ಲಂಡನ್: ಸುಮಾರು ಮೂರು ದಶಕಗಳ ಕಾಲ ಮಹಿಳೆಯೊಬ್ಬರನ್ನು ಬರೋಬ್ಬರಿ 1,000ಕ್ಕೂ ಹೆಚ್ಚು ಪುರುಷರೊಂದಿಗೆ ಬಲವಂತವಾಗಿ ಲೈಂಗಿಕ ಸಂಪರ್ಕ ಹೊಂದುವಂತೆ ಮಾಡಿ ನರಕಯಾತನೆ ನೀಡಿದ ಘೋರ ಪ್ರಕರಣವೊಂದರಲ್ಲಿ, ವಿಕೃತ ಕಾಮುಕನಿಗೆ ನ್ಯಾಯಾಲಯ 16 ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ.
ನಾರ್ಫೋಕ್ನ ಸ್ಟಾರ್ಸ್ಟನ್ ನಿವಾಸಿಯಾದ 67 ವರ್ಷದ ರಾಡ್ನಿ ಜಾನ್ಸ್ಟನ್ ಎಂಬಾತನೇ ಈ ಅಮಾನವೀಯ ಕೃತ್ಯ ಎಸಗಿದ ನರಾಧಮ. ತನ್ನ ವಿಕೃತ ಲೈಂಗಿಕ ಆಸೆಗಳನ್ನು ತೀರಿಸಿಕೊಳ್ಳಲು ಈತ ಕಳೆದ 30 ವರ್ಷಗಳಿಂದ ಮಹಿಳೆಯೊಬ್ಬರನ್ನು ಬಳಸಿಕೊಂಡಿದ್ದಾನೆ. ಬೆದರಿಕೆ ಹಾಗೂ ಭಯದ ವಾತಾವರಣ ಸೃಷ್ಟಿಸಿ, ಆಕೆಯನ್ನು ಗ್ರಾಮೀಣ ಪ್ರದೇಶಗಳು, ಹೋಟೆಲ್ಗಳು ಮತ್ತು ವಾಹನಗಳಲ್ಲಿ ಅಪರಿಚಿತ ಪುರುಷರೊಂದಿಗೆ ಲೈಂಗಿಕವಾಗಿ ಪಾಲ್ಗೊಳ್ಳುವಂತೆ ಒತ್ತಾಯಿಸುತ್ತಿದ್ದ. ಕೆಲವು ದಿನಗಳಲ್ಲಂತೂ ದಿನಕ್ಕೆ ಕನಿಷ್ಠ 15 ಮಂದಿ ಕಾಮುಕರು ಆ ಮಹಿಳೆಯ ಮೇಲೆ ಗಂಟೆಗಟ್ಟಲೆ ಲೈಂಗಿಕ ದೌರ್ಜನ್ಯ ಎಸಗುತ್ತಿದ್ದರು ಎಂಬ ಆಘಾತಕಾರಿ ವಿಷಯ ನ್ಯಾಯಾಲಯದ ವಿಚಾರಣೆ ವೇಳೆ ಬೆಳಕಿಗೆ ಬಂದಿದೆ.
ಪತ್ತೆಯಾದವು 30,000 ಅಶ್ಲೀಲ ವಿಡಿಯೋಗಳು!
ನಿರಂತರವಾಗಿ ನಡೆಯುತ್ತಿದ್ದ ಈ ಅಮಾನವೀಯ ಕೃತ್ಯಗಳನ್ನು ಆರೋಪಿ ರಾಡ್ನಿ ಜಾನ್ಸ್ಟನ್ ತನ್ನ ಮೊಬೈಲ್ ಹಾಗೂ ಕ್ಯಾಮೆರಾಗಳಲ್ಲಿ ಸೆರೆಹಿಡಿಯುತ್ತಿದ್ದ. ತನಿಖೆಯ ವೇಳೆ ಪೊಲೀಸರು ಈತನಿಂದ ಬರೋಬ್ಬರಿ 30,000ಕ್ಕೂ ಹೆಚ್ಚು ಅಶ್ಲೀಲ ಫೋಟೋ ಹಾಗೂ ವಿಡಿಯೋಗಳನ್ನು ವಶಪಡಿಸಿಕೊಂಡಿದ್ದಾರೆ.
ವಾರದ 5 ದಿನಗಳ ಕಾಲ ಮಹಿಳೆಯನ್ನು ಬೇರೆ ಬೇರೆ ಸ್ಥಳಗಳಿಗೆ ಕಳುಹಿಸಿ ಅಪರಿಚಿತರೊಂದಿಗೆ ದೈಹಿಕ ಸಂಪರ್ಕ ಹೊಂದುವಂತೆ ಈತ ಬಲವಂತ ಮಾಡುತ್ತಿದ್ದ. ಇದಕ್ಕಾಗಿ ಸೋಶಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ಗಳನ್ನು ಬಳಸಿಕೊಂಡು ಕಾಮುಕರನ್ನು ಸಂಪರ್ಕಿಸುತ್ತಿದ್ದ ಈತ, ಸಮಯ ಮತ್ತು ಸ್ಥಳವನ್ನು ತಾನೇ ನಿಗದಿಪಡಿಸಿ ಹಣ ವಸೂಲಿ ಮಾಡುತ್ತಿದ್ದ ಎನ್ನಲಾಗಿದೆ.
ಸಂತ್ರಸ್ತೆಯ ಆಕ್ರೋಶ ಮತ್ತು ಕಣ್ಣೀರು
ನ್ಯಾಯಾಲಯದಲ್ಲಿ ತನ್ನ ಅಳಲು ತೋಡಿಕೊಂಡ ಸಂತ್ರಸ್ತೆ, “ರಾಡ್ನಿ ಜಾನ್ಸ್ಟನ್ ನನ್ನನ್ನು ಮನುಷ್ಯಳಂತೆ ನೋಡದೆ ಕೇವಲ ಒಂದು ವಸ್ತುವಿನಂತೆ ಬಳಸಿಕೊಂಡ ರಾಕ್ಷಸ” ಎಂದು ಕಣ್ಣೀರಿಟ್ಟಿದ್ದಾರೆ.
ನರಕಯಾತನೆಯ ಅವಧಿ: 1994 ರಿಂದ 2024 ರವರೆಗೆ (ಸುಮಾರು 30 ವರ್ಷಗಳು).
ಆರೋಪಿಯ ವಾದ: ವಿಚಾರಣೆಯ ಸಂದರ್ಭದಲ್ಲಿ ಆಕೆ ತನ್ನ ಸ್ವಯಂ ಇಚ್ಛೆಯಿಂದಲೇ ಇದಕ್ಕೆ ಒಪ್ಪಿಕೊಂಡಿದ್ದಳು ಎಂದು ಆರೋಪಿ ಜಾನ್ಸ್ಟನ್ ವಾದಿಸಿ ತಪ್ಪಿಸಿಕೊಳ್ಳಲು ಯತ್ನಿಸಿದ್ದ. ಆದರೆ ನ್ಯಾಯಾಲಯ ಈ ವಾದವನ್ನು ತಳ್ಳಿಹಾಕಿ ಆತನನ್ನು ದೋಷಿ ಎಂದು ಘೋಷಿಸಿದೆ.
ಈ ಘೋರ ಕೃತ್ಯ ಬೆಳಕಿಗೆ ಬಂದಿದ್ದು ಹೇಗೆ?
2024ರ ಜುಲೈ ತಿಂಗಳಿನಲ್ಲಿ ಸಂತ್ರಸ್ತ ಮಹಿಳೆಯ ಮಕ್ಕಳಿಗೆ ಈ ಅಶ್ಲೀಲ ಚಿತ್ರಗಳು ಮತ್ತು ವಿಡಿಯೋಗಳು ಆಕಸ್ಮಿಕವಾಗಿ ಸಿಕ್ಕಿವೆ. ಇದನ್ನು ನೋಡಿ ದಿಗ್ಭ್ರಮೆಗೊಂಡ ಮಕ್ಕಳು ತಕ್ಷಣವೇ ಪೊಲೀಸರಿಗೆ ದೂರು ನೀಡಿದ್ದಾರೆ. ಪೊಲೀಸರು ಕಾರ್ಯಾಚರಣೆ ನಡೆಸಿ ಆರೋಪಿಯನ್ನು ಬಂಧಿಸಿದಾಗ, ಮೂರು ದಶಕಗಳ ಕಾಲ ನಡೆದಿದ್ದ ಈ ಭೀಕರ ನರಕಯಾತನೆ ಜಗತ್ತಿಗೆ ಗೊತ್ತಾಗಿದೆ.
