ಅಡುಗೆ ಮನೆಯಲ್ಲಿ ಪ್ರೆಶರ್ ಕುಕ್ಕರ್ ಬಳಕೆ ಅತ್ಯಂತ ಸಾಮಾನ್ಯ. ಆದರೆ, ನಮ್ಮ ಸಣ್ಣ ನಿರ್ಲಕ್ಷ್ಯ ಅಥವಾ ಅಜಾಗರೂಕತೆ ದೊಡ್ಡ ಅಪಘಾತಕ್ಕೆ ಕಾರಣವಾಗಬಹುದು ಎಂಬುದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಆಘಾತಕಾರಿ ವಿಡಿಯೋವೊಂದು ಸಾಬೀತುಪಡಿಸಿದೆ.
ವೈರಲ್ ಆಗಿರುವ ವಿಡಿಯೋದಲ್ಲಿ, ಮಹಿಳೆಯೊಬ್ಬರು ಅಡುಗೆ ಮನೆಯಲ್ಲಿ ಕುಕ್ಕರ್ ಇಟ್ಟು ಕೆಲಸ ಮಾಡುತ್ತಿರುತ್ತಾರೆ. ಆದರೆ ಇದ್ದಕ್ಕಿದ್ದಂತೆ ಗ್ಯಾಸ್ ಮೇಲಿದ್ದ ಪ್ರೆಶರ್ ಕುಕ್ಕರ್ ಬಾಂಬ್ನಂತೆ ಭೀಕರವಾಗಿ ಸ್ಫೋಟಗೊಳ್ಳುತ್ತದೆ. ಈ ದುರ್ಘಟನೆಯಲ್ಲಿ ಮಹಿಳೆ ಗಾಯಗೊಂಡಿದ್ದಾರೆ. ಈ ಘಟನೆಯ ಬೆನ್ನಲ್ಲೇ ಅಡುಗೆ ಮನೆಯ ಸುರಕ್ಷತೆಯ ಬಗ್ಗೆ ತಜ್ಞರು ಕೆಲವು ಪ್ರಮುಖ ಎಚ್ಚರಿಕೆಗಳನ್ನು ನೀಡಿದ್ದಾರೆ. ಪ್ರೆಶರ್ ಕುಕ್ಕರ್ ಸ್ಫೋಟಗೊಳ್ಳಲು ಮುಖ್ಯ ಕಾರಣಗಳೇನು ಮತ್ತು ನಾವು ಮಾಡಬಾರದ ತಪ್ಪುಗಳು ಯಾವುವು ಎಂಬ ಮಾಹಿತಿ ಇಲ್ಲಿದೆ:
ಕುಕ್ಕರ್ ಸ್ಫೋಟಗೊಳ್ಳಲು ಪ್ರಮುಖ ಕಾರಣಗಳು:
ರಬ್ಬರ್ (ಗ್ಯಾಸ್ಕೆಟ್) ಮತ್ತು ವೆಂಟ್ ಪೈಪ್ ನಿರ್ಲಕ್ಷ್ಯ:
ಕುಕ್ಕರ್ ಮುಚ್ಚಳದಲ್ಲಿರುವ ವೆಂಟ್ ಪೈಪ್ (ಸೀಟಿ ಕೂರುವ ನಲಿ) ಒಳಗೆ ಅನ್ನ, ಬೇಳೆ ಅಥವಾ ಯಾವುದೇ ಆಹಾರದ ಕಣಗಳು ಸಿಲುಕಿಕೊಂಡರೆ, ಒಳಗಿನ ಹಬೆ (ಪ್ರೆಶರ್) ಹೊರಹೋಗಲು ಸಾಧ್ಯವಾಗುವುದಿಲ್ಲ. ಜೊತೆಗೆ ಕುಕ್ಕರ್ನ ರಬ್ಬರ್ ತುಂಬಾ ಹಳೆಯದಾಗಿದ್ದರೆ ಅಥವಾ ಸವೆದುಹೋಗಿದ್ದರೆ ಅದು ಅತಿಯಾದ ಒತ್ತಡವನ್ನು ತಡೆದುಕೊಳ್ಳಲಾರದು. ಸೀಟಿ ಮತ್ತು ರಬ್ಬರ್ ಎರಡೂ ಬ್ಲಾಕ್ ಆದಾಗ, ಇಡೀ ಒತ್ತಡವು ಸೇಫ್ಟಿ ವಾಲ್ವ್ (Safety Valve) ಮೇಲೆ ಬೀಳುತ್ತದೆ. ಒಂದು ವೇಳೆ ಸೇಫ್ಟಿ ವಾಲ್ವ್ ಕೂಡ ಹಾಳಾಗಿದ್ದರೆ, ಕುಕ್ಕರ್ ಸ್ಫೋಟಗೊಳ್ಳುತ್ತದೆ.
ನೀರು ಮತ್ತು ಆಹಾರದ ಪ್ರಮಾಣದ ತಪ್ಪು:
ಕುಕ್ಕರ್ನಲ್ಲಿ ಅದರ ಸಾಮರ್ಥ್ಯಕ್ಕಿಂತ ಹೆಚ್ಚು ಆಹಾರ ಅಥವಾ ನೀರನ್ನು ಎಂದಿಗೂ ತುಂಬಿಸಬಾರದು. ಕುಕ್ಕರ್ನ ಮೇಲ್ಭಾಗದ ಕನಿಷ್ಠ ಮೂರನೇ ಒಂದು ಭಾಗದಷ್ಟು (1/3) ಜಾಗವನ್ನು ಯಾವಾಗಲೂ ಖಾಲಿ ಬಿಡಬೇಕು. ಹಾಗೆಯೇ, ಅಗತ್ಯಕ್ಕಿಂತ ಕಡಿಮೆ ನೀರು ಹಾಕುವುದು ಕೂಡ ಅಷ್ಟೇ ಅಪಾಯಕಾರಿ. ನೀರು ಪೂರ್ತಿ ಒಣಗಿದಾಗ ಒಳಗಿನ ತಾಪಮಾನ ಮತ್ತು ಒತ್ತಡವು ದಿಢೀರನೆ ಅಪಾಯಕಾರಿ ಮಟ್ಟಕ್ಕೆ ಹೆಚ್ಚಾಗುತ್ತದೆ. ಬೇಳೆ ಅಥವಾ ಜೋಳವನ್ನು ಬೇಯಿಸುವಾಗ ಹೆಚ್ಚು ನೊರೆ ಬರುವುದರಿಂದ, ಅದು ಸೀಟಿಯ ರಂಧ್ರವನ್ನು ಸುಲಭವಾಗಿ ಮುಚ್ಚಿಬಿಡುತ್ತದೆ.
ಗ್ಯಾಸ್ ಆಫ್ ಮಾಡಿದ ತಕ್ಷಣ ಬಲವಂತವಾಗಿ ತೆರೆಯುವುದು:
ಅಡುಗೆ ಮುಗಿದ ತಕ್ಷಣ ಅನೇಕರು ಚಮಚ ಅಥವಾ ಚಾಕುವಿನಿಂದ ಸೀಟಿಯನ್ನು ಎತ್ತಿ ಬಲವಂತವಾಗಿ ಹಬೆಯನ್ನು ಹೊರಹಾಕುತ್ತಾರೆ ಅಥವಾ ಬಿಸಿ ಇರುವಾಗಲೇ ಕುಕ್ಕರ್ ತೆರೆಯಲು ಪ್ರಯತ್ನಿಸುತ್ತಾರೆ. ಒಳಗಡೆ ಅತಿಯಾದ ಪ್ರೆಶರ್ ಇರುವಾಗ ಮುಚ್ಚಳವನ್ನು ಬಲವಂತವಾಗಿ ಎಳೆದರೆ, ಅದು ಲಾಕ್ ಮುರಿದು ನೇರವಾಗಿ ಮುಖಕ್ಕೆ ಸಿಡಿಯುವ ಅಪಾಯವಿರುತ್ತದೆ.
ಸುರಕ್ಷತೆಗಾಗಿ ವಹಿಸಬೇಕಾದ ಮುನ್ನೆಚ್ಚರಿಕೆಗಳು:
ವೆಂಟ್ ಪೈಪ್ ಪರಿಶೀಲಿಸಿ: ಕುಕ್ಕರ್ ಅನ್ನು ಗ್ಯಾಸ್ ಮೇಲೆ ಇಡುವ ಮುನ್ನ ವೆಂಟ್ ಪೈಪ್ ಮುಕ್ತವಾಗಿದೆಯೇ ಎಂದು ಒಮ್ಮೆ ಊದಿ ಪರಿಶೀಲಿಸಿ.
ಸ್ವಚ್ಛತೆಗೆ ಆದ್ಯತೆ ನೀಡಿ: ಕುಕ್ಕರ್ ತೊಳೆದ ನಂತರ ಸೀಟಿ ಮತ್ತು ಅದರ ಕೆಳಗಿನ ರಂಧ್ರವನ್ನು ಸಣ್ಣ ಪಿನ್ ಅಥವಾ ಸೂಜಿಯ ಸಹಾಯದಿಂದ ಚೆನ್ನಾಗಿ ಸ್ವಚ್ಛಗೊಳಿಸಿ.
ಲೋಕಲ್ ಪಾರ್ಟ್ಸ್ ಬಳಸಬೇಡಿ: ಕುಕ್ಕರ್ನ ರಬ್ಬರ್ ಅಥವಾ ಸೇಫ್ಟಿ ವಾಲ್ವ್ ಹಾಳಾದರೆ, ರಸ್ತೆ ಬದಿಯ ಅಂಗಡಿಗಳಲ್ಲಿ ಸಿಗುವ ಕಳಪೆ ಗುಣಮಟ್ಟದ ಬಿಡಿಭಾಗಗಳನ್ನು ಬಳಸಬೇಡಿ. ಯಾವಾಗಲೂ ಬ್ರ್ಯಾಂಡೆಡ್ ಮತ್ತು ಐಎಸ್ಐ (ISI) ಮುದ್ರೆ ಇರುವ ಬಿಡಿಭಾಗಗಳನ್ನೇ ಖರೀದಿಸಿ.
ತಾನಾಗಿಯೇ ತಣ್ಣಗಾಗಲು ಬಿಡಿ: ಗ್ಯಾಸ್ ಆಫ್ ಮಾಡಿದ ನಂತರ ಕನಿಷ್ಠ 10 ರಿಂದ 15 ನಿಮಿಷಗಳ ಕಾಲ ಕುಕ್ಕರ್ ಅನ್ನು ಹಾಗೇ ಬಿಡಿ. ಒಳಗಿನ ಪ್ರೆಶರ್ ಸಂಪೂರ್ಣವಾಗಿ ಕಡಿಮೆಯಾದ ನಂತರವಷ್ಟೇ ಮುಚ್ಚಳವನ್ನು ತೆರೆಯಿರಿ.
