ಬೆಂಗಳೂರು: ರಾಜ್ಯದ ಸರ್ಕಾರಿ ಶಾಲಾ ಶಿಕ್ಷಕರು ಮತ್ತು ಶಿಕ್ಷಣ ಇಲಾಖೆಯ ಸಿಬ್ಬಂದಿಗಳ ಹಾಜರಾತಿ ವ್ಯವಸ್ಥೆಯಲ್ಲಿ ಸರ್ಕಾರ ಮಹತ್ವದ ಬದಲಾವಣೆ ತಂದಿದೆ. ಇನ್ಮುಂದೆ ಶಾಲೆಗಳಲ್ಲಿ ಹಳೆಯ ಬಯೋಮೆಟ್ರಿಕ್ ಅಥವಾ ಭೌತಿಕ ಹಾಜರಾತಿ ಪುಸ್ತಕದ ಬದಲು, ‘ಕರ್ತವ್ಯ’ (Kartavya-KAAMS) ಮೊಬೈಲ್ ಅಪ್ಲಿಕೇಶನ್ ಮೂಲಕ ಹಾಜರಾತಿ ದಾಖಲಿಸುವುದನ್ನು ಕಡ್ಡಾಯಗೊಳಿಸಿ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ ಆದೇಶ ಹೊರಡಿಸಿದೆ.
ಮುಖ ಚಹರೆ ಗುರುತಿಸುವ ತಂತ್ರಜ್ಞಾನ: ಈ ಆಪ್ ಕೃತಕ ಬುದ್ಧಿಮತ್ತೆ (AI) ಮತ್ತು ಜಿಪಿಎಸ್ (GPS) ಆಧಾರಿತವಾಗಿದ್ದು, ಶಿಕ್ಷಕರು ತಮ್ಮ ಕೆಲಸದ ಸ್ಥಳದಲ್ಲಿ ನಿಂತು ಮುಖ ಚಹರೆ (Face Recognition) ಮೂಲಕ ಹಾಜರಾತಿ ನೀಡಬೇಕು.
ಯಾರಿಗೆ ಅನ್ವಯ?: ರಾಜ್ಯದ ಎಲ್ಲಾ ಸರ್ಕಾರಿ ಪ್ರಾಥಮಿಕ ಮತ್ತು ಪ್ರೌಢಶಾಲಾ ಶಿಕ್ಷಕರು, ಮುಖ್ಯೋಪಾಧ್ಯಾಯರು ಹಾಗೂ ಶಿಕ್ಷಣ ಇಲಾಖೆಯ ಕಚೇರಿಗಳಲ್ಲಿ ಕಾರ್ಯನಿರ್ವಹಿಸುವ ಬೋಧಕೇತರ ಸಿಬ್ಬಂದಿಗೆ ಇದು ಅನ್ವಯಿಸುತ್ತದೆ.
ದಿನಕ್ಕೆರಡು ಬಾರಿ ಹಾಜರಾತಿ: ಶಿಕ್ಷಕರು ಪ್ರತಿದಿನ ಶಾಲೆಗೆ ಬರುವಾಗ (In-Time) ಮತ್ತು ಶಾಲೆಯಿಂದ ಬಿಡುವಾಗ (Out-Time) ಹೀಗೆ ಎರಡು ಬಾರಿ ಆಪ್ನಲ್ಲಿ ಹಾಜರಾತಿ ದಾಖಲಿಸಬೇಕು.
ತರಬೇತಿ ಮತ್ತು ಮೌಲ್ಯಮಾಪನಕ್ಕೂ ಅನ್ವಯ: ಕೇವಲ ಶಾಲೆಗಳಲ್ಲದೆ, ಶಿಕ್ಷಕರು ತರಬೇತಿ ಶಿಬಿರಗಳಲ್ಲಿ ಅಥವಾ 10ನೇ ತರಗತಿ ಮೌಲ್ಯಮಾಪನ ಕೇಂದ್ರಗಳಲ್ಲಿ ಇದ್ದಾಗಲೂ ಇದೇ ಆಪ್ ಮೂಲಕ ಹಾಜರಾತಿ ನೀಡಬೇಕಾಗುತ್ತದೆ.
ವೇತನಕ್ಕೆ ಹಾಜರಾತಿಯೇ ಆಧಾರ:
ಮುಂದಿನ ದಿನಗಳಲ್ಲಿ ಈ ‘ಕರ್ತವ್ಯ’ ಆಪ್ ಮೂಲಕ ದಾಖಲಾಗುವ ಹಾಜರಾತಿಯನ್ನು ಆಧರಿಸಿಯೇ ಶಿಕ್ಷಕರ ವೇತನ ಪ್ರಕ್ರಿಯೆಯನ್ನು ನಡೆಸಲಾಗುವುದು ಎಂದು ಇಲಾಖೆ ಸ್ಪಷ್ಟಪಡಿಸಿದೆ. ಈ ಆಪ್ ಅನ್ನು HRMS ಮತ್ತು SATS ತಂತ್ರಾಂಶಗಳೊಂದಿಗೆ ಜೋಡಿಸಲಾಗುವುದು.
ಪಾರದರ್ಶಕತೆಗೆ ಆದ್ಯತೆ:
“ಹಾಜರಾತಿ ವ್ಯವಸ್ಥೆಯಲ್ಲಿ ಹೆಚ್ಚಿನ ಪಾರದರ್ಶಕತೆ ತರಲು ಮತ್ತು ನೈಜ ಸಮಯದಲ್ಲಿ ಮೇಲ್ವಿಚಾರಣೆ ನಡೆಸಲು ಈ ಕ್ರಮ ಕೈಗೊಳ್ಳಲಾಗಿದೆ. ಇದರಿಂದ ಭೌತಿಕ ಹಸ್ತಕ್ಷೇಪ ಕಡಿಮೆಯಾಗಲಿದ್ದು, ಶೈಕ್ಷಣಿಕ ಸುಧಾರಣೆಗೆ ಸಹಕಾರಿಯಾಗಲಿದೆ,” ಎಂದು ಸುತ್ತೋಲೆಯಲ್ಲಿ ತಿಳಿಸಲಾಗಿದೆ.
ಯಾವುದೇ ತಾಂತ್ರಿಕ ಸಮಸ್ಯೆಗಳಿದ್ದಲ್ಲಿ ಶಿಕ್ಷಕರು ಇಲಾಖೆಯ ಇ-ಆಡಳಿತ ವಿಭಾಗವನ್ನು ಅಥವಾ ನಿಗದಿತ ಸಹಾಯವಾಣಿಯನ್ನು ಸಂಪರ್ಕಿಸಲು ಸೂಚಿಸಲಾಗಿದೆ. ಈ ಹೊಸ ನಿಯಮವು ತಕ್ಷಣದಿಂದಲೇ ಜಾರಿಗೆ ಬರಲಿದ್ದು, ಎಲ್ಲಾ ಜಿಲ್ಲಾ ಉಪನಿರ್ದೇಶಕರು ಮತ್ತು ಕ್ಷೇತ್ರ ಶಿಕ್ಷಣಾಧಿಕಾರಿಗಳು ಇದರ ಮೇಲ್ವಿಚಾರಣೆ ನಡೆಸಲಿದ್ದಾರೆ.
