ಬೆಂಗಳೂರು: ಸ್ವಂತ ಮನೆ ಎಂಬುದು ಪ್ರತಿಯೊಬ್ಬರ ಜೀವಮಾನದ ಕನಸು. ಆದರೆ, ಆ ಕನಸನ್ನು ನನಸಾಗಿಸಲು ತೆಗೆದುಕೊಳ್ಳುವ ‘ಹೋಮ್ ಲೋನ್’ (Home Loan) ನಮ್ಮನ್ನು ಮುಂದಿನ 20 ವರ್ಷಗಳ ಕಾಲ ಆರ್ಥಿಕ ಸಂಕಷ್ಟಕ್ಕೆ ತಳ್ಳುತ್ತದೆ. ನಾವು ಬ್ಯಾಂಕಿನಿಂದ ಪಡೆದ ಅಸಲಿಗಿಂತ, ನಾವು ಕಟ್ಟುವ ಬಡ್ಡಿಯೇ ಹೆಚ್ಚಾಗಿರುವುದು ಆತಂಕಕಾರಿ ವಿಷಯ.
ಉದಾಹರಣೆಗೆ, ನೀವು 50 ಲಕ್ಷ ರೂಪಾಯಿ ಸಾಲ ಪಡೆದರೆ, 20 ವರ್ಷಗಳಲ್ಲಿ ಬರೋಬ್ಬರಿ 55 ಲಕ್ಷ ರೂಪಾಯಿಗಳನ್ನು ಬಡ್ಡಿಯ ರೂಪದಲ್ಲೇ ಪಾವತಿಸುತ್ತೀರಿ! ಈ ಆರ್ಥಿಕ ಹೊರೆಯನ್ನು ಕಡಿಮೆ ಮಾಡಿ, ಸಾಲದ ಅವಧಿಯನ್ನು ಅರ್ಧಕ್ಕೆ ಇಳಿಸಲು ಆರ್ಥಿಕ ತಜ್ಞರು ಕೆಲವು ಅದ್ಭುತ ತಂತ್ರಗಳನ್ನು ಹಂಚಿಕೊಂಡಿದ್ದಾರೆ. ಅವು ಇಲ್ಲಿವೆ:
1. 13ನೇ EMI ಮ್ಯಾಜಿಕ್!
ಸಾಮಾನ್ಯವಾಗಿ ನಾವು ವರ್ಷಕ್ಕೆ 12 ಇಎಂಐಗಳನ್ನು ಪಾವತಿಸುತ್ತೇವೆ. ಆದರೆ, ವರ್ಷಕ್ಕೊಮ್ಮೆ ನಿಮ್ಮ ಶಕ್ತಿಯನುಸಾರ ಒಂದು ಹೆಚ್ಚುವರಿ ಇಎಂಐ (13ನೇ ಇಎಂಐ) ಅನ್ನು ಮುಂಚಿತವಾಗಿ ಪಾವತಿಸಿ. ಈ ಹಣ ನೇರವಾಗಿ ನಿಮ್ಮ ‘ಅಸಲು’ (Principal) ಮೊತ್ತವನ್ನು ಕಡಿಮೆ ಮಾಡುತ್ತದೆ. ಸಾಲ ಪಡೆದ ಮೊದಲ ಐದು ವರ್ಷಗಳಲ್ಲಿ ಹೀಗೆ ಮಾಡುವುದರಿಂದ ಬಡ್ಡಿಯ ಹೊರೆ ಗಣನೀಯವಾಗಿ ಇಳಿಕೆಯಾಗಿ, ನಿಮ್ಮ ಸಾಲದ ಅವಧಿ 6 ರಿಂದ 7 ವರ್ಷ ಮುಂಚಿತವಾಗಿಯೇ ಮುಕ್ತಾಯಗೊಳ್ಳುತ್ತದೆ.
2. EMI ಜೊತೆಗೆ SIP ಹೂಡಿಕೆ
ನೀವು ಪ್ರತಿ ತಿಂಗಳು ಪಾವತಿಸುವ EMI ಮೊತ್ತದ ಕನಿಷ್ಠ ಶೇ. 10ರಷ್ಟು ಹಣವನ್ನು ಉತ್ತಮ ಮ್ಯೂಚುವಲ್ ಫಂಡ್ SIP ನಲ್ಲಿ ಹೂಡಿಕೆ ಮಾಡಿ. ಉದಾಹರಣೆಗೆ ನಿಮ್ಮ EMI 44,000 ರೂಪಾಯಿ ಆಗಿದ್ದರೆ, ಕೇವಲ 4,400 ರೂಪಾಯಿಗಳನ್ನು SIP ಮಾಡಿ. 20 ವರ್ಷಗಳ ನಂತರ ಈ SIP ಮೂಲಕ ಬರುವ ಲಾಭವು ನೀವು ಬ್ಯಾಂಕಿಗೆ ಕಟ್ಟಿದ ಒಟ್ಟು ಬಡ್ಡಿಗೆ ಸಮನಾಗಿರುತ್ತದೆ. ಅಂದರೆ ತಾಂತ್ರಿಕವಾಗಿ ನಿಮ್ಮ ಮನೆ ನಿಮಗೆ ಉಚಿತವಾಗಿ ಸಿಕ್ಕಂತೆಯೇ ಸರಿ!
3. ಸಮಾಂತರ ಆಸ್ತಿ ಕ್ರೋಢೀಕರಣ
ಬೋನಸ್ ಅಥವಾ ಹೆಚ್ಚುವರಿ ಆದಾಯ ಬಂದಾಗ ಅದನ್ನು ನೇರವಾಗಿ ಸಾಲ ತೀರಿಸಲು ಬಳಸುವ ಬದಲು, ಇಂಡೆಕ್ಸ್ ಫಂಡ್ಗಳಲ್ಲಿ ಹೂಡಿಕೆ ಮಾಡಿ. ಹೀಗೆ ಮಾಡುವುದರಿಂದ 8-10 ವರ್ಷಗಳಲ್ಲಿ ಒಂದು ದೊಡ್ಡ ಮೊತ್ತದ ನಿಧಿ ತಯಾರಾಗುತ್ತದೆ. ಆ ಹಣವನ್ನು ಬಳಸಿ ನಿಮ್ಮ ಬಾಕಿ ಇರುವ ಸಾಲವನ್ನು ಒಂದೇ ಬಾರಿ ಕ್ಲಿಯರ್ ಮಾಡಬಹುದು. ಇದರಿಂದ 20-25 ವರ್ಷಗಳ ಸಾಲ ಕೇವಲ 10 ವರ್ಷಗಳಲ್ಲಿ ತೀರುತ್ತದೆ.
4. ಮುನ್ನೆಚ್ಚರಿಕೆಯ ಯೋಜನೆ
ಮನೆ ಖರೀದಿಸುವ ಕನಿಷ್ಠ 4-5 ವರ್ಷಗಳ ಮುಂಚೆಯೇ ಯೋಜನೆ ರೂಪಿಸಿ. ನೀವು ಕಟ್ಟಲು ಉದ್ದೇಶಿಸಿರುವ EMI ಮೊತ್ತವನ್ನೇ ಈಗಿನಿಂದಲೇ SIP ರೂಪದಲ್ಲಿ ಉಳಿತಾಯ ಮಾಡಿದರೆ, ಡೌನ್ ಪೇಮೆಂಟ್ ಮತ್ತು ನೋಂದಣಿ ವೆಚ್ಚದ ಹೊರೆ ಕಡಿಮೆಯಾಗುತ್ತದೆ. ಅಲ್ಲದೆ, ಸಾಲದ ಮೇಲೆ ಮತ್ತೆ ‘ಟಾಪ್-ಅಪ್’ ಸಾಲ ತೆಗೆದುಕೊಳ್ಳದಂತೆ ಹಣಕಾಸು ತಜ್ಞರು ಎಚ್ಚರಿಸಿದ್ದಾರೆ.
ನೆನಪಿಡಿ: ಸಣ್ಣ ಉಳಿತಾಯ ಮತ್ತು ಶಿಸ್ತುಬದ್ಧ ಹೂಡಿಕೆ ನಿಮ್ಮನ್ನು ಸಾಲದ ಸುಳಿಯಿಂದ ಬೇಗನೆ ಮುಕ್ತಗೊಳಿಸಿ, ಆರ್ಥಿಕ ಸ್ವಾತಂತ್ರ್ಯವನ್ನು ನೀಡುತ್ತದೆ.
