ನಾಗ್ಪುರ: ದೇಶಾದ್ಯಂತ ಈಗಾಗಲೇ ತೀವ್ರ ವಿವಾದಕ್ಕೀಡಾಗಿರುವ NEET-UG ಪರೀಕ್ಷೆಯ ಮರುಪರೀಕ್ಷೆ (Retest) ನಡೆಸುವ ಪ್ರಕ್ರಿಯೆಯಲ್ಲೂ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ಮಾಡಿರುವ ಹಿಮಾಲಯದಂತಹ ಎಡವಟ್ಟೊಂದು ಬೆಳಕಿಗೆ ಬಂದಿದೆ. ಮಹಾರಾಷ್ಟ್ರದ ನಾಗ್ಪುರದಲ್ಲಿ ಪರೀಕ್ಷಾ ಕೇಂದ್ರವನ್ನು ಬಯಸಿ ಮೊದಲ ಆದ್ಯತೆ ನೀಡಿದ್ದ ವಿದ್ಯಾರ್ಥಿಯೊಬ್ಬನಿಗೆ, ಪರೀಕ್ಷೆ ನಡೆಯುವ ಕೇವಲ ಒಂದು ದಿನ ಮುಂಚಿತವಾಗಿ ಯುಎಇಯ (UAE) ಅಬುಧಾಬಿಯಲ್ಲಿ ಕೇಂದ್ರವನ್ನು ಹಂಚಿಕೆ ಮಾಡಿ ಪ್ರವೇಶ ಪತ್ರ (Admit Card) ನೀಡಲಾಗಿದೆ!
NEET-UG ಪರೀಕ್ಷೆಯಲ್ಲಿ ಉಂಟಾಗಿದ್ದ ಅಕ್ರಮಗಳ ಹಿನ್ನೆಲೆಯಲ್ಲಿ ಸುಪ್ರೀಂ ಕೋರ್ಟ್ ಸೂಚನೆಯಂತೆ ಆಯ್ದ ವಿದ್ಯಾರ್ಥಿಗಳಿಗೆ ಜೂನ್ 21 ರಂದು ಮರುಪರೀಕ್ಷೆ ಆಯೋಜಿಸಲಾಗಿದೆ. ಈ ಪರೀಕ್ಷೆಗಾಗಿ ನಾಗ್ಪುರದ ವಿದ್ಯಾರ್ಥಿಯೊಬ್ಬ ತನಗೆ ಹತ್ತಿರದ ನಾಗ್ಪುರ ಕೇಂದ್ರವನ್ನೇ ಮೊದಲ ಆಯ್ಕೆಯಾಗಿ ನೀಡಿದ್ದನು. ಆದರೆ, ಜೂನ್ 20 ರಂದು (ಪರೀಕ್ಷೆಯ ಹಿಂದಿನ ದಿನ) ಬಿಡುಗಡೆಯಾದ ಪ್ರವೇಶ ಪತ್ರವನ್ನು ನೋಡಿ ವಿದ್ಯಾರ್ಥಿ ಮತ್ತು ಆತನ ಪೋಷಕರು ದಿಗಿಲುಗೊಂಡಿದ್ದಾರೆ. ಅದರಲ್ಲಿ ಭಾರತದ ಯಾವುದೇ ನಗರದ ಬದಲಾಗಿ, ದೇಶದ ಗಡಿ ದಾಟಿ ಮುಸ್ಲಿಂ ರಾಷ್ಟ್ರವಾದ ಯುಎಇಯ ಅಬುಧಾಬಿಯ ಪರೀಕ್ಷಾ ಕೇಂದ್ರದ ಹೆಸರು ಇತ್ತು.
ಪರೀಕ್ಷೆಗೆ ಕೇವಲ ಒಂದು ದಿನ ಬಾಕಿ ಇರುವಾಗ ಪಾಸ್ಪೋರ್ಟ್, ವೀಸಾ ಮತ್ತು ವಿಮಾನದ ಟಿಕೆಟ್ ವ್ಯವಸ್ಥೆ ಮಾಡಿ ನಾಗ್ಪುರದಿಂದ ಅಬುಧಾಬಿಗೆ ತಲುಪುವುದು ಯಾವುದೇ ಸಾಮಾನ್ಯ ವಿದ್ಯಾರ್ಥಿಗೆ ಅಸಾಧ್ಯದ ಮಾತು. ಎನ್ಟಿಎಯ ಈ ಬೇಜವಾಬ್ದಾರಿತನದಿಂದಾಗಿ ವರ್ಷವಿಡೀ ಕಷ್ಟಪಟ್ಟು ಓದಿದ ವಿದ್ಯಾರ್ಥಿಯ ಭವಿಷ್ಯ ಈಗ ಕತ್ತಲಿಗೆ ತಳ್ಳಲ್ಪಟ್ಟಂತಾಗಿದೆ.
ಈ ಆಘಾತಕಾರಿ ವಿಷಯ ತಿಳಿಯುತ್ತಿದ್ದಂತೆ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ಕೇಂದ್ರ ಸರ್ಕಾರ ಮತ್ತು ಎನ್ಟಿಎ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. “ಕೇಂದ್ರ ಸರ್ಕಾರದ ಅಧೀನದಲ್ಲಿರುವ ಎನ್ಟಿಎ ಸಂಸ್ಥೆ ಸಂಪೂರ್ಣವಾಗಿ ಹಳಿ ತಪ್ಪಿದೆ. ಭಾರತದಲ್ಲಿ ಪರೀಕ್ಷೆ ಬರೆಯಲು ಕೇಳಿದ ವಿದ್ಯಾರ್ಥಿಯನ್ನು ಅಬುಧಾಬಿಗೆ ಕಳುಹಿಸುವ ಇವರ ವ್ಯವಸ್ಥೆ ವಿದ್ಯಾರ್ಥಿಗಳ ಜೀವನದ ಜೊತೆ ಚೆಲ್ಲಾಟವಾಡುತ್ತಿದೆ. ಪ್ರಧಾನಿ ಮೋದಿ ಅವರು ಈ ಪರೀಕ್ಷಾ ಮಾಫಿಯಾವನ್ನು ತಡೆಯಲು ಇನ್ನೆಷ್ಟು ವಿದ್ಯಾರ್ಥಿಗಳ ಭವಿಷ್ಯ ಬಲಿಯಾಗಬೇಕೆಂದು ಕಾಯುತ್ತಿದ್ದಾರೆ?” ಎಂದು ಅವರು ಎಕ್ಸ್ (ಟ್ವಿಟರ್) ಮೂಲಕ ಆಕ್ರೋಶ ಹೊರಹಾಕಿದ್ದಾರೆ.
