ಬಾಲಿ (ಇಂಡೋನೇಷ್ಯಾ):ವಿದೇಶ ಪ್ರವಾಸಕ್ಕೆ ತೆರಳುವ ಭಾರತೀಯರು ದೇಶದ ಗೌರವ ಹೆಚ್ಚಿಸಬೇಕೆಂಬ ಆಶಯದ ನಡುವೆಯೇ, ಇಂಡೋನೇಷ್ಯಾದ ಬಾಲಿಯಲ್ಲಿ ಭಾರತೀಯ ಪ್ರವಾಸಿಗರ ತಂಡವೊಂದು ಹೋಟೆಲ್ ವಸ್ತುಗಳನ್ನು ಕಳ್ಳತನ ಮಾಡಿ ಸಿಕ್ಕಿಬಿದ್ದಿರುವ ಘಟನೆ ನಡೆದಿದೆ. ಹೋಟೆಲ್ ಸಿಬ್ಬಂದಿ ಪ್ರವಾಸಿಗರ ಲಗೇಜ್ಗಳನ್ನು ತಪಾಸಣೆ ಮಾಡಿ ವಸ್ತುಗಳನ್ನು ಹೊರತೆಗೆಯುತ್ತಿರುವ ವಿಡಿಯೋ ಈಗ ಜಾಗತಿಕ ಮಟ್ಟದಲ್ಲಿ ವೈರಲ್ ಆಗಿದ್ದು, ಭಾರತೀಯರ ತಲೆತಗ್ಗಿಸುವಂತೆ ಮಾಡಿದೆ.
ಪ್ರವಾಸಿಗರು ಹೋಟೆಲ್ನಿಂದ ಚೆಕ್-ಔಟ್ ಮಾಡಿ ಹೊರಡುವ ಸಂದರ್ಭದಲ್ಲಿ ಹೋಟೆಲ್ ಸಿಬ್ಬಂದಿಗೆ ಅನುಮಾನ ಬಂದಿದೆ. ತಕ್ಷಣ ಅವರ ಲಗೇಜ್ಗಳನ್ನು ತಪಾಸಣೆ ಮಾಡಿದಾಗ ಬ್ಯಾಗ್ಗಳ ಒಳಗೆ ಹೋಟೆಲ್ ಮುದ್ರೆಯಿದ್ದ ಬೆಲೆಬಾಳುವ ವಸ್ತುಗಳು ಪತ್ತೆಯಾಗಿವೆ.
ಪ್ರವಾಸಿಗರ ಬ್ಯಾಗ್ನಲ್ಲಿ ಹೋಟೆಲ್ನ ಹೇರ್ ಡ್ರೈಯರ್, ಟವೆಲ್ಗಳು, ಸೌಂದರ್ಯವರ್ಧಕ ಕಿಟ್ಗಳು, ಹ್ಯಾಂಗರ್ಗಳು ಮತ್ತು ಬಾಗಿಲ ಬಳಿ ಹಾಕುವ ಡೋರ್ ಮ್ಯಾಟ್ಗಳು (Doormats) ಕೂಡ ಪತ್ತೆಯಾಗಿವೆ.
ಹೋಟೆಲ್ ಸಿಬ್ಬಂದಿ ಬ್ಯಾಗ್ನಿಂದ ವಸ್ತುಗಳನ್ನು ಹೊರತೆಗೆಯುತ್ತಿದ್ದರೆ, ಪ್ರವಾಸಿಗರು “ನಾವು ಹಣ ನೀಡುತ್ತೇವೆ, ನಮಗೆ ಹೋಗಲು ಬಿಡಿ” ಎಂದು ಗೋಗರೆಯುತ್ತಿರುವುದು ವಿಡಿಯೋದಲ್ಲಿ ಕೇಳಿಬಂದಿದೆ. ಆದರೆ ಸಿಬ್ಬಂದಿ, “ನಮಗೆ ಹಣ ಬೇಡ, ನೀವು ಮಾಡುತ್ತಿರುವುದು ತಪ್ಪು” ಎಂದು ಗದರಿಸಿದ್ದಾರೆ.
ಈ ವಿಡಿಯೋ ಹಂಚಿಕೆಯಾದ ಕೆಲವೇ ಗಂಟೆಗಳಲ್ಲಿ ಲಕ್ಷಾಂತರ ಮಂದಿ ಇದನ್ನು ವೀಕ್ಷಿಸಿದ್ದು, ಭಾರತೀಯ ನೆಟ್ಟಿಗರೇ ಈ ಪ್ರವಾಸಿಗರ ವಿರುದ್ಧ ಕಿಡಿಕಾರಿದ್ದಾರೆ.
”ಇಂತಹ ಕೃತ್ಯಗಳಿಂದಾಗಿ ಅಂತರಾಷ್ಟ್ರೀಯ ಮಟ್ಟದಲ್ಲಿ ಇಡೀ ಭಾರತೀಯ ಸಮುದಾಯವನ್ನು ಅನುಮಾನದಿಂದ ನೋಡುವಂತಾಗುತ್ತದೆ. ಇವರು ಕೇವಲ ವಸ್ತುಗಳನ್ನು ಕದ್ದಿಲ್ಲ, ಬದಲಾಗಿ ದೇಶದ ಮಾನವನ್ನು ಕದ್ದಿದ್ದಾರೆ,” ಎಂದು ನೆಟ್ಟಿಗರು ಕಮೆಂಟ್ ಮಾಡಿದ್ದಾರೆ.
INDIAN TOURISTS DO NOT LEARN 🤦🏻🤦🏻
Indian tourists, who stayed at Ubud, Bali (Indonesia) were caught by hotel-staff stealing stuff from the hotel.
Why would you go to a foreign country and do such cheap act/crime??
This is embarrassing to watch as an Indian. pic.twitter.com/ETtxJArCgl
— Tarun Gautam (@TARUNspeakss) April 21, 2026
