ನವದೆಹಲಿ: ಸಂಸತ್ತಿನಲ್ಲಿ ಮೂರನೇ ಎರಡರಷ್ಟು (2/3) ಬಹುಮತವನ್ನು ಸಾಧಿಸಲು ಮತ್ತು ದೇಶದ ರಾಜಕೀಯ ಚಿತ್ರಣವನ್ನೇ ಬದಲಿಸಬಲ್ಲ ಪ್ರಮುಖ ಸಾಂವಿಧಾನಿಕ ತಿದ್ದುಪಡಿಗಳನ್ನು ಜಾರಿಗೆ ತರಲು ಕೇಂದ್ರ ಆಡಳಿತಾರೂಢ ಬಿಜೆಪಿ ನೇತೃತ್ವದ ಎನ್ಡಿಎ ಮೈತ್ರಿಕೂಟ ತೆರೆಮರೆಯಲ್ಲಿ ಭಾರಿ ಕಾರ್ಯತಂತ್ರ ರೂಪಿಸುತ್ತಿದೆ ಎಂದು ಮೂಲಗಳು ತಿಳಿಸಿವೆ. ಮುಂದಿನ ತಿಂಗಳು ಆರಂಭವಾಗಲಿರುವ ಸಂಸತ್ತಿನ ಮುಂಗಾರು ಅಧಿವೇಶನದ ವೇಳೆಗೆ ಅಗತ್ಯವಿರುವ ಸಂಖ್ಯಾಬಲವನ್ನು ಕ್ರೋಢೀಕರಿಸುವ ವಿಶ್ವಾಸದಲ್ಲಿ ಬಿಜೆಪಿ ನಾಯಕರಿದ್ದಾರೆ ಎನ್ನಲಾಗಿದೆ.
ಬಿಜೆಪಿ ಈ ಭಾರಿ ಬಹುಮತವನ್ನು ಮುಖ್ಯವಾಗಿ ಎರಡು ಪ್ರಮುಖ ಸಾಂವಿಧಾನಿಕ ಬದಲಾವಣೆಗಳಿಗಾಗಿ ಬಳಸಿಕೊಳ್ಳಲು ಯೋಜಿಸಿದೆ:
ಕ್ಷೇತ್ರ ಮರುವಿಂಗಡಣೆ (Delimitation): ಮಹಿಳಾ ಮೀಸಲಾತಿ ಜಾರಿಯನ್ನು ದೇಶದ ಲೋಕಸಭಾ ಕ್ಷೇತ್ರಗಳ ಮರುವಿಂಗಡಣೆಯೊಂದಿಗೆ ಲಿಂಕ್ ಮಾಡುವುದು.
ಒಂದು ದೇಶ, ಒಂದು ಚುನಾವಣೆ (One Nation, One Election): 2029ರ ಸಾರ್ವತ್ರಿಕ ಚುನಾವಣೆಗಿಂತ ಮುಂಚಿತವಾಗಿ ದೇಶಾದ್ಯಂತ ಲೋಕಸಭೆ ಮತ್ತು ಎಲ್ಲಾ ರಾಜ್ಯಗಳ ವಿಧಾನಸಭಾ ಚುನಾವಣೆಗಳನ್ನು ಏಕಕಾಲದಲ್ಲಿ ನಡೆಸಲು ಕಾಯ್ದೆ ರೂಪಿಸುವುದು.
540 ಸದಸ್ಯ ಬಲದ ಪ್ರಸ್ತುತ ಲೋಕಸಭೆಯಲ್ಲಿ 2/3 ಬಹುಮತ ಪಡೆಯಲು 360 ಮತಗಳ ಅಗತ್ಯವಿದೆ. ಪ್ರಸ್ತುತ ಎನ್ಡಿಎ ಮೈತ್ರಿಕೂಟದ ಬಲ 293 ಆಗಿದೆ. ಟಿಎಂಸಿ (TMC) ಪಕ್ಷದ 28 ಸಂಸದರ ಪೈಕಿ 20 ಸಂಸದರು ಹಾಗೂ ಶಿವಸೇನಾ (UBT) ಪಕ್ಷದ 9 ಸಂಸದರ ಪೈಕಿ 6 ಸಂಸದರು ಬಂಡಾಯವೆದ್ದು ಆಡಳಿತ ಪಕ್ಷದತ್ತ ಮುಖ ಮಾಡುವ ನಿರೀಕ್ಷೆಯಿದೆ. ಇದು ಮೈತ್ರಿಕೂಟದ ಬಲವನ್ನು 319ಕ್ಕೆ ಏರಿಸಲಿದೆಯಾದರೂ, ಇನ್ನೂ ಬಹುಮತಕ್ಕೆ ಕೊರತೆಯಿರುತ್ತದೆ. ಆದರೆ, ಸಮಾಜವಾದಿ ಪಕ್ಷ ಸೇರಿದಂತೆ ಇತರೆ ವಿರೋಧ ಪಕ್ಷಗಳಲ್ಲೂ ಮುಂಬರುವ ದಿನಗಳಲ್ಲಿ ಭಾರಿ “ರಾಜಕೀಯ ಭೂಕಂಪ” ಸಂಭವಿಸಲಿದ್ದು, ವಿಪಕ್ಷಗಳು ದುರ್ಬಲಗೊಳ್ಳಲಿವೆ ಎಂದು ಬಿಜೆಪಿ ಮೂಲಗಳು ಖಾಸಗಿಯಾಗಿ ವಿಶ್ವಾಸ ವ್ಯಕ್ತಪಡಿಸಿವೆ.
ಇನ್ನು 245 ಸದಸ್ಯ ಬಲದ ರಾಜ್ಯಸಭೆಯಲ್ಲಿ 2/3 ಬಹುಮತಕ್ಕೆ 164 ಮತಗಳ ಅಗತ್ಯವಿದ್ದು, ಎನ್ಡಿಎ ಈಗಾಗಲೇ 152ರ ಸಂಖ್ಯಾಬಲದೊಂದಿಗೆ ಗುರಿಯ ಸಮೀಪದಲ್ಲಿದೆ. ಇತ್ತೀಚೆಗೆ ಆಮ್ ಆದ್ಮಿ ಪಕ್ಷದ (AAP) 7 ಸಂಸದರು ಬಂಡಾಯವೆದ್ದಿರುವುದು ಮತ್ತು ಜೂನ್ 18ರ ಚುನಾವಣಾ ಫಲಿತಾಂಶಗಳು ಬಿಜೆಪಿಗೆ ಪ್ಲಸ್ ಪಾಯಿಂಟ್ ಆಗಿವೆ.
