ಅಮೆರಿಕದ ಸ್ವಾತಂತ್ರ್ಯ ದಿನಾಚರಣೆಯ 250ನೇ ವರ್ಷದ ಸಂಭ್ರಮಾಚರಣೆಯ ಅಂಗವಾಗಿ ನವದೆಹಲಿಯ ಅಮೆರಿಕ ರಾಯಭಾರ ಕಚೇರಿಯಲ್ಲಿ ನಡೆದ ವಿಶೇಷ ಕಾರ್ಯಕ್ರಮದಲ್ಲಿ ಭಾನುವಾರ ಲೈವ್ ಫೋನ್ ಕಾಲ್ (Live Phone Call) ಮೂಲಕ ಮಾತನಾಡಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಭಾರತಕ್ಕೆ ತಮ್ಮ ಬಲವಾದ ಬೆಂಬಲದ ಸಂದೇಶವನ್ನು ರವಾನಿಸಿದ್ದಾರೆ.
ಭಾರತ ಮತ್ತು ಅಮೆರಿಕದ ಹಿರಿಯ ನಾಯಕರು ಉಪಸ್ಥಿತರಿದ್ದ ಸಭೆಯನ್ನುದ್ದೇಶಿಸಿ ಮಾತನಾಡಿದ ಟ್ರಂಪ್, “ಭಾರತವು ನನ್ನ ಮತ್ತು ಯುನೈಟೆಡ್ ಸ್ಟೇಟ್ಸ್ (ಅಮೆರಿಕ) ಮೇಲೆ ಸಂಪೂರ್ಣವಾಗಿ ಭರವಸೆ ಇಡಬಹುದು” ಎಂದು ಹೇಳಿದರು.
’ಭಾರತ ನನ್ನ ಮೇಲೆ 100 ಪ್ರತಿಶತ ನಂಬಿಕೆ ಇಡಬಹುದು’
ಕಾರ್ಯಕ್ರಮದಲ್ಲಿ ಸ್ಪೀಕರ್ಫೋನ್ (Speakerphone) ಕರೆಯ ಮೂಲಕ ಮಾತನಾಡಿದ ಟ್ರಂಪ್, ಭಾರತ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು. ಇದೇ ವೇಳೆ ಉಭಯ ದೇಶಗಳ ನಡುವೆ ಬೆಳೆಯುತ್ತಿರುವ ನಿಕಟ ಬಾಂಧವ್ಯವನ್ನು ಅವರು ಒತ್ತಿ ಹೇಳಿದರು.
”ನನಗೆ ಭಾರತ ಎಂದರೆ ತುಂಬಾ ಇಷ್ಟ… ನನಗೆ ಪ್ರಧಾನಿ ಎಂದರೆ ತುಂಬಾ ಗೌರವವಿದೆ. ಮೋದಿ ಒಬ್ಬ ಶ್ರೇಷ್ಠ ನಾಯಕ. ಅವರು ನನ್ನ ಆತ್ಮೀಯ ಮಿತ್ರ. ಇಲ್ಲಿ (ಅಮೆರಿಕದಲ್ಲಿ) ನನಗೆ ಈಗ ಮುಂಜಾನೆಯಾಗಿದ್ದು, ಅಲ್ಲಿ (ಭಾರತದಲ್ಲಿ) ಸಂಜೆಯಾಗಿರುವ ಈ ಸಂದರ್ಭದಲ್ಲಿ ನಾನು ನಿಮ್ಮೆಲ್ಲರಿಗೂ ಶುಭ ಸಂಜೆ ಹೇಳಲು ಬಯಸುತ್ತೇನೆ. ನೀವು ನಿಜಕ್ಕೂ ಅದ್ಭುತ. ನಾವು ಭಾರತಕ್ಕೆ ಎಂದಿಗೂ ಇಷ್ಟೊಂದು ಹತ್ತಿರವಾಗಿರಲಿಲ್ಲ. ಭಾರತ ಮತ್ತು ನಮ್ಮ ದೇಶದ ಮೇಲೆ ನೀವು 100 ಪ್ರತಿಶತ ಭರವಸೆ ಇಡಬಹುದು” ಎಂದು ಟ್ರಂಪ್ ಘೋಷಿಸಿದರು.
ದೆಹಲಿಯ ಯುಎಸ್ ರಾಯಭಾರ ಕಚೇರಿ ಆಯೋಜಿಸಿದ್ದ ಈ ವಿಶೇಷ ಸಭೆಯಲ್ಲಿ ರಾಜತಾಂತ್ರಿಕ, ರಾಜಕೀಯ ಮತ್ತು ಉದ್ಯಮ ರಂಗದ ಸುಮಾರು 1,500 ಕ್ಕೂ ಹೆಚ್ಚು ಗಣ್ಯರು ಭಾಗವಹಿಸಿದ್ದರು.
ಅಮೆರಿಕ ಆರ್ಥಿಕತೆ ಮತ್ತು ಭಾರತದ ಹಿತಾಸಕ್ತಿಗಳಿಗೆ ಬೆಂಬಲ
ಮಾತುಕತೆಯ ಸಂದರ್ಭದಲ್ಲಿ ಅಮೆರಿಕದ ಆರ್ಥಿಕತೆಯ ಬಲವನ್ನು ಪ್ರಸ್ತಾಪಿಸಿದ ಟ್ರಂಪ್, ಭಾರತಕ್ಕೆ ತಮ್ಮ ಆಡಳಿತದಿಂದ ಸಂಪೂರ್ಣ ಬೆಂಬಲ ಸಿಗುವುದನ್ನು ಮುಂದುವರಿಯುತ್ತದೆ ಎಂದು ಭರವಸೆ ನೀಡಿದರು.
”ನಮ್ಮದು ದಾಖಲೆಯ ಆರ್ಥಿಕತೆ ಮತ್ತು ದಾಖಲೆಯ ಶೇರು ಮಾರುಕಟ್ಟೆಯಾಗಿದೆ. ಭಾರತಕ್ಕೆ ಏನು ಬೇಕೋ, ಅದು ಸಿಗುತ್ತದೆ. ನಾನು ಪ್ರಧಾನಿ ಮೋದಿಯವರ ಬಹುದೊಡ್ಡ ಅಭಿಮಾನಿ” ಎಂದು ಅವರು ಹೇಳಿದರು. ಭಾರತ-ಅಮೆರಿಕ ಸಂಬಂಧಗಳ ಬಗ್ಗೆ ಅವರ ಈ ಪ್ರಬಲ ಬೆಂಬಲದ ಮಾತುಗಳು ಮತ್ತು ಪ್ರಧಾನಿ ಮೋದಿ ಅವರೊಂದಿಗಿನ ವೈಯಕ್ತಿಕ ಸ್ನೇಹವು ರಾಯಭಾರ ವಲಯದಲ್ಲಿ ತೀವ್ರ ಗಮನ ಸೆಳೆದಿದೆ.
