ರಾಯಗಢ್ : ಮಹಾರಾಷ್ಟ್ರದ ರಾಯಗಢ್ ಜಿಲ್ಲೆಯ ಅಂಬೇನಳಿ ಘಾಟ್ ಬಳಿ ಭೀಕರ ರಸ್ತೆ ಅಪಘಾತ ಸಂಭವಿಸಿದ್ದು, ಸ್ಕಾರ್ಪಿಯೋ ಕಾರು ಆಳವಾದ ಕಂದಕಕ್ಕೆ ಉರುಳಿ ಬಿದ್ದ ಪರಿಣಾಮ ಎಂಟು ಮಂದಿ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.
ಮಹಲಿಬಲೇಶ್ವರ ಮತ್ತು ಪೋಲಾದ್ಪುರ ನಡುವೆ ಇರುವ ಅಂಬೇನಳಿ ಘಾಟ್ನಲ್ಲಿ ಈ ಭೀಕರ ದುರಂತ ನಡೆದಿದೆ. ಕಾರಿನಲ್ಲಿದ್ದ ಎಂಟೂ ಪ್ರಯಾಣಿಕರು ಮೃತಪಟ್ಟಿದ್ದಾರೆ ಎಂದು ಪ್ರಾಥಮಿಕ ವರದಿಗಳು ತಿಳಿಸಿವೆ. ಪ್ರಸ್ತುತ ಶೋಧ ಹಾಗೂ ರಕ್ಷಣಾ ತಂಡಗಳು ಎರಡು ಮೃತದೇಹಗಳನ್ನು ಹೊರತೆಗೆಯುವಲ್ಲಿ ಯಶಸ್ವಿಯಾಗಿವೆ.
ಅಪಘಾತಕ್ಕೀಡಾದ ಸ್ಕಾರ್ಪಿಯೋ ಎಸ್ಯುವಿ ಕಾರು ಸತಾರಾ ಜಿಲ್ಲೆಯ ಆಸಗಾಂವ್ ಗ್ರಾಮಕ್ಕೆ ಸೇರಿದ್ದಾಗಿದೆ. ಮೃತರು ದಾಪೋಲಿಯಿಂದ ಸತಾರಾ ಕಡೆಗೆ ಪ್ರಯಾಣಿಸುತ್ತಿದ್ದಾಗ ನಿಯಂತ್ರಣ ತಪ್ಪಿದ ಕಾರು ಸುಮಾರು 500 ರಿಂದ 700 ಅಡಿ ಆಳದ ಕಂದಕಕ್ಕೆ ಬಿದ್ದಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ. ಮೃತರೆಲ್ಲರೂ ಸತಾರಾ ಮೂಲದವರಾಗಿದ್ದು, ಕೊಂಕಣ ಅಥವಾ ಮಹಾಬಲೇಶ್ವರಕ್ಕೆ ಪ್ರವಾಸಕ್ಕೆಂದು ತೆರಳಿದ್ದರು ಎಂದು ಶಂಕಿಸಲಾಗಿದೆ.
ಮೃತರ ವಿವರಗಳು:
ಅಂಶ್ ಸಮೀರ್ ಚವಾಣ್ (19 ವರ್ಷ), ನಿವಾಸಿ: ಬೋರಗಾಂವ್, ಚಿಪ್ಲೂನ್ ತಾಲೂಕು, ರತ್ನಗಿರಿ ಜಿಲ್ಲೆ.
ರಿತೇಶ್ ರಾಜೇಂದ್ರ ಲೋಖಂಡೆ (22 ವರ್ಷ), ನಿವಾಸಿ: ಆಸಗಾಂವ್, ಸತಾರಾ ತಾಲೂಕು, ಸತಾರಾ ಜಿಲ್ಲೆ.
ಸುಹಾಸ್ ಜಿತೇಂದ್ರ ಲೋಖಂಡೆ (20 ವರ್ಷ), ನಿವಾಸಿ: ಆಸಗಾಂವ್, ಸತಾರಾ ತಾಲೂಕು, ಸತಾರಾ ಜಿಲ್ಲೆ.
ಉತ್ಕರ್ಷ್ ಆನಂದ್ ಶಿಂಗ್ಟೆ (21 ವರ್ಷ), ನಿವಾಸಿ: ಮರ್ದೆ, ಸತಾರಾ ತಾಲೂಕು, ಸತಾರಾ ಜಿಲ್ಲೆ.
ನಿಖಿಲ್ ಅಭಿಮನ್ಯು ಶಿಂಗ್ಟೆ (25 ವರ್ಷ), ನಿವಾಸಿ: ಮರ್ದೆ, ಸತಾರಾ ತಾಲೂಕು, ಸತಾರಾ ಜಿಲ್ಲೆ.
ಮಹೇಶ್ ಅನಿಲ್ ಪವಾರ್ (25 ವರ್ಷ), ನಿವಾಸಿ: ಆಸಗಾಂವ್, ಸತಾರಾ ತಾಲೂಕು, ಸತಾರಾ ಜಿಲ್ಲೆ.
ಆದಿತ್ಯ ಅಶೋಕ್ ಸಾಳುಂಖೆ (21 ವರ್ಷ), ನಿವಾಸಿ: ಆಸಗಾಂವ್, ಸತಾರಾ ತಾಲೂಕು, ಸತಾರಾ ಜಿಲ್ಲೆ.
ರಾಜೇಶ್ ಅಶೋಕ್ ಕಟ್ಕರ್ (35 ವರ್ಷ), ನಿವಾಸಿ: ಖಟಾವ್, ಖಟಾವ್ ತಾಲೂಕು, ಸತಾರಾ ಜಿಲ್ಲೆ.
ರಾಯಗಢ್ ಮತ್ತು ಸತಾರಾ ಜಿಲ್ಲೆಗಳ ಗಡಿಯಲ್ಲಿರುವ ಅಂಬೇನಳಿ ಘಾಟ್ ಅತ್ಯಂತ ಅಪಾಯಕಾರಿ ವಲಯವಾಗಿದ್ದು, ಇಲ್ಲಿ ಪದೇ ಪದೇ ರಸ್ತೆ ಅಪಘಾತಗಳು ಸಂಭವಿಸುತ್ತಿರುತ್ತವೆ.
ಘಟನಾ ಸ್ಥಳಕ್ಕೆ ಸ್ಥಳೀಯ ಆಡಳಿತ, ಚಾರಣಿಗರು (Trekkers) ಮತ್ತು ರಕ್ಷಣಾ ತಂಡಗಳು ಧಾವಿಸಿವೆ. ಆದರೆ, ಕಂದಕವು ತೀವ್ರ ಆಳವಾಗಿರುವುದು ಮತ್ತು ದುರ್ಗಮ ಪ್ರದೇಶವಾಗಿರುವುದರಿಂದ ಕಾರ್ಯಾಚರಣೆಗೆ ತೀವ್ರ ಅಡಚಣೆ ಉಂಟಾಗಿದೆ. ರಾತ್ರಿಯ ಕತ್ತಲಿನಲ್ಲಿ ಮೃತದೇಹಗಳ ಪತ್ತೆ ಕಾರ್ಯ ಕಠಿಣವಾಗಿತ್ತು. ಸದ್ಯ ಮುಂಜಾನೆ ಬೆಳಕು ಹರಿದಿರುವುದರಿಂದ ರಕ್ಷಣಾ ಕಾರ್ಯಾಚರಣೆ ಮತ್ತಷ್ಟು ಚುರುಕುಗೊಂಡಿದೆ ಮತ್ತು ಉಳಿದ ಮೃತದೇಹಗಳಿಗಾಗಿ ಹುಡುಕಾಟ ಮುಂದುವರಿದಿದೆ.
