ವಾಷಿಂಗ್ಟನ್: ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಭೀತಿ ಮತ್ತು ಆರ್ಥಿಕ ದಿಗ್ಬಂಧನಗಳ ನಡುವೆ ಇರಾನ್ ಸರ್ಕಾರವು ಅಮೆರಿಕಕ್ಕೆ ಅಚ್ಚರಿಯ “ದ್ವಿಹಂತದ ಯೋಜನೆ”ಯನ್ನು ಪ್ರಸ್ತಾವಿಸಿದೆ. ವಿಶ್ವದ ಪ್ರಮುಖ ತೈಲ ಮಾರ್ಗವಾದ ಹಾರ್ಮುಜ್ ಜಲಸಂಧಿಯನ್ನು (Strait of Hormuz) ಮೊದಲು ಮುಕ್ತಗೊಳಿಸುವುದು ಮತ್ತು ಯುದ್ಧಕ್ಕೆ ಅಂತ್ಯ ಹಾಡುವುದಕ್ಕೆ ಆದ್ಯತೆ ನೀಡಬೇಕು, ಪರಮಾಣು ಕಾರ್ಯಕ್ರಮದ ಕುರಿತಾದ ಸಂಕೀರ್ಣ ಚರ್ಚೆಗಳನ್ನು ನಂತರದ ಹಂತಕ್ಕೆ ಮುಂದೂಡಬೇಕು ಎಂದು ಇರಾನ್ ತಿಳಿಸಿದೆ.
ಅಮೆರಿಕವು ಇರಾನ್ ಮೇಲಿನ ನೌಕಾ ದಿಗ್ಬಂಧನವನ್ನು (Naval Blockade) ಸಂಪೂರ್ಣವಾಗಿ ಹಿಂಪಡೆದರೆ ಮತ್ತು ಯುದ್ಧವನ್ನು ನಿಲ್ಲಿಸಿದರೆ, ತಾನು ಹಾರ್ಮುಜ್ ಜಲಸಂಧಿಯ ಮೇಲಿನ ಹಿಡಿತವನ್ನು ಸಡಿಲಿಸುವುದಾಗಿ ಇರಾನ್ ಹೇಳಿದೆ.
ಇರಾನ್ನ ಪರಮಾಣು ಕಾರ್ಯಕ್ರಮ ಮತ್ತು ಯುರೇನಿಯಂ ಸಮೃದ್ಧಗೊಳಿಸುವಿಕೆಯ ವಿಷಯವು ಅತ್ಯಂತ ಸಂಕೀರ್ಣವಾಗಿದ್ದು, ಸದ್ಯಕ್ಕೆ ಅದನ್ನು ಚರ್ಚೆಯ ಪಟ್ಟಿಯಿಂದ ಹೊರಗಿಡಲು ಇರಾನ್ ಬಯಸಿದೆ. ಮೊದಲು ಆರ್ಥಿಕ ಮತ್ತು ಪ್ರಾದೇಶಿಕ ಸ್ಥಿರತೆಗೆ ಒತ್ತು ನೀಡಬೇಕೆಂದು ಪಾಕಿಸ್ತಾನದ ಸಂಧಾನಕಾರರ ಮೂಲಕ ಸಂದೇಶ ರವಾನಿಸಿದೆ.
ಹಾರ್ಮುಜ್ ಜಲಸಂಧಿಯ ಮೂಲಕ ವಿಶ್ವದ ಶೇ. 20ರಷ್ಟು ತೈಲ ಸರಬರಾಜು ನಡೆಯುತ್ತದೆ. ಇರಾನ್ನ ಈ ದಿಗ್ಬಂಧನದಿಂದಾಗಿ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆ ಪ್ರತಿ ಬ್ಯಾರೆಲ್ಗೆ 108 ಡಾಲರ್ ಗಡಿ ದಾಟಿದೆ.
