ಖಮ್ಮಂ: ತೆಲಂಗಾಣದ ಖಮ್ಮಂ ಜಿಲ್ಲೆಯಲ್ಲಿ ಸೂರ್ಯನ ಪ್ರತಾಪ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ದಾಖಲೆ ಮಟ್ಟದಲ್ಲಿ ಉಷ್ಣಾಂಶ ದಾಖಲಾಗುತ್ತಿರುವುದರಿಂದ ಜನರು ಬಿಸಿಗಾಳಿಗೆ ತತ್ತರಿಸಿಹೋಗಿದ್ದಾರೆ. ತುರ್ತು ಕೆಲಸಗಳಿದ್ದರೆ ಮಾತ್ರ ಜನ ಹೊರಗೆ ಬರುತ್ತಿದ್ದಾರೆ. ಇತ್ತ ಮನುಷ್ಯರ ಸ್ಥಿತಿಯೇ ಹೀಗಿದ್ದರೆ, ಇನ್ನು ಮೂಕಪ್ರಾಣಿಗಳು ಮತ್ತು ಪಕ್ಷಿಗಳ ಪರಿಸ್ಥಿತಿ ಹೇಳತೀರದಾಗಿದೆ. ಈ ಬೇಗೆಯಿಂದ ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಪಕ್ಷಿಗಳು ಕೂಡ ಹೊಸ ಹೊಸ ದಾರಿಗಳನ್ನು ಹುಡುಕಿಕೊಳ್ಳುತ್ತಿವೆ. ಇಂತಹದ್ದೇ ಒಂದು ಅಪರೂಪದ ಮತ್ತು ಕುತೂಹಲಕಾರಿ ಘಟನೆ ಖಮ್ಮಂ ಜಿಲ್ಲೆಯ ವೈರಾದಲ್ಲಿ ಬೆಳಕಿಗೆ ಬಂದಿದೆ.
ತಿಂಗಳಿನಿಂದ ನಿಂತಿದ್ದ ಸ್ಕೂಟರೇ ಆಸರೆ!
ವೈರಾ ಪುರಸಭೆ ವ್ಯಾಪ್ತಿಯ ಲೀಲಾ ಸುಂದರಯ್ಯ ನಗರದ ಮನೆಯೊಂದರ ಆವರಣದಲ್ಲಿ ಪಾರ್ಕ್ ಮಾಡಲಾಗಿದ್ದ ಸ್ಕೂಟರನ್ನು ಗುಬ್ಬಚ್ಚಿಯೊಂದು ತನ್ನ ಸುರಕ್ಷಿತ ನಿವಾಸವನ್ನಾಗಿ ಮಾಡಿಕೊಂಡಿದೆ. ಬೇಸಿಗೆ ರಜೆಯ ಹಿನ್ನೆಲೆಯಲ್ಲಿ ಆ ಮನೆಯಲ್ಲಿ ಬಾಡಿಗೆಗಿದ್ದ ಕುಟುಂಬವು ತಮ್ಮ ಸ್ವಂತ ಊರಿಗೆ ತೆರಳಿತ್ತು. ಹೀಗಾಗಿ ಅವರ ದ್ವಿಚಕ್ರ ವಾಹನವು ಒಂದು ತಿಂಗಳಿಗೂ ಹೆಚ್ಚು ಕಾಲ ಪಾರ್ಕಿಂಗ್ನಲ್ಲಿಯೇ ಹಾಗೆ ನಿಂತಿತ್ತು.
ಕೀ ಹೋಲ್ ಪಕ್ಕದ ಜಾಗದಲ್ಲಿ ಸಂಸಾರ
ಹೀಗೆ ನಿಂತಿದ್ದ ಸ್ಕೂಟರ್ನ ಕೀ ಹಾಕುವ ಜಾಗದ ಪಕ್ಕದಲ್ಲಿದ್ದ ಸಣ್ಣ ಹ್ಯಾಂಡಿ ಪಾಕೆಟ್ (ಖಾಲಿ ಜಾಗ) ಅನ್ನು ಗಮನಿಸಿದ ಗುಬ್ಬಚ್ಚಿ, ಅಲ್ಲಿಯೇ ಕಡ್ಡಿಗಳನ್ನು ತಂದು ಗೂಡು ಕಟ್ಟಿದೆ. ಅಷ್ಟೇ ಅಲ್ಲದೆ, ಆ ಗೂಡಿನಲ್ಲಿ ಮೊಟ್ಟೆಗಳನ್ನೂ ಇಟ್ಟಿದೆ. ಕಳೆದ ಕೆಲವು ದಿನಗಳಿಂದ ಗುಬ್ಬಚ್ಚಿಯೊಂದು ಪದೇ ಪದೇ ಸ್ಕೂಟರ್ ಬಳಿ ಬಂದು ಹೋಗುತ್ತಿರುವುದನ್ನು ಗಮನಿಸಿದ ಸ್ಥಳೀಯರು ಹತ್ತಿರ ಹೋಗಿ ವಾಹನವನ್ನು ಪರಿಶೀಲಿಸಿದಾಗ, ಅಲ್ಲಿ ಸುಂದರವಾದ ಗೂಡು ಮತ್ತು ಅದರಲ್ಲಿರುವ ಮೊಟ್ಟೆಗಳು ಕಂಡುಬಂದಿವೆ.
ಸ್ಥಳೀಯರ ಆಶ್ಚರ್ಯ: “ಕೊರೆಯುವ ಬಿಸಿಲು ಮತ್ತು ಬದಲಾಗುತ್ತಿರುವ ಹವಾಮಾನದಿಂದಾಗಿ ಮರಗಳ ಮೇಲೆ ಗೂಡು ಕಟ್ಟುವುದು ಕಷ್ಟವಾಗಿರಬಹುದು. ಹಾಗಾಗಿ ಈ ಹಕ್ಕಿ ಸುರಕ್ಷತೆಗಾಗಿ ಸ್ಕೂಟರ್ ಆಶ್ರಯಿಸಿದೆ” ಎಂದು ಸ್ಥಳೀಯರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
ಗುಬ್ಬಚ್ಚಿ ತನ್ನ ಮರಿಗಳನ್ನು ರಕ್ಷಿಸಿಕೊಳ್ಳಲು ಆಯ್ಕೆ ಮಾಡಿಕೊಂಡ ಈ ವಿಭಿನ್ನವಾದ ಗೂಡಿನ ವಿಡಿಯೋ ಮತ್ತು ಫೋಟೋಗಳು ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ನೆಟ್ಟಿಗರ ಗಮನ ಸೆಳೆಯುತ್ತಿವೆ.
