ನವದೆಹಲಿ: ದೆಹಲಿ ಮತ್ತು ಪಂಜಾಬ್ನಲ್ಲಿ ಆಡಳಿತ ನಡೆಸುತ್ತಿರುವ ಆಮ್ ಆದ್ಮಿ ಪಕ್ಷಕ್ಕೆ (AAP) ರಾಷ್ಟ್ರ ರಾಜಕಾರಣದಲ್ಲಿ ಭಾರಿ ಹಿನ್ನಡೆಯಾಗಿದೆ. ಪಕ್ಷದ ಒಟ್ಟು 10 ರಾಜ್ಯಸಭಾ ಸಂಸದರ ಪೈಕಿ ಏಳು ಮಂದಿ ಬಂಡಾಯವೆದ್ದು ಭಾರತೀಯ ಜನತಾ ಪಕ್ಷಕ್ಕೆ (BJP) ಸೇರ್ಪಡೆಯಾಗಿದ್ದಾರೆ. ಈ ನಡೆಯನ್ನು ‘ಅಸಂವಿಧಾನಿಕ’ ಎಂದು ಕರೆದಿರುವ ಆಪ್, ಈ ಸಂಸದರನ್ನು ತಕ್ಷಣವೇ ಅನರ್ಹಗೊಳಿಸುವಂತೆ ಕೋರಿ ರಾಜ್ಯಸಭಾ ಸಭಾಪತಿ ಸಿ.ಪಿ. ರಾಧಾಕೃಷ್ಣನ್ ಅವರಿಗೆ ಮನವಿ ಸಲ್ಲಿಸಿದೆ.
ರಾಘವ ಚಡ್ಡಾ ಅವರ ನೇತೃತ್ವದಲ್ಲಿ ಬಿಜೆಪಿಗೆ ಸೇರಿದ ಏಳು ಸಂಸದರ ಪಟ್ಟಿ ಇಲ್ಲಿದೆ:
ರಾಘವ ಚಡ್ಡಾ
ಸಂದೀಪ್ ಪಾಠಕ್
ಸ್ವಾತಿ ಮಲಿವಾಲ್
ಹರ್ಭಜನ್ ಸಿಂಗ್ (ಮಾಜಿ ಕ್ರಿಕೆಟಿಗ)
ಅಶೋಕ್ ಮಿತ್ತಲ್
ವಿಕ್ರಮ್ ಸಾಹ್ನಿ
ರಾಜೇಂದ್ರ ಗುಪ್ತಾ
ಪಕ್ಷದ ಹಿರಿಯ ನಾಯಕ ಮತ್ತು ಸಂಸದ ಸಂಜಯ್ ಸಿಂಗ್ ಅವರು ಈ ಕುರಿತು ಪತ್ರಿಕಾಗೋಷ್ಠಿ ನಡೆಸಿ ಬಿಜೆಪಿಯ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ:ಸಂವಿಧಾನದ 10ನೇ ಶೆಡ್ಯೂಲ್ ಪ್ರಕಾರ, ಒಂದು ಪಕ್ಷದ ಸಂಸದರು ಮತ್ತೊಂದು ಪಕ್ಷಕ್ಕೆ ಸೇರುವುದು ಕಾನೂನುಬಾಹಿರ. 2/3 ಬಹುಮತವಿದ್ದರೂ ಸಹ, ಮೂಲ ಪಕ್ಷವು ವಿಲೀನಕ್ಕೆ ಒಪ್ಪದ ಹೊರತು ಇದು ಮಾನ್ಯವಾಗುವುದಿಲ್ಲ ಎಂದು ಅವರು ವಾದಿಸಿದ್ದಾರೆ.
ಬಿಜೆಪಿ ವಿರುದ್ಧ ಕಿಡಿ: “ಬಿಜೆಪಿಯು ಹಣ ಮತ್ತು ಅಧಿಕಾರದ ಬಲದಿಂದ ನಮ್ಮ ಸಂಸದರನ್ನು ಸೆಳೆದಿದೆ. ಇದು ಪ್ರಜಾಪ್ರಭುತ್ವದ ಕೊಲೆ,” ಎಂದು ಸಂಜಯ್ ಸಿಂಗ್ ಕಿಡಿಕಾರಿದ್ದಾರೆ.
