ಭಾರತ ಮತ್ತು ಅಮೆರಿಕದ ನಡುವಿನ ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದದ ಮೊದಲ ಕಂತಿನ ಒಪ್ಪಂದಕ್ಕೆ ಶೀಘ್ರವೇ ಸಹಿ ಹಾಕಲಾಗುವುದು ಎಂದು ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್ ಗೋಯಲ್ ಸೋಮವಾರ ತಿಳಿಸಿದ್ದಾರೆ. ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಉಭಯ ದೇಶಗಳ ನಿಯೋಗಗಳ ನಡುವೆ ಎಲ್ಲಾ ಪ್ರಮುಖ ಅಂಶಗಳು ಇತ್ಯರ್ಥಗೊಂಡಿವೆ ಎಂದು ಸ್ಪಷ್ಟಪಡಿಸಿದ್ದಾರೆ.
”ಫೆಬ್ರವರಿ 3ರಂದೇ ಎರಡೂ ದೇಶಗಳ ನಾಯಕರು ಚೌಕಟ್ಟಿನ ಒಪ್ಪಂದವನ್ನು (framework agreement) ಘೋಷಿಸಿದ್ದರು. ಇದೀಗ ಎಲ್ಲ ಪ್ರಮುಖ ವಿಷಯಗಳು ಬಗೆಹರಿದಿವೆ. ಭಾರತದಲ್ಲಿನ ಅಮೆರಿಕದ ರಾಯಭಾರಿ ಸೆರ್ಜಿಯೊ ಗೊರ್ ಇತ್ತೀಚೆಗೆ ತಿಳಿಸಿದಂತೆ, ಒಪ್ಪಂದದ ಶೇ. 99ರಷ್ಟು ವಿವರಗಳು ಅಂತಿಮಗೊಂಡಿವೆ.
ಅಮೆರಿಕದೊಂದಿಗಿನ ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದದ ಮೊದಲ ಕಂತನ್ನು ಆದಷ್ಟು ಬೇಗ ಮುಕ್ತಾಯಗೊಳಿಸುತ್ತೇವೆ ಎಂಬ ಸಂಪೂರ್ಣ ವಿಶ್ವಾಸ ನನಗಿದೆ,” ಎಂದು ಗೋಯಲ್ ತಿಳಿಸಿದ್ದಾರೆ.
ಈ ಹೇಳಿಕೆಯು ಭಾರತ ಮತ್ತು ಅಮೆರಿಕದ ನಿಯೋಗಗಳ ನಡುವಿನ ಹೊಸ ಸುತ್ತಿನ ಮಾತುಕತೆಗಳ ಹಿನ್ನೆಲೆಯಲ್ಲಿ ಬಂದಿದೆ. ವ್ಯಾಪಾರ ಒಪ್ಪಂದದ ಚೌಕಟ್ಟನ್ನು ಅಂತಿಮಗೊಳಿಸಲು ಅಮೆರಿಕದ ತಂಡವೊಂದು ಭಾರತಕ್ಕೆ ಆಗಮಿಸಲಿದ್ದು, ಜೂನ್ 2ರಿಂದ 4ರವರೆಗೆ ಉಭಯ ನಿಯೋಗಗಳ ನಡುವೆ ಸಭೆಗಳು ನಡೆಯಲಿವೆ ಎಂದು ಸಚಿವರು ತಿಳಿಸಿದ್ದಾರೆ. ಅಮೆರಿಕದ ರಾಯಭಾರಿ ಕಚೇರಿಯ ವಕ್ತಾರರ ಪ್ರಕಾರ, ಅಮೆರಿಕದ ನಿಯೋಗವನ್ನು ಸಹಾಯಕ ಅಮೆರಿಕನ್ ವ್ಯಾಪಾರ ಪ್ರತಿನಿಧಿ ಬ್ರೆಂಡನ್ ಲಿಂಚ್ ನೇತೃತ್ವ ವಹಿಸಲಿದ್ದಾರೆ.
”ಅಮೆರಿಕ ಸರ್ಕಾರವು ಭಾರತದೊಂದಿಗೆ ದೀರ್ಘಕಾಲೀನ, ಪ್ರಯೋಜನಕಾರಿ ಮತ್ತು ಸುಸ್ಥಿರ ವ್ಯಾಪಾರ ಒಪ್ಪಂದವನ್ನು ಬಯಸುತ್ತಿದೆ,” ಎಂದು ವಕ್ತಾರರು ಸೇರಿಸಿದ್ದಾರೆ. ಕಳೆದ ವಾರ ಮಾತನಾಡಿದ್ದ ಅಮೆರಿಕದ ರಾಯಭಾರಿ ಸೆರ್ಜಿಯೊ ಗೊರ್, ಒಪ್ಪಂದದ ಶೇ. 99ರಷ್ಟು ಕೆಲಸ ಪೂರ್ಣಗೊಂಡಿದೆ ಮತ್ತು ಉಳಿದ ಶೇ. 1ರಷ್ಟು ವಿಷಯಗಳನ್ನು ಅಂತಿಮಗೊಳಿಸಲು ಭಾರತವು ತನ್ನ ತಂಡವನ್ನು ವಾಷಿಂಗ್ಟನ್ ಡಿಸಿಗೆ ಕಳುಹಿಸಿತ್ತು ಎಂದು ಹೇಳಿದ್ದರು.
ಅಲ್ಲದೆ, ಭಾರತ-ಅಮೆರಿಕದ ನಡುವಿನ ವ್ಯಾಪಾರ ಮಾತುಕತೆಗಳು ಕೇವಲ ಒಂದೂವರೆ ವರ್ಷದಲ್ಲಿ ಅಂತಿಮ ಹಂತಕ್ಕೆ ಬಂದಿದ್ದು, ಯುರೋಪಿಯನ್ ಒಕ್ಕೂಟದೊಂದಿಗಿನ ಒಪ್ಪಂದಕ್ಕೆ 19 ವರ್ಷಗಳ ಸಮಯ ಹಿಡಿದಿದ್ದಕ್ಕೆ ಹೋಲಿಸಿದರೆ ಇದು ಬಹಳ ವೇಗದ ಪ್ರಗತಿಯಾಗಿದೆ ಎಂದು ಗೊರ್ ಅವರು ಕಳೆದ ತಿಂಗಳು ಉಲ್ಲೇಖಿಸಿದ್ದರು.
