ನವದೆಹಲಿ: ಮಧ್ಯಪ್ರಾಚ್ಯದಲ್ಲಿ ಮತ್ತೊಮ್ಮೆ ಯುದ್ಧದ ಕಿಡಿ ಹೊತ್ತಿಕೊಂಡಿದೆ. ಬಹರೈನ್ನಲ್ಲಿರುವ ಅಮೆರಿಕಾದ ಪ್ರಮುಖ ಸೇನಾ ನೆಲೆಯ ಮೇಲೆ ಭೀಕರ ಡ್ರೋನ್ ದಾಳಿ ನಡೆದಿದ್ದು, ಇರಾನ್ ನಡೆಸಿದ ಈ ದಿಢೀರ್ ವಾಯುದಾಳಿಗೆ ಅಮೆರಿಕ ಸೇನಾ ನೆಲೆ ಹೊತ್ತಿ ಉರಿದಿದೆ ಎಂದು ವರದಿಯಾಗಿದೆ. ಬಹರೈನ್ನ ಇಸಾ ಏರ್ಬೇಸ್ (Isa Air Base) ಅನ್ನು ಗುರಿಯಾಗಿಸಿಕೊಂಡು ಇರಾನ್ ಈ ಭೀಕರ ದಾಳಿಯನ್ನು ಸಂಘಟಿಸಿದೆ.
ಪ್ರತಿದಾಳಿ ನಡೆಸಿದ ಇರಾನ್: ಇತ್ತೀಚೆಗಷ್ಟೇ ಇರಾನ್ನ ಕರಾಜ್ ಮತ್ತು ಹೊರ್ಮುಝ್ ಪ್ರದೇಶಗಳ ಮೇಲೆ ನಡೆದಿದ್ದ ದಾಳಿಗೆ ಪ್ರತಿಯಾಗಿ ಇರಾನ್ ಈ ಆಪರೇಷನ್ ಕೈಗೊಂಡಿದೆ ಎನ್ನಲಾಗಿದೆ. ತನ್ನ ದೇಶದ ಮೇಲಿನ ದಾಳಿಗೆ ತಕ್ಕ ಪಾಠ ಕಲಿಸಲು ಸಜ್ಜಾಗಿದ್ದ ಇರಾನ್, ಅಮೆರಿಕಾದ ಮಿಲಿಟರಿ ತಾಣಗಳನ್ನೇ ಟಾರ್ಗೆಟ್ ಮಾಡಿ ಈ ಪ್ರತಿದಾಳಿ ನೆರವೇರಿಸಿದೆ. ಈ ದಾಳಿಯಿಂದಾಗಿ ಬಹರೈನ್ ವಾಯುನೆಲೆಯಲ್ಲಿ ಭಾರಿ ಪ್ರಮಾಣದ ಆಸ್ತಿಪಾಸ್ತಿ ನಷ್ಟ ಹಾಗೂ ಹಾನಿ ಸಂಭವಿಸಿದೆ ಎಂದು ಮೂಲಗಳು ತಿಳಿಸಿವೆ.
ಕುವೈತ್ ನೆಲೆಗಳ ಮೇಲೂ ಏಕಕಾಲಕ್ಕೆ ದಾಳಿ: ಇರಾನ್ನ ಆಕ್ರೋಶ ಕೇವಲ ಬಹರೈನ್ಗೆ ಮಾತ್ರ ಸೀಮಿತವಾಗಿಲ್ಲ. ಇದೇ ವೇಳೆ ಕುವೈತ್ನಲ್ಲಿರುವ ಅಮೆರಿಕಾದ ಆಯಕಟ್ಟಿನ ಸೇನಾ ನೆಲೆಗಳ ಮೇಲೂ ಇರಾನ್ ಡ್ರೋನ್ಗಳು ಮುಗಿಬಿದ್ದಿವೆ. ಕುವೈತ್ನಲ್ಲಿರುವ ಅಮೆರಿಕಾದ ಎರಡು ಪ್ರಮುಖ ವಾಯು ನೆಲೆಗಳ ಮೇಲೆ ಏಕಕಾಲಕ್ಕೆ ಇರಾನ್ ಪಡೆಗಳು ದಾಳಿ ನಡೆಸಿ ಧ್ವಂಸಗೊಳಿಸಿವೆ.
ಅಲಿ ಅಲ್ ಸಲೀಂ ಮತ್ತು ಅಹಮದ್ ಜಬೇರ್ ವಾಯುನೆಲೆಗಳು ಧ್ವಂಸ: ಕುವೈತ್ನಲ್ಲಿರುವ ಅತ್ಯಂತ ಸುರಕ್ಷಿತ ಎನ್ನಲಾಗುವ ‘ಅಲಿ ಅಲ್ ಸಲೀಂ’ (Ali Al Salem Air Base) ಮತ್ತು ‘ಅಹಮದ್ ಅಲ್ ಜಬೇರ್’ (Ahmad al-Jaber Air Base) ವಾಯು ನೆಲೆಗಳ ಮೇಲೆ ಇರಾನ್ ಪಡೆಗಳು ಏಕಕಾಲದಲ್ಲಿ ಭೀಕರವಾಗಿ ದಾಳಿ ಮಾಡಿವೆ. ಈ ಎರಡೂ ವಾಯುನೆಲೆಗಳು ಅಮೆರಿಕಾದ ವಾಯುಸೇನಾ ಕಾರ್ಯಾಚರಣೆಗೆ ಅತ್ಯಂತ ಪ್ರಮುಖವಾಗಿದ್ದವು. ಇರಾನ್ನ ಈ ರಣತಂತ್ರದ ದಾಳಿಯು ಅಮೆರಿಕಾಗೆ ದೊಡ್ಡ ಆಘಾತವನ್ನು ನೀಡಿದೆ.
ಮಧ್ಯಪ್ರಾಚ್ಯದಲ್ಲಿ ತೀವ್ರ ಉದ್ವಿಗ್ನತೆ: ಇರಾನ್ನ ಈ ಸರಣಿ ಡ್ರೋನ್ ದಾಳಿಗಳಿಂದಾಗಿ ಮಧ್ಯಪ್ರಾಚ್ಯದಲ್ಲಿ ಪರಿಸ್ಥಿತಿ ಕೈಮೀರಿ ಹೋಗಿದ್ದು, ಯುದ್ಧದ ಭೀತಿ ಎದುರಾಗಿದೆ. ಅಮೆರಿಕಾದ ರಕ್ಷಣಾ ಇಲಾಖೆ ಹಾಗೂ ಸೇನಾ ಹಿರಿಯ ಅಧಿಕಾರಿಗಳು ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದು, ಮುಂದಿನ ನಡೆ ಏನಿರಬಹುದು ಎಂಬ ಕುತೂಹಲ ಮೂಡಿದೆ. ಇರಾನ್ನ ಈ ದಿಟ್ಟ ಸರಣಿ ದಾಳಿಗೆ ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರಗಳು ಹೇಗೆ ಪ್ರತಿಕ್ರಿಯಿಸಲಿವೆ ಎಂಬುದರ ಮೇಲೆ ಮುಂದಿನ ಜಾಗತಿಕ ಸ್ಥಿತ್ಯಂತರಗಳು ನಿರ್ಧಾರವಾಗಲಿವೆ.
