ಅಬುಧಾಬಿ: ತಮ್ಮ 5 ರಾಷ್ಟ್ರಗಳ ರಾಜತಾಂತ್ರಿಕ ಪ್ರವಾಸದ ಮೊದಲ ಭಾಗವಾಗಿ ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ತಲುಪಿದ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಅಲ್ಲಿನ ಸರ್ಕಾರ ಅತ್ಯಂತ ಅಪರೂಪದ ಹಾಗೂ ಅದ್ಧೂರಿ ರಾಜತಾಂತ್ರಿಕ ಸ್ವಾಗತ ಕೋರಿದೆ. ಪ್ರಧಾನಿ ಮೋದಿ ಅವರ ವಿಮಾನ ಯುಎಇ ವಾಯುಪ್ರದೇಶವನ್ನು ಪ್ರವೇಶಿಸುತ್ತಿದ್ದಂತೆ, ಯುಎಇ ವಾಯುಪಡೆಯ ಅತ್ಯಾಧುನಿಕ ‘ಎಫ್-16’ (F-16) ಯುದ್ಧ ವಿಮಾನಗಳು ಆಕಾಶದಲ್ಲೇ ಅವರ ವಿಮಾನಕ್ಕೆ ಬೆಂಗಾವಲಾಗಿ (Escort) ನಿಂತು ಗೌರವ ಸಲ್ಲಿಸಿವೆ.
ಈ ಭವ್ಯ ಆಕಾಶದ ಸ್ವಾಗತಕ್ಕೆ (Sky Salute) ಮನಸೋತ ಪ್ರಧಾನಿ ಮೋದಿ, ಯುಎಇ ಅಧ್ಯಕ್ಷ ಶೇಖ್ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್ ಅವರಿಗೆ ವಿಶೇಷ ಧನ್ಯವಾದ ಅರ್ಪಿಸಿದ್ದು, “ಇದು ಭಾರತದ 140 ಕೋಟಿ ಜನತೆಗೆ ಸಿಕ್ಕ ಗೌರವ” ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ. ಪ್ರಧಾನಿ ವಿಮಾನದ ಪಕ್ಕದಲ್ಲೇ ಎಫ್-16 ವಿಮಾನಗಳು ಹಾರಾಟ ನಡೆಸುತ್ತಿರುವ ವಿಡಿಯೋ ಈಗ ಜಾಗತಿಕ ಮಟ್ಟದಲ್ಲಿ ಭಾರಿ ವೈರಲ್ ಆಗುತ್ತಿದೆ.
ಯುಎಇ ಅಧ್ಯಕ್ಷರೊಂದಿಗಿನ ಉನ್ನತ ಮಟ್ಟದ ಸಭೆಯಲ್ಲಿ ಮಾತನಾಡಿದ ಮೋದಿ, “ಇಂದು ನಿಮ್ಮ ವಾಯುಪಡೆ ನನ್ನ ವಿಮಾನಕ್ಕೆ ಬೆಂಗಾವಲಾಗಿ ಬಂದ ಶೈಲಿ ಅತ್ಯಂತ ಅದ್ಭುತವಾಗಿತ್ತು. ಇದು ಕೇವಲ ನನಗೆ ನೀಡಿದ ಗೌರವವಲ್ಲ, ಇಡೀ ಭಾರತದ ಜನತೆಗೆ ಸಂದ ಗೌರವವಾಗಿದೆ” ಎಂದು ಶ್ಲಾಘಿಸಿದರು.
“ನಾವು ಕಳೆದ ಕೆಲವು ಸಮಯದಿಂದ ಫೋನ್ ಮೂಲಕ ನಿರಂತರವಾಗಿ ಮಾತನಾಡುತ್ತಿದ್ದೆವು. ಆದರೆ ನಿಮ್ಮನ್ನು ಖುದ್ದಾಗಿ ಭೇಟಿಯಾಗಲು ನಾನು ತುಂಬಾ ಉತ್ಸುಕನಾಗಿದ್ದೆ. ಇಂದು ನಿಮ್ಮನ್ನು ಭೇಟಿಯಾಗಿದ್ದು ಅತ್ಯಂತ ಸಂತೋಷ ತಂದಿದೆ” ಎಂದು ಮೋದಿ ಯುಎಇ ಅಧ್ಯಕ್ಷರನ್ನು ಅಪ್ಪಿಕೊಂಡು ತಮ್ಮ ಸ್ನೇಹವನ್ನು ಹಂಚಿಕೊಂಡರು.
ಅಬುಧಾಬಿ ವಿಮಾನ ನಿಲ್ದಾಣದಲ್ಲಿ ಪ್ರಧಾನಿ ಮೋದಿ ಅವರು ಇಳಿಯುತ್ತಿದ್ದಂತೆ ಅವರಿಗೆ ಸಾಂಪ್ರದಾಯಿಕ ಮತ್ತು ಭವ್ಯವಾದ ‘ಗಾರ್ಡ್ ಆಫ್ ಆನರ್’ ಗೌರವ ವಂದನೆ ಸಲ್ಲಿಸಲಾಯಿತು.
As Prime Minister Narendra Modi’s aircraft entered UAE airspace, it was escorted by UAE F-16 fighter jets, a reflection of the deep strategic partnership, trust, and personal warmth shared between the leadership of India and the UAE. pic.twitter.com/vpiYqSTzFc
— Amit Malviya (@amitmalviya) May 15, 2026
