ಒಡಿಶಾ :ಒಡಿಶಾದಲ್ಲಿ ಭ್ರಷ್ಟಾಚಾರದ ಬೃಹತ್ ಜಾಲವೊಂದನ್ನು ಜಾಗೃತ ದಳ (ವಿಜಿಲೆನ್ಸ್) ಭೇದಿಸಿದ್ದು, ಕೇವಲ 6,000 ರೂಪಾಯಿ ಸಂಬಳಕ್ಕೆ ಕೆಲಸಕ್ಕೆ ಸೇರಿದ್ದ ಜೂನಿಯರ್ ಇಂಜಿನಿಯರ್ ಒಬ್ಬರ ಕೋಟ್ಯಂತರ ರೂಪಾಯಿ ಅಕ್ರಮ ಆಸ್ತಿ ಕಂಡು ಅಧಿಕಾರಿಗಳೇ ಕಣ್ಣುಪಾclone ಮಾಡಿದ್ದಾರೆ. ಕೇವಲ ಕೆಲವೇ ವರ್ಷಗಳಲ್ಲಿ ಈತ ಇಷ್ಟೊಂದು ಪ್ರಮಾಣದ ಸಂಪತ್ತು ಗಳಿಸಿದ್ದು ಹೇಗೆ ಎಂಬುದು ಸಾರ್ವಜನಿಕರಲ್ಲಿ ತೀವ್ರ ಆಶ್ಚರ್ಯ ಮೂಡಿಸಿದೆ.
ಅಕ್ರಮ ಆಸ್ತಿ ಗಳಿಕೆ ಆರೋಪದ ಹಿನ್ನೆಲೆಯಲ್ಲಿ, ಒಡಿಶಾ ವಿಜಿಲೆನ್ಸ್ ಅಧಿಕಾರಿಗಳ ತಂಡ ಜೂನಿಯರ್ ಎಂಜಿನಿಯರ್ ಬೈಕುಂಠ ನಾಥ್ ಬೆಹೆರಾಗೆ ಸಂಬಂಧಿಸಿದ ಒಟ್ಟು 9 ಸ್ಥಳಗಳ ಮೇಲೆ ಏಕಕಾಲಕ್ಕೆ ದಾಳಿ ನಡೆಸಿದೆ. ಭುವನೇಶ್ವರದ ವಿಶೇಷ ವಿಜಿಲೆನ್ಸ್ ಕೋರ್ಟ್ ಜಾರಿಗೊಳಿಸಿದ್ದ ಸರ್ಚ್ ವಾರಂಟ್ ಆಧಾರದ ಮೇಲೆ ಈ ಕಾರ್ಯಾಚರಣೆ ನಡೆದಿದ್ದು, ಬೆಹೆರಾ ಅವರ ಬ್ಯಾಂಕ್ ಲಾಕರ್ಗಳನ್ನು ತಪಾಸಣೆ ನಡೆಸಿದಾಗ ಬರೋಬ್ಬರಿ 2 ಕೋಟಿ ರೂಪಾಯಿ ಪತ್ತೆಯಾಗಿದ್ದು, ಅದನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.
ವಿಜಿಲೆನ್ಸ್ ತಂಡವು ಬೆಹೆರಾ ಅವರ ಚಂದ್ರಶೇಖರಪುರ, ಶೈಲಶ್ರೀ ವಿಹಾರ್, ಕಾನನ್ ವಿಹಾರ್, ಜಾಜ್ಪುರ ಜಿಲ್ಲೆಯ ಧರ್ಮಸಾಲ, ಬರಿಪಾದ ಹಾಗೂ ಬಾಲಿಗುಡದಲ್ಲಿರುವ ಅಧಿಕೃತ ನಿವಾಸಗಳು ಮತ್ತು ಕಚೇರಿ ಕೊಠಡಿಗಳ ಮೇಲೆ ದಾಳಿ ನಡೆಸಿ ದಾಖಲೆಗಳನ್ನು ಜಾಲಾಡಿದೆ. ಈ ತಪಾಸಣೆಯ ವೇಳೆ ಎಂಜಿನಿಯರ್ ಮತ್ತು ಅವರ ಕುಟುಂಬದ ಸದಸ್ಯರ ಹೆಸರಿನಲ್ಲಿರುವ ಅಪಾರ ಪ್ರಮಾಣದ ರಿಯಲ್ ಎಸ್ಟೇಟ್ ಆಸ್ತಿಗಳು ಬೆಳಕಿಗೆ ಬಂದಿವೆ.
ಅಧಿಕಾರಿಗಳ ತನಿಖೆಯ ವೇಳೆ ಬೆಹೆರಾ ಕುಟುಂಬಕ್ಕೆ ಸೇರಿದ 5 ಬಹುಮಹಡಿ ಕಟ್ಟಡಗಳು ಪತ್ತೆಯಾಗಿವೆ. ಇದರಲ್ಲಿ ಭುವನೇಶ್ವರದ ಐಷಾರಾಮಿ ಪ್ರದೇಶವಾದ ನೀಲಾದ್ರಿ ವಿಹಾರ್ನಲ್ಲಿರುವ ಸುಮಾರು 10,500 ಚದರ ಅಡಿ ವಿಸ್ತೀರ್ಣದ ಭವ್ಯ 4 ಅಂತಸ್ತಿನ ಕಟ್ಟಡವೂ ಸೇರಿದೆ. ಇದಲ್ಲದೆ, ಭುವನೇಶ್ವರ ಮತ್ತು ಜಾಜ್ಪುರ ಜಿಲ್ಲೆಗಳಲ್ಲಿ ಇನ್ನುಳಿದ 4 ವಸತಿ ಆಸ್ತಿಗಳನ್ನು ಅಧಿಕಾರಿಗಳು ಪತ್ತೆಹಚ್ಚಿದ್ದಾರೆ.
ಕಟ್ಟಡಗಳಷ್ಟೇ ಅಲ್ಲದೆ, ಭೂಮಿಯ ಮೇಲೂ ಭಾರಿ ಹೂಡಿಕೆ ಮಾಡಿರುವ ಬೆಹೆರಾ ಒಟ್ಟು 13 ರಿಂದ 14 ಸೈಟುಗಳನ್ನು ಹೊಂದಿರುವುದು ತನಿಖೆಯಲ್ಲಿ ಬಹಿರಂಗವಾಗಿದೆ. ಭುವನೇಶ್ವರದ ಪ್ರಮುಖ ಮತ್ತು ದುಬಾರಿ ಸ್ಥಳಗಳಲ್ಲಿ 7 ಪ್ಲಾಟ್ಗಳು ಹಾಗೂ ಜಾಜ್ಪುರ ಮತ್ತು ಬರಿಪಾದದ ವಿವಿಧೆಡೆ ಹಲವಾರು ಪ್ಲಾಟ್ಗಳನ್ನು ಈತ ಖರೀದಿಸಿರುವುದು ಪತ್ತೆಯಾಗಿದೆ. ಸದ್ಯಕ್ಕೆ ಸಿಕ್ಕಿರುವ ನಗದು ಮತ್ತು ಆಸ್ತಿ ಪತ್ರಗಳನ್ನು ವಶಕ್ಕೆ ಪಡೆದಿರುವ ವಿಜಿಲೆನ್ಸ್ ಅಧಿಕಾರಿಗಳು, ಇಂಜಿನಿಯರ್ ಬೆಹೆರಾ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಮುಂದಿನ ತನಿಖೆಯನ್ನು ಚುರುಕುಗೊಳಿಸಿದ್ದಾರೆ.
2 Crore cash stashed in Bank lockers, 5 Multi-Storey bldgs (4 in #Bhubaneswar) (17850 Sqft),13 Plots (7 in BBSR), etc. unearthed so far during searches on Sri Baikuntha Nath Behera, Asst Executive Engr, #ITDA, Baliguda, #Kandhamal. He joined service in 1999 as JE @ Rs 6000/- pm. pic.twitter.com/I80zkPtVJm
— Odisha Vigilance (@OdishaVigilance) June 6, 2026
