ನವದೆಹಲಿ: ಜಾಗತಿಕ ಇಂಧನ ಪೂರೈಕೆಯ ಪ್ರಮುಖ ಕೇಂದ್ರ ಬಿಂದುವಾಗಿರುವ ‘ಹಾರ್ಮುಜ್ ಜಲಸಂಧಿ’ (Strait of Hormuz) ಮೂಲಕ ಹಾದುಹೋಗುವ ಸರಕು ಮತ್ತು ತೈಲ ನೌಕೆಗಳ ಸಂಚಾರವನ್ನು ನಿಯಂತ್ರಿಸಲು ಇರಾನ್ ಹೊಸ ನಿಯಮಾವಳಿಗಳನ್ನು ಜಾರಿಗೊಳಿಸಿದೆ. ಇತ್ತೀಚೆಗಷ್ಟೇ ಅಮೆರಿಕ ಮತ್ತು ಇರಾನ್ ನಡುವೆ ಇಸ್ಲಾಮಾಬಾದ್ನಲ್ಲಿ ನಡೆದ 14 ಅಂಶಗಳ ತಿಳಿವಳಿಕೆ ಪತ್ರ (MoU) ಸಹಿಯಾದ ಬೆನ್ನಲ್ಲೇ, ಇರಾನ್ ಸರ್ಕಾರ ಈ ಹೊಸ ‘ಅನುಮತಿ ವ್ಯವಸ್ಥೆ’ಯನ್ನು ಪ್ರಕಟಿಸಿದೆ.
ಹೊಸದಾಗಿ ರಚನೆಯಾಗಿರುವ ಇರಾನ್ನ ‘ಪರ್ಷಿಯನ್ ಗಲ್ಫ್ ಸ್ಟ್ರೈಟ್ ಅಥಾರಿಟಿ’ (PGSA), ಹಾರ್ಮುಜ್ ಜಲಸಂಧಿ ಮೂಲಕ ಪರ್ಷಿಯನ್ ಗಲ್ಫ್ನಿಂದ ಒಮಾನ್ ಕೊಲ್ಲಿ ಮತ್ತು ಅರಬ್ಬಿ ಸಮುದ್ರಕ್ಕೆ ಪ್ರವೇಶಿಸಲು ಬಯಸುವ ಎಲ್ಲಾ ಹಡಗುಗಳು ಇನ್ನು ಮುಂದೆ ತನ್ನ ಅಧಿಕೃತ ವೆಬ್ಸೈಟ್ನಲ್ಲಿ (PGSA.ir) ಆನ್ಲೈನ್ ಅರ್ಜಿ ಸಲ್ಲಿಸಿ ಕಡ್ಡಾಯವಾಗಿ ಅನುಮತಿ ಪಡೆಯಬೇಕು ಎಂದು ತಿಳಿಸಿದೆ.
ಕಳೆದ ಫೆಬ್ರವರಿ 28 ರಂದು ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ವಾಯುದಾಳಿಗಳ ನಂತರ ಪಶ್ಚಿಮ ಏಷ್ಯಾದಲ್ಲಿ ಭೀಕರ ಯುದ್ಧದ ವಾತಾವರಣ ನಿರ್ಮಾಣವಾಗಿತ್ತು. ಮಾರ್ಚ್ ಆರಂಭದಿಂದ ಈ ಕಿರಿದಾದ ಸಮುದ್ರ ಮಾರ್ಗದಲ್ಲಿ ಹಡಗುಗಳ ಸಂಚಾರ ಸಂಪೂರ್ಣ ಸ್ಥಗಿತಗೊಂಡಿತ್ತು. ಇಡೀ ವಿಶ್ವದ ಒಟ್ಟು ತೈಲ ಮತ್ತು ದ್ರವೀಕೃತ ನೈಸರ್ಗಿಕ ಅನಿಲ (LNG) ಸರಬರಾಜಿನ ಐದನೇ ಒಂದು ಭಾಗ (1/5) ಈ ಮಾರ್ಗದ ಮೂಲಕವೇ ಸಾಗುವುದರಿಂದ, ಜಾಗತಿಕವಾಗಿ ಇಂಧನ ಬೆಲೆಗಳು ಗಗನಕ್ಕೇರಿ ಭಾರಿ ತೈಲ ಬಿಕ್ಕಟ್ಟು ಸೃಷ್ಟಿಯಾಗಿತ್ತು. ಪ್ರಸ್ತುತ ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ಅಮೆರಿಕ-ಇರಾನ್ ನಡುವೆ ಶಾಂತಿ ಒಪ್ಪಂದ ಏರ್ಪಟ್ಟಿರುವುದರಿಂದ ಸಂಚಾರ ಪುನರಾರಂಭಿಸಲು ಈ ಕ್ರಮ ಕೈಗೊಳ್ಳಲಾಗಿದೆ.
ಜಲಸಂಧಿಯ ಪ್ರದೇಶಕ್ಕೆ ಆಗಮಿಸುವ ಕನಿಷ್ಠ 48 ಗಂಟೆಗಳ ಮೊದಲು ಹಡಗುಗಳು ಆನ್ಲೈನ್ ಫಾರ್ಮ್ ಭರ್ತಿ ಮಾಡಬೇಕು.ಹಡಗಿನ ಹೆಸರು, ಧ್ವಜ, ಐಎಂಒ ನಂಬರ್, ಮಾಲೀಕರ ವಿವರಗಳು ಮಾತ್ರವಲ್ಲದೆ, ಹಡಗಿನಲ್ಲಿರುವ ಸರಕಿನ ಮೌಲ್ಯ, ಅಪಾಯಕಾರಿ ವಸ್ತುಗಳ ಘೋಷಣೆ, ಸಿಬ್ಬಂದಿಯ ರಾಷ್ಟ್ರೀಯತೆ, ವಿಮೆ ಹಾಗೂ ಪ್ರಯಾಣದ ನಿಖರ ಮಾರ್ಗದ ಸಂಪೂರ್ಣ ಮಾಹಿತಿಯನ್ನು ನೀಡಬೇಕು.
ಒಮ್ಮೆ ಅನುಮತಿ ಸಿಕ್ಕರೆ ಅದು ಕೇವಲ ಒಂದು ಬಾರಿ ಜಲಸಂಧಿ ದಾಟಲು ಮಾತ್ರ ಅನ್ವಯಿಸುತ್ತದೆ ಮತ್ತು ಗರಿಷ್ಠ 5 ದಿನಗಳ ಕಾಲ ಮಾತ್ರ ಮಾನ್ಯತೆ ಹೊಂದಿರುತ್ತದೆ. ಅವಧಿ ಮುಗಿದರೆ ಮತ್ತೆ ಹೊಸದಾಗಿ ಅರ್ಜಿ ಸಲ್ಲಿಸಬೇಕು.
ಇರಾನ್ನ ‘ಲಾರಾಕ್ ದ್ವೀಪ’ದ ಸಮೀಪವಿರುವ ನಿರ್ದಿಷ್ಟ ಸುರಕ್ಷಿತ ಮಾರ್ಗದಲ್ಲೇ ಹಡಗುಗಳು ಚಲಿಸಬೇಕು. ಸಮುದ್ರದಲ್ಲಿ ಮೈನ್ಗಳನ್ನು (ಸ್ಫೋಟಕಗಳು) ಇಡಲಾಗಿರುವ ಪ್ರದೇಶಗಳಿರುವುದರಿಂದ ಮಾರ್ಗ ಬದಲಿಸಿದರೆ ಆಗುವ ಅನಾಹುತಗಳಿಗೆ ಹಡಗಿನ ಮಾಲೀಕರೇ ಜವಾಬ್ದಾರರಾಗುತ್ತಾರೆ.
ಇದುವರೆಗೆ ಹಾರ್ಮುಜ್ ಜಲಸಂಧಿಯಲ್ಲಿ ಸಂಚರಿಸಲು ಯಾವುದೇ ಶುಲ್ಕ ಅಥವಾ ಅನುಮತಿಯ ಅಗತ್ಯವಿರಲಿಲ್ಲ. ಆದರೆ, ಇನ್ನು ಮುಂದೆ ಕಡಲ ಭದ್ರತೆ, ಪರಿಸರ ಸಂರಕ್ಷಣೆ ಮತ್ತು ಮಾರ್ಗದರ್ಶನ ನೀಡುವ ಸೇವೆಗಳಿಗಾಗಿ ಹಡಗು ಮಾಲೀಕರಿಂದ ಶುಲ್ಕ ವಸೂಲಿ ಮಾಡಲು ಇರಾನ್ ಯೋಜಿಸಿದೆ.
ಸದ್ಯದ ಒಪ್ಪಂದದ ಪ್ರಕಾರ, ಆರಂಭಿಕ 60 ದಿನಗಳವರೆಗೆ ಯಾವುದೇ ಸುಂಕ ಅಥವಾ ಸೇವಾ ಶುಲ್ಕ ಇರುವುದಿಲ್ಲ. ಈ ವೆಚ್ಚವನ್ನು ಇರಾನ್ ಸರ್ಕಾರವೇ ಭರಿಸಲಿದೆ. ಈ 60 ದಿನಗಳ ಅವಧಿಯಲ್ಲಿ ಒಮಾನ್ ಸೇರಿದಂತೆ ಕರಾವಳಿ ದೇಶಗಳೊಂದಿಗೆ ಚರ್ಚಿಸಿ, ಭವಿಷ್ಯದ ಶುಲ್ಕದ ಪ್ರಮಾಣವನ್ನು ಇರಾನ್ ನಿಗದಿಪಡಿಸಲಿದೆ.
ಆಕ್ಷೇಪಿಸುವ ಹಕ್ಕಿಲ್ಲ!
ಈ ಆನ್ಲೈನ್ ಅರ್ಜಿಯಲ್ಲಿ ಹಡಗಿನ ಮಾಲೀಕರು ಒಂದು ಪ್ರಮುಖ ಘೋಷಣೆಗೆ ಸಹಿ ಹಾಕಬೇಕಾಗುತ್ತದೆ. ಅದರಂತೆ, “ಜಲಸಂಧಿ ದಾಟಲು ಅನುಮತಿ ನೀಡುವ ಅಥವಾ ನಿರಾಕರಿಸುವ ಇರಾನ್ನ PGSA ನಿರ್ಧಾರವನ್ನು ಪ್ರಶ್ನಿಸಿ ಯಾವುದೇ ನ್ಯಾಯಾಲಯ ಅಥವಾ ಅಂತರರಾಷ್ಟ್ರೀಯ ವೇದಿಕೆಗಳಲ್ಲಿ ಆಕ್ಷೇಪಿಸುವ ಅಥವಾ ಸವಾಲು ಹಾಕುವ ಹಕ್ಕನ್ನು ಹಡಗು ಸಂಸ್ಥೆಗಳು ಶಾಶ್ವತವಾಗಿ ತ್ಯಜಿಸಬೇಕಾಗುತ್ತದೆ.” ಇದು ಹಡಗು ಕಂಪನಿಗಳಲ್ಲಿ ಸಣ್ಣ ಮಟ್ಟದ ಆತಂಕ ಮೂಡಿಸಿದೆ. ಆದರೂ, ಜಾಗತಿಕ ತೈಲ ಮಾರುಕಟ್ಟೆ ಯಥಾಸ್ಥಿತಿಗೆ ಬರಲು ಈ ಮಾರ್ಗ ಮುಕ್ತವಾಗುತ್ತಿರುವುದು ಸದ್ಯಕ್ಕೆ ಸಮಾಧಾನದ ಸಂಗತಿಯಾಗಿದೆ.
