ಇತ್ತೀಚಿನ ದಿನಗಳಲ್ಲಿ ನಾವು ಬಳಸುವ ಆಹಾರ ಪದಾರ್ಥಗಳಲ್ಲಿ ಕಲಬೆರಕೆ ಎನ್ನುವುದು ಸಾಮಾನ್ಯ ಎಂಬಂತಾಗಿದೆ. ಅದರಲ್ಲೂ ಹೈನು ಉತ್ಪನ್ನಗಳಲ್ಲಿ ಕಲಬೆರಕೆ ಪ್ರಮಾಣ ದಿನೇ ದಿನೇ ಹೆಚ್ಚುತ್ತಿದೆ. ಹೋಟೆಲ್ಗಳಲ್ಲಿ ಬಳಸುವ ಪನೀರ್ ಅಸಲಿಯೇ ಅಥವಾ ನಕಲಿಯೇ ಎಂಬುದನ್ನು ಸ್ಪಷ್ಟಪಡಿಸುವಂತೆ ಸರ್ಕಾರವೇ ಆದೇಶ ನೀಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.
ಇಂತಹ ಸಂದರ್ಭದಲ್ಲೇ ಮಹಾರಾಷ್ಟ್ರದ ಪುಣೆಯ ದೌಂಡ್ನಲ್ಲಿ ಹಾಲಿನ ಕಲಬೆರಕೆಗೆ ಸಂಬಂಧಿಸಿದ ಬೆಚ್ಚಿಬೀಳಿಸುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಹಾಲನ್ನು ಕಾಯಿಸಿದ ತಕ್ಷಣ ಅದು ಪ್ಲಾಸ್ಟಿಕ್ನಂತೆ ಮಾರ್ಪಟ್ಟಿದೆ.
ನಡೆದಿದ್ದೇನು?
ದೌಂಡ್ ತಾಲ್ಲೂಕಿನ ಪಾಟಸ್ ಎಂಬಲ್ಲಿ ಈ ಘಟನೆ ನಡೆದಿದೆ. ಪಾಟಸ್ ನಿವಾಸಿ ಯುವರಾಜ್ ಅವಹಾಡ್ ಎಂಬುವವರು ಸ್ಥಳೀಯ ಸ್ವೀಟ್ ಹೋಮ್ ಒಂದರಿಂದ ಹಾಲು ಖರೀದಿಸಿದ್ದರು. ಹಾಲನ್ನು ಮನೆಗೆ ತಂದ ಮೇಲೆ ಸ್ವಲ್ಪ ಹೊತ್ತು ಫ್ರಿಡ್ಜ್ನಲ್ಲಿ ಇಟ್ಟು, ನಂತರ ಕಾಯಿಸಲು ಸ್ಟೌ ಮೇಲೆ ಇಟ್ಟಿದ್ದಾರೆ.
ಹಾಲು ಕಾಯುತ್ತಿದ್ದಂತೆ ಅದು ಒಡೆದಂತೆ ಕಂಡರೂ, ಹತ್ತಿರದಿಂದ ಗಮನಿಸಿದಾಗ ಯುವರಾಜ್ ಅವರಿಗೆ ಶಾಕ್ ಕಾದಿತ್ತು. ಹಾಲು ಒಡೆದು ಪ್ಲಾಸ್ಟಿಕ್ ಪದಾರ್ಥವಾಗಿ ಮಾರ್ಪಟ್ಟಿತ್ತು. ಅದರಲ್ಲಿ ದೊಡ್ಡ ದೊಡ್ಡ ಗಡ್ಡೆಗಳು ಉಂಟಾಗಿದ್ದು, ಅದನ್ನು ಎಳೆದರೆ ಚೂಯಿಂಗ್ ಗಮ್ (Chewing gum) ಮಾದರಿಯಲ್ಲಿ ಸಾಲಾಗಿ ಬರುತ್ತಿತ್ತು.
ಸಾರ್ವಜನಿಕರ ಆಕ್ರೋಶ
ಈ ದೃಶ್ಯವನ್ನು ಕಂಡು ದಿಗ್ರಮೆಗೊಂಡ ಯುವರಾಜ್, ತಕ್ಷಣ ನೆರೆಹೊರೆಯವರನ್ನು ಕರೆಸಿ ತೋರಿಸಿದ್ದಾರೆ. ಈ ಭಯಾನಕ ದೃಶ್ಯವನ್ನು ವಿಡಿಯೋ ಮಾಡಿ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳಲಾಗಿದೆ. “ಪ್ಲಾಸ್ಟಿಕ್ ಮಿಶ್ರಿತ ಇಂತಹ ಕಲಬೆರಕೆ ಹಾಲನ್ನು ಮಾರಾಟ ಮಾಡಿದರೆ ಜನರ ಆರೋಗ್ಯದ ಗತಿಯೇನು?” ಎಂದು ಸಾರ್ವಜನಿಕರು ಆತಂಕ ವ್ಯಕ್ತಪಡಿಸಿದ್ದಾರೆ.
ಇಂತಹ ಜೀವವಿರೋಧಿ ಕೆಲಸ ಮಾಡುವವರ ವಿರುದ್ಧ ಸರ್ಕಾರ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಯುವರಾಜ್ ಒತ್ತಾಯಿಸಿದ್ದಾರೆ. ಸದ್ಯ ಈ ಬಗ್ಗೆ ಯಾವುದೇ ಅಧಿಕೃತ ದೂರು ದಾಖಲಾಗದಿದ್ದರೂ, ವೈರಲ್ ಆಗಿರುವ ವಿಡಿಯೋ ನೋಡಿ ಜನರು ಹಾಲು ಖರೀದಿಸಲು ಭಯಪಡುವಂತಾಗಿದೆ.
पुण्यातील दौंडमधील घटना, भेसळयुक्त दुधाचा धक्कादायक प्रकार समोर pic.twitter.com/19zDS1qDmp
— VIRALबाबा (@viralmedia70) May 4, 2026
