ಹಾವೇರಿ : ಹಾವೇರಿ ಜಿಲ್ಲೆಯಲ್ಲಿ ಅತ್ಯಂತ ದುಃಖದಾಯಕ ಮತ್ತು ಕರುಳು ಹಿಂಡುವ ಘಟನೆಯೊಂದು ಸಂಭವಿಸಿದೆ. ಹೊಂಡಕ್ಕೆ ಬಿದ್ದ ತನ್ನ ದಿವ್ಯಾಂಗ (ವಿಕಲಚೇತನ) ಮಗನನ್ನು ರಕ್ಷಿಸಲು ಹೋಗಿ ತಂದೆಯೂ ಸಹ ನೀರಿನಲ್ಲಿ ಮುಳುಗಿ ಪ್ರಾಣ ಕಳೆದುಕೊಂಡಿರುವ ದಾರುಣ ಘಟನೆ ಹಾವೇರಿ ತಾಲೂಕಿನ ಆಲದಕಟ್ಟೆ ಗ್ರಾಮದಲ್ಲಿ ನಡೆದಿದೆ.
ಮೃತರನ್ನು ಆಲದಕಟ್ಟೆ ಗ್ರಾಮದ ನಿವಾಸಿ ಶಂಭುಲಿಂಗ ಹಂಸಬಾವಿ (40) ಮತ್ತು ಅವರ ಎಂಟು ವರ್ಷದ ಪುತ್ರ ಶರತ್ ಶಂಭುಲಿಂಗ ಹಂಸಬಾವಿ ಎಂದು ಗುರುತಿಸಲಾಗಿದೆ. ಎಂದಿನಂತೆ ತಂದೆ-ಮಗ ಇಬ್ಬರೂ ಹಳ್ಳಿಯಲ್ಲಿ ವಾಕಿಂಗ್ ಮಾಡಲು ತೆರಳಿದ್ದಾಗ ಈ ವಿಧಿಲಿಖಿತ ದುರಂತ ಸಂಭವಿಸಿದೆ.
ದುರಂತ ನಡೆದಿದ್ದು ಹೇಗೆ? ಗ್ರಾಮದ ಮಧ್ಯದಲ್ಲಿರುವ ಹೊಂಡವೊಂದರ ಬಳಿ ತಂದೆ ಶಂಭುಲಿಂಗ ಅವರು ತಮ್ಮ ವಿಕಲಚೇತನ ಪುತ್ರ ಶರತ್ನನ್ನು ಕರೆದುಕೊಂಡು ವಾಕಿಂಗ್ ಮಾಡುತ್ತಿದ್ದರು. ಈ ವೇಳೆ ಹೊಂಡದ ಸುತ್ತಲೂ ಹಸಿರು ಪಾಚಿ ಬೆಳೆದಿದ್ದರಿಂದ, ಬಾಲಕ ಶರತ್ ಕಾಲು ಜಾರಿ ದಿಢೀರನೆ ಹೊಂಡದ ನೀರಿಗೆ ಬಿದ್ದಿದ್ದಾನೆ. ಮಗ ನೀರೊಳಗೆ ಮುಳುಗುತ್ತಿರುವುದನ್ನು ಕಂಡು ಆತಂಕಗೊಂಡ ತಂದೆ ಶಂಭುಲಿಂಗ, ಆತನನ್ನು ಹೇಗಾದರೂ ಮಾಡಿ ಬದುಕಿಸಲೇಬೇಕು ಎಂದು ತಕ್ಷಣವೇ ಹೊಂಡಕ್ಕೆ ಧುಮುಕಿದ್ದಾರೆ.
ಕೊನೆಯುಸಿರೆಳೆದ ತಂದೆ-ಮಗ: ಆದರೆ, ಹೊಂಡದಲ್ಲಿ ಹಸಿರು ಪಾಚಿ ಹಾಗೂ ಕೆಸರು ಹೆಚ್ಚಾಗಿದ್ದರಿಂದ ಮತ್ತು ನೀರಿನ ಆಳ ತಿಳಿಯದ ಕಾರಣ ತಂದೆಗೂ ಮಗನನ್ನು ರಕ್ಷಿಸಲು ಸಾಧ್ಯವಾಗಲಿಲ್ಲ. ಮಗನನ್ನು ಸಾವಿನ ದವಡೆಯಿಂದ ಪಾರು ಮಾಡಲು ಹೋರಾಡಿದ ತಂದೆ ಶಂಭುಲಿಂಗ, ಕೊನೆಗೆ ಮಗನೊಂದಿಗೆ ತಾವೂ ಸಹ ನೀರಿನಲ್ಲಿ ಮುಳುಗಿ ಜಲಸಮಾಧಿಯಾಗಿದ್ದಾರೆ.
ಪೊಲೀಸ್ ದೂರು ದಾಖಲು: ಈ ಘಟನೆಯ ವಿಷಯ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಧಾವಿಸಿದ ಹಾವೇರಿ ಶಹರ ಪೊಲೀಸ್ ಠಾಣೆಯ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಸದ್ಯ ಮೃತದೇಹಗಳನ್ನು ಹೊಂಡದಿಂದ ಹೊರತೆಗೆಯಲಾಗಿದ್ದು, ಘಟನೆಗೆ ಸಂಬಂಧಿಸಿದಂತೆ ಹಾವೇರಿ ಶಹರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
