಗೆ 99.51 ರೂಪಾಯಿ ಇತ್ತು. ಪೆಟ್ರೋಲ್ನ ನಿಜವಾದ ಮೂಲ ಬೆಲೆ 66.29 ರೂಪಾಯಿ ಆಗಿದೆ. ಆದರೆ ಇದಕ್ಕೆ ಕೇಂದ್ರದ ಅಬಕಾರಿ ಸುಂಕವಾಗಿ (ಎಕ್ಸೈಸ್ ಡ್ಯೂಟಿ) 11.90 ರೂಪಾಯಿ, ದೆಹಲಿ ಸರ್ಕಾರದ ವ್ಯಾಟ್ (VAT) ರೂಪದಲ್ಲಿ 16.03 ರೂಪಾಯಿ ಮತ್ತು ಡೀಲರ್ ಕಮಿಷನ್ 4.42 ರೂಪಾಯಿ ಸೇರ್ಪಡೆಯಾದ ನಂತರ, ಗ್ರಾಹಕರು ಖರೀದಿಸುವ ಚಿಲ್ಲರೆ ಬೆಲೆ ಗಣನೀಯವಾಗಿ ಹೆಚ್ಚಾಗುತ್ತದೆ.
ಇನ್ನೊಂದೆಡೆ, ಪ್ರಸ್ತುತ ಪೆಟ್ರೋಲ್ಗಿಂತಲೂ ಡೀಸೆಲ್ ಮೇಲೆ ಹೆಚ್ಚಿನ ತೆರಿಗೆ ವಿಧಿಸಲಾಗುತ್ತಿದೆ. ದೆಹಲಿಯಲ್ಲಿ ಸದ್ಯ ಡೀಸೆಲ್ ಬೆಲೆ ಲೀಟರ್ಗೆ 92.49 ರೂಪಾಯಿ ಇದೆ, ಆದರೆ ಇದರ ಅಸಲಿ ಮೂಲ ಬೆಲೆ ಕೇವಲ 67.36 ರೂಪಾಯಿ ಮಾತ್ರ. ಇದಕ್ಕೆ ಕೇಂದ್ರ ಅಬಕಾರಿ ಸುಂಕವಾಗಿ 7.80 ರೂಪಾಯಿ, ದೆಹಲಿ ಸರ್ಕಾರದ ವ್ಯಾಟ್ ರೂಪದಲ್ಲಿ 13.39 ರೂಪಾಯಿ ಮತ್ತು ಡೀಲರ್ ಕಮಿಷನ್ 3.03 ರೂಪಾಯಿಗಳನ್ನು ಸೇರಿಸಿದ ಬಳಿಕ ಈ ಬೆಲೆ ಏರಿಕೆಯಾಗಿದೆ.
ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿರುವ ಒಟ್ಟು ತೆರಿಗೆ ಎಷ್ಟು?
ಪ್ರಸ್ತುತ ಪೆಟ್ರೋಲ್ ಮತ್ತು ಡೀಸೆಲ್ ಮೇಲೆ ಮೂರು ವಿಭಿನ್ನ ತೆರಿಗೆ ಹಾಗೂ ಶುಲ್ಕಗಳನ್ನು ವಿಧಿಸಲಾಗುತ್ತಿದೆ. ಇವೆಲ್ಲವೂ ಒಟ್ಟಾಗಿ ಪೆಟ್ರೋಲ್ ಮೇಲೆ ಸುಮಾರು ಶೇ. 42 ರಷ್ಟು ಮತ್ತು ಡೀಸೆಲ್ ಮೇಲೆ ಶೇ. 32 ರಷ್ಟು ತೆರಿಗೆ ಹೊರೆಯನ್ನು ಹಾಕುತ್ತಿವೆ, ಇದು ಚಿಲ್ಲರೆ ಮಾರಾಟದ ಬೆಲೆಯನ್ನು ಭಾರೀ ಪ್ರಮಾಣದಲ್ಲಿ ಹೆಚ್ಚಿಸುತ್ತಿದೆ. ಇದೇ ಕಾರಣಕ್ಕೆ ಇಂಧನವು ರಿಫೈನರಿಯಿಂದ (ಸಂಸ್ಕರಣಾಗಾರ) ಮಾರುಕಟ್ಟೆಗೆ ತಲುಪುವಷ್ಟರಲ್ಲಿ ಬೆಲೆ ತೀವ್ರವಾಗಿ ಏರುತ್ತದೆ. ಈ ಸಮಸ್ಯೆಯನ್ನು ಬಗೆಹರಿಸಲು ಪೆಟ್ರೋಲಿಯಂ ಉತ್ಪನ್ನಗಳನ್ನು ಜಿಎಸ್ಟಿ ವ್ಯಾಪ್ತಿಗೆ ತರಬೇಕೆಂದು ವಾಣಿಜ್ಯ ಸಂಸ್ಥೆಗಳು ನಿರಂತರವಾಗಿ ಒತ್ತಾಯಿಸುತ್ತಿವೆ.
ಶೇಕಡಾ 18 ರಷ್ಟು ಜಿಎಸ್ಟಿ ವಿಧಿಸಿದರೆ ಆಗುವ ಲಾಭ:
ಪ್ರಸ್ತುತ ಇರುವ ಜಿಎಸ್ಟಿ ದರಗಳನ್ನು ಆಧರಿಸಿ ಪೆಟ್ರೋಲ್ ಮತ್ತು ಡೀಸೆಲ್ ಅನ್ನು ಜಿಎಸ್ಟಿ ವ್ಯಾಪ್ತಿಗೆ ತಂದರೆ ಆಗುವ ಪರಿಣಾಮವನ್ನು ಅಂದಾಜಿಸಬಹುದಾಗಿದೆ. ಸದ್ಯ ದೆಹಲಿಯಲ್ಲಿ ಪೆಟ್ರೋಲ್ನ ಮೂಲ ಬೆಲೆ ಲೀಟರ್ಗೆ 66.29 ರೂಪಾಯಿ ಇದೆ. ಒಂದು ವೇಳೆ ಇದಕ್ಕೆ ಶೇ. 18 ರಷ್ಟು ಜಿಎಸ್ಟಿ ವಿಧಿಸಿದರೆ, ತೆರಿಗೆಯ ಮೊತ್ತ 11.93 ರೂಪಾಯಿ ಆಗುತ್ತದೆ. ಆಗ ಸಾರ್ವಜನಿಕರಿಗೆ ಸಿಗುವ ಅಂತಿಮ ಬೆಲೆ ಲೀಟರ್ಗೆ ಸರಿಸುಮಾರು 78.22 ರೂಪಾಯಿ ಆಗಲಿದೆ.
