ಬೆಂಗಳೂರು: ಭಾರತದ ಬಾಹ್ಯಾಕಾಶ ಮತ್ತು ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದಲ್ಲಿ ಹೊಸ ಕ್ರಾಂತಿಗೆ ಮುನ್ನುಡಿ ಬರೆಯಲಾಗಿದ್ದು, ‘ಪಾತ್ಫೈಂಡರ್’ (Pathfinder) ಹೆಸರಿನ ದೇಶದ ಮೊದಲ ಆರ್ಬಿಟಲ್ ಡೇಟಾ ಸೆಂಟರ್ ಉಪಗ್ರಹವನ್ನು 2026ರ ವೇಳೆಗೆ ಉಡಾವಣೆ ಮಾಡಲು ಪಿಕ್ಸೆಲ್ ಮತ್ತು ಸರ್ವಂ ಸಂಸ್ಥೆಗಳು ಕೈಜೋಡಿಸಿವೆ.
ಸಾಮಾನ್ಯವಾಗಿ ಉಪಗ್ರಹಗಳು ಸಂಗ್ರಹಿಸಿದ ಮಾಹಿತಿಯನ್ನು ಭೂಮಿಯಲ್ಲಿರುವ ಡೇಟಾ ಸೆಂಟರ್ಗಳಿಗೆ ಕಳುಹಿಸುತ್ತವೆ. ಆದರೆ, ಈ ಹೊಸ ತಂತ್ರಜ್ಞಾನದಲ್ಲಿ ಉಪಗ್ರಹವೇ ಒಂದು ಚಲಿಸುವ ದತ್ತಾಂಶ ಕೇಂದ್ರವಾಗಿ ಕಾರ್ಯನಿರ್ವಹಿಸುತ್ತದೆ. ಅಂದರೆ, ಬಾಹ್ಯಾಕಾಶದಲ್ಲಿಯೇ ಮಾಹಿತಿಯನ್ನು ವಿಶ್ಲೇಷಿಸಿ (Process), ತಕ್ಷಣದ ಫಲಿತಾಂಶವನ್ನು ನೀಡುವ ಸಾಮರ್ಥ್ಯವನ್ನು ಇದು ಹೊಂದಿರುತ್ತದೆ.
ಇದು ಸುಮಾರು 200 ಕೆಜಿ ತೂಕದ ಸಿಸ್ಟಮ್ ಆಗಿದ್ದು, 2026ರ ನಾಲ್ಕನೇ ತ್ರೈಮಾಸಿಕದಲ್ಲಿ (Q4) ಉಡಾವಣೆಯಾಗುವ ಸಾಧ್ಯತೆಯಿದೆ.
GPU ಸಾಮರ್ಥ್ಯ: ಭೂಮಿಯ ಮೇಲಿರುವ ಡೇಟಾ ಸೆಂಟರ್ಗಳಲ್ಲಿ ಬಳಸುವಂತಹ ಶಕ್ತಿಶಾಲಿ ಜಿಪಿಯು (GPU)ಗಳನ್ನು ಈ ಉಪಗ್ರಹದಲ್ಲಿ ಅಳವಡಿಸಲಾಗುತ್ತಿದೆ. ಇದು ಬಾಹ್ಯಾಕಾಶದಲ್ಲಿಯೇ ಎಐ ಮಾದರಿಗಳ ತರಬೇತಿ ಮತ್ತು ವಿಶ್ಲೇಷಣೆಗೆ ಸಹಕಾರಿಯಾಗಲಿದೆ.
ಭೂಮಿಯ ಮೇಲಿನ ಡೇಟಾ ಸೆಂಟರ್ಗಳಿಗೆ ಭಾರಿ ವಿದ್ಯುತ್ ಮತ್ತು ಜಾಗದ ಅವಶ್ಯಕತೆಯಿರುತ್ತದೆ. ಆದರೆ ಬಾಹ್ಯಾಕಾಶದಲ್ಲಿ ಸೌರಶಕ್ತಿಯನ್ನು ಬಳಸಿಕೊಂಡು ಪರಿಸರ ಸ್ನೇಹಿಯಾಗಿ ಕಾರ್ಯನಿರ್ವಹಿಸಬಹುದು.
ಕೃಷಿ ಕ್ಷೇತ್ರದಲ್ಲಿ ಬೆಳೆ ರೋಗ ಪತ್ತೆ, ಅರಣ್ಯ ಬೆಂಕಿ ಅಥವಾ ನೈಸರ್ಗಿಕ ವಿಕೋಪಗಳ ಬಗ್ಗೆ ತಕ್ಷಣದ ಮಾಹಿತಿಯನ್ನು ಪಡೆಯಲು ಇದು ಸಹಕಾರಿ.
