ಬೆಂಗಳೂರು : ರಾಜ್ಯದಾದ್ಯಂತ ವಿವಿಧ ವಲಯಗಳ ಕಾರ್ಮಿಕರ ವೇತನ ತಾರತಮ್ಯವನ್ನು ನಿವಾರಿಸಿ, ಎಲ್ಲರಿಗೂ ಸಮಾನ ಹಾಗೂ ನ್ಯಾಯಸಮ್ಮತ ವೇತನ ಒದಗಿಸುವ ಸದುದ್ದೇಶದಿಂದ ಕರ್ನಾಟಕ ಸರ್ಕಾರವು ಕನಿಷ್ಠ ವೇತನ ಪರಿಷ್ಕರಣೆಯ ಅಂತಿಮ ಅಧಿಸೂಚನೆಯನ್ನು ಪ್ರಕಟಿಸಿದೆ. 2022 ರಿಂದ ಆರಂಭವಾಗಿದ್ದ ಸುದೀರ್ಘ ಕಾನೂನು ಪ್ರಕ್ರಿಯೆ ಹಾಗೂ ಹೈಕೋರ್ಟ್ ನಿರ್ದೇಶನಗಳ ಪರಾಕಾಷ್ಠೆಯಾಗಿ ಈ ಮಹತ್ವದ ಆದೇಶ ಹೊರಬಿದ್ದಿದೆ.
ಹಿನ್ನೆಲೆ ಮತ್ತು ನ್ಯಾಯಾಲಯದ ಆದೇಶ
ಈ ಹಿಂದೆ ರಾಜ್ಯದ 34 ವಿವಿಧ ಉದ್ದಿಮೆಗಳಿಗೆ ಶೇ. 5 ರಿಂದ 10 ರಷ್ಟು ವೇತನ ಹೆಚ್ಚಳ ಮಾಡಿ ಸರ್ಕಾರ ಹೊರಡಿಸಿದ್ದ ಅಧಿಸೂಚನೆಯನ್ನು ಕಾರ್ಮಿಕ ಸಂಘಟನೆಯಾದ ‘ಆಲ್ ಇಂಡಿಯಾ ಟ್ರೇಡ್ ಯೂನಿಯನ್ ಕಾಂಗ್ರೆಸ್’ (AITUC) ಹೈಕೋರ್ಟ್ನಲ್ಲಿ ಪ್ರಶ್ನಿಸಿತ್ತು. ಸುಪ್ರೀಂ ಕೋರ್ಟ್ನ ಮಾರ್ಗಸೂಚಿಗಳನ್ವಯ ಹೊಸದಾಗಿ ವೇತನ ಲೆಕ್ಕಾಚಾರ ಮಾಡುವಂತೆ ಹೈಕೋರ್ಟ್ನ ಏಕಸದಸ್ಯ ಪೀಠ ಸೂಚಿಸಿತ್ತು. ತದನಂತರದ ಕಾನೂನು ಬೆಳವಣಿಗೆಗಳು ಮತ್ತು ಕನಿಷ್ಠ ವೇತನ ಸಲಹಾ ಮಂಡಳಿಯೊಂದಿಗೆ ಸುದೀರ್ಘ ಚರ್ಚೆ ನಡೆಸಿದ ಬಳಿಕ, ಸರ್ಕಾರವು ಈಗ ಎಲ್ಲರಿಗೂ ಅನ್ವಯವಾಗುವಂತೆ ಏಕರೂಪದ ಅಂತಿಮ ಅಧಿಸೂಚನೆಯನ್ನು ಜಾರಿಗೊಳಿಸಿದೆ.
ಕೇಂದ್ರ ಸರ್ಕಾರದ ‘ವೇತನ ಸಂಹಿತೆ 2019’ (Code on Wages, 2019) ಮತ್ತು ‘ಜನರಲ್ ಕ್ಲಾಸಸ್ ಆಕ್ಟ್ 1897’ ರ ನಿಯಮಾವಳಿಗಳನ್ನು ರಕ್ಷಿಸಿ ಈ ಹೊಸ ವೇತನ ದರಗಳನ್ನು ತಕ್ಷಣದಿಂದಲೇ ಜಾರಿಗೆ ಬರುವಂತೆ ಪರಿಷ್ಕರಿಸಲಾಗಿದೆ.
ಪ್ರಮುಖ ನಾಲ್ಕು ಪ್ರವರ್ಗಗಳು ಮತ್ತು ಪರಿಷ್ಕೃತ ವೇತನ ದರಗಳು (ಅನುಸೂಚಿ-4)
ಅಧಿಸೂಚನೆಯಲ್ಲಿ ಕಾರ್ಮಿಕರನ್ನು ಅವರ ಕೆಲಸದ ಸ್ವರೂಪಕ್ಕೆ ಅನುಗುಣವಾಗಿ ನಾಲ್ಕು ಪ್ರವರ್ಗಗಳಾಗಿ ವಿಂಗಡಿಸಲಾಗಿದೆ:
ಅಕುಶಲ ಕಾರ್ಮಿಕರು (Un-skilled): ದೈಹಿಕ ಶ್ರಮದ ಆಧಾರದ ಮೇಲೆ ಸರಳ ಕೆಲಸ ನಿರ್ವಹಿಸುವವರು.
ಅರೆ ಕುಶಲ ಕಾರ್ಮಿಕರು (Semi-skilled): ಯಂತ್ರಗಳ ಸಹಾಯದಿಂದ ಪುನರಾವರ್ತಿತ ಸರಳ ಕೆಲಸ ಮಾಡುವವರು.
ಕುಶಲ ಕಾರ್ಮಿಕರು (Skilled): ಸ್ವಂತ ವಿವೇಚನೆ ಹಾಗೂ ವೃತ್ತಿಪರ ಅನುಭವ ಹೊಂದಿರುವವರು.
ಅತಿ ಕುಶಲ ಕಾರ್ಮಿಕರು (Highly skilled): ಉನ್ನತ ದಕ್ಷತೆ ಹೊಂದಿದ್ದು, ಇತರೆ ಕಾರ್ಮಿಕರ ಮೇಲ್ವಿಚಾರಣೆ ನಡೆಸುವ ಸಾಮರ್ಥ್ಯವಿಳ್ಳವರು.
ವಲಯವಾರು ಮಾಸಿಕ ಮತ್ತು ದೈನಂದಿನ ವೇತನ
ರಾಜ್ಯವನ್ನು ಗ್ರೇಟರ್ ಬೆಂಗಳೂರು (ವಲಯ-1), ಮಹಾನಗರ ಪಾಲಿಕೆಗಳು/ಜಿಲ್ಲಾ ಕೇಂದ್ರಗಳು (ವಲಯ-2) ಮತ್ತು ಇತರೆ ಪ್ರದೇಶಗಳು (ವಲಯ-3) ಎಂದು ಮೂರು ವಲಯಗಳಾಗಿ ವಿಂಗಡಿಸಿ ವೇತನ ನಿಗದಿಪಡಿಸಲಾಗಿದೆ
| ಕಾರ್ಮಿಕರ ಪ್ರವರ್ಗ | ವಲಯ-1 (ದಿನಕ್ಕೆ / ತಿಂಗಳಿಗೆ) | ವಲಯ-2 (ದಿನಕ್ಕೆ / ತಿಂಗಳಿಗೆ) | ವಲಯ-3 (ದಿನಕ್ಕೆ / ತಿಂಗಳಿಗೆ) |
|---|---|---|---|
| ಅತಿ ಕುಶಲ |
₹1,196.69 / ₹31,114.02 |
₹1,087.90 / ₹28,285.47 |
₹989.00 / ₹25,714.07 |
| ಕುಶಲ |
₹1,087.90 / ₹28,285.47 |
₹989.00 / ₹25,714.07 |
₹899.09 / ₹23,376.43 |
| ಅರೆ ಕುಶಲ |
₹989.00 / ₹25,714.07 |
₹899.09 / ₹23,376.43 |
₹817.35 / ₹21,251.30 |
| ಅಕುಶಲ |
₹899.09 / ₹23,376.43 |
₹817.35 / ₹21,251.30 |
₹743.05 / ₹19,319.36 |
ವಿಶೇಷ ಉದ್ದಿಮೆಗಳ ವೇತನ ವಿವರ (ಅನುಸೂಚಿ-2)
ಶೌಚಾಲಯ, ಸ್ನಾನಗೃಹ, ಒಳಚರಂಡಿ ಸ್ವಚ್ಛಗೊಳಿಸುವ ಕೆಲಸಗಳಲ್ಲಿ (Scavenging) ತೊಡಗಿರುವ ಸಫಾಯಿ ಕರ್ಮಚಾರಿಗಳಿಗೆ ಹಾಗೂ ವಿದ್ಯುತ್ ಉತ್ಪಾದನಾ ಘಟಕಗಳ (ಉಷ್ಣ, ಜಲ, ಸೌರ ಮತ್ತು ಪವನ ವಿದ್ಯುತ್ ಸ್ಥಾವರ) ಕಾರ್ಮಿಕರಿಗೆ ವಿಶೇಷ ವೇತನ ದರಗಳನ್ನು ಅನ್ವಯಿಸಲಾಗಿದೆ.
ಯಂತ್ರಗಳ ಸಹಾಯದಿಂದ ಒಳಚರಂಡಿ ಸ್ವಚ್ಛಗೊಳಿಸುವ ಸಫಾಯಿ ಕರ್ಮಚಾರಿಗಳಿಗೆ ವಲಯ-1 ರಲ್ಲಿ ದಿನಕ್ಕೆ ₹989.00 (ತಿಂಗಳಿಗೆ ₹25,714.07) ಹಾಗೂ ವಲಯ-3 ರಲ್ಲಿ ದಿನಕ್ಕೆ ₹817.36 ಕನಿಷ್ಠ ವೇತನ ನಿಗದಿಯಾಗಿದೆ.
ಉಷ್ಣ ವಿದ್ಯುತ್ ಸ್ಥಾವರಗಳ ಅತಿ ಕುಶಲ ಕಾರ್ಮಿಕರಿಗೆ ದಿನಕ್ಕೆ ₹1,316.36 (ತಿಂಗಳಿಗೆ ₹34,225.42) ವರೆಗೆ ಗರಿಷ್ಠ ವೇತನ ನಿಗದಿಪಡಿಸಲಾಗಿದೆ.
ಉದ್ಯೋಗದಾತರು ಕಡ್ಡಾಯವಾಗಿ ಪಾಲಿಸಬೇಕಾದ ಷರತ್ತುಗಳು
ಹೊಸ ಅಧಿಸೂಚನೆಯಲ್ಲಿ ಕಾರ್ಮಿಕರ ಹಿತರಕ್ಷಣೆಗಾಗಿ ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೊಳಿಸಲಾಗಿದ್ದು, ಉದ್ಯೋಗದಾತರು ಇವುಗಳನ್ನು ಯಥಾವತ್ತಾಗಿ ಪಾಲಿಸಬೇಕಿದೆ:
ತುಟ್ಟಿಭತ್ಯೆ (VDA) ಲೆಕ್ಕಾಚಾರ: ಹಣದುಬ್ಬರವನ್ನು ಗಣನೆಗೆ ತೆಗೆದುಕೊಂಡು ವಾರ್ಷಿಕ ಸರಾಸರಿ ಗ್ರಾಹಕ ಬೆಲೆ ಸೂಚ್ಯಾಂಕದ (CPI) ಆಧಾರದ ಮೇಲೆ ಪ್ರತಿ ವರ್ಷ ಏಪ್ರಿಲ್ 1 ರಂದು ತುಟ್ಟಿಭತ್ಯೆಯನ್ನು ಪರಿಷ್ಕರಿಸಲಾಗುತ್ತದೆ. ಗ್ರಾಹಕ ಬೆಲೆ ಸೂಚ್ಯಾಂಕ 9469 ಅಂಶಗಳಿಗಿಂತ ಹೆಚ್ಚಾಗುವ ಪ್ರತಿ ಅಂಶಕ್ಕೆ ದಿನಕ್ಕೆ 4 ಪೈಸೆಯಂತೆ ತುಟ್ಟಿಭತ್ಯೆ ಪಾವತಿಸಬೇಕು.
ವೇತನ ಸಮಾನತೆ: ಮಹಿಳೆಯರು, ಪುರುಷರು, ತೃತೀಯ ಲಿಂಗಿಗಳು ಮತ್ತು ವಿಕಲಚೇತನರು ಒಂದೇ ರೀತಿಯ ಕೆಲಸ ನಿರ್ವಹಿಸಿದಾಗ ಎಲ್ಲರಿಗೂ ಸಮಾನ ವೇತನ ನೀಡಬೇಕು.
ಕೆಲಸದ ಅವಧಿ ಮತ್ತು ಹೆಚ್ಚುವರಿ ಭತ್ಯೆ (Overtime): ದಿನವೊಂದಕ್ಕೆ 8 ಗಂಟೆಗಳ ಕೆಲಸವನ್ನು ನಿಗದಿಪಡಿಸಲಾಗಿದೆ. ನಿಗದಿತ ಅವಧಿಗಿಂತ ಹೆಚ್ಚು ಸಮಯ ಕೆಲಸ ಮಾಡಿದರೆ ಅಥವಾ ವಾರದ/ಹಬ್ಬದ ರಜೆ ದಿನಗಳಲ್ಲಿ ಕೆಲಸ ಮಾಡಿದರೆ ಸಾಮಾನ್ಯ ವೇತನದ ಎರಡು ಪಟ್ಟು (Double Salary) ವೇತನವನ್ನು ನೀಡಬೇಕು.
ಬ್ಯಾಂಕ್ ಖಾತೆಗೆ ಜಮೆ: ಎಲ್ಲಾ ನೌಕರರ ವೇತನವನ್ನು ಕಡ್ಡಾಯವಾಗಿ ಚೆಕ್ ಮೂಲಕ ಅಥವಾ ನೇರವಾಗಿ ಅವರ ಬ್ಯಾಂಕ್ ಖಾತೆಗೇ ಜಮೆ ಮಾಡಬೇಕಿರುತ್ತದೆ.
ಈ ಆದೇಶದ ಪ್ರತಿಯನ್ನು ಇ-ರಾಜ್ಯಪತ್ರದಲ್ಲಿ (E-Gazette) ಪ್ರಕಟಿಸಲು ಹಾಗೂ ಮುಂದಿನ ಜಾರಿ ಕ್ರಮಗಳಿಗಾಗಿ ರಾಜ್ಯದ ಎಲ್ಲಾ ಜಿಲ್ಲಾಧಿಕಾರಿಗಳು ಮತ್ತು ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಗಳಿಗೆ ರವಾನಿಸಲಾಗಿದೆ.
