ನವದೆಹಲಿ: ಖ್ಯಾತ ಗೀತರಚನೆಕಾರ, ಕವಿ ಮತ್ತು ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿಯ (CBFC) ಮಾಜಿ ಅಧ್ಯಕ್ಷ ಪ್ರಸೂನ್ ಜೋಶಿ ಅವರನ್ನು ದೇಶದ ಸಾರ್ವಜನಿಕ ಪ್ರಸಾರ ಸಂಸ್ಥೆಯಾದ ‘ಪ್ರಸಾರ ಭಾರತಿ’ಯ ಅಧ್ಯಕ್ಷರನ್ನಾಗಿ ಕೇಂದ್ರ ಸರ್ಕಾರ ನೇಮಕ ಮಾಡಿದೆ.
ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯವು ಶನಿವಾರ ಈ ಕುರಿತು ಅಧಿಕೃತ ಆದೇಶ ಹೊರಡಿಸಿದೆ. ಪ್ರಸಾರ ಭಾರತಿ ಮಂಡಳಿಯ ಅಧ್ಯಕ್ಷ ಸ್ಥಾನವು ಕಳೆದ ಕೆಲವು ಸಮಯದಿಂದ ಖಾಲಿ ಇತ್ತು. ಈಗ ಪ್ರಸೂನ್ ಜೋಶಿ ಅವರ ನೇಮಕಾತಿಯೊಂದಿಗೆ ಸಂಸ್ಥೆಗೆ ಹೊಸ ವೇಗ ಸಿಗುವ ನಿರೀಕ್ಷೆಯಿದೆ.
ಪದ್ಮಶ್ರೀ ಪುರಸ್ಕೃತ: ಕಲೆ ಮತ್ತು ಸಾಹಿತ್ಯ ಕ್ಷೇತ್ರದಲ್ಲಿನ ಸಾಧನೆಗಾಗಿ ಭಾರತ ಸರ್ಕಾರ ಇವರಿಗೆ ಪದ್ಮಶ್ರೀ ಪ್ರಶಸ್ತಿ ನೀಡಿ ಗೌರವಿಸಿದೆ.
ಸಿಬಿಎಫ್ಸಿ ಮಾಜಿ ಮುಖ್ಯಸ್ಥ: ಸೆನ್ಸಾರ್ ಮಂಡಳಿಯ ಅಧ್ಯಕ್ಷರಾಗಿ ಅವರು ದೀರ್ಘಕಾಲ ಸೇವೆ ಸಲ್ಲಿಸಿದ್ದಾರೆ.
ಜಾಹೀರಾತು ಮತ್ತು ಸಿನಿಮಾ ರಂಗ: ಅವರು ಜಾಗತಿಕ ಜಾಹೀರಾತು ಸಂಸ್ಥೆಯಾದ ‘ಮೆಕ್ ಕ್ಯಾನ್ ವರ್ಲ್ಡ್ ಗ್ರೂಪ್’ನ ಏಷ್ಯಾ ಪೆಸಿಫಿಕ್ ಮುಖ್ಯಸ್ಥರಾಗಿಯೂ ಗುರುತಿಸಿಕೊಂಡಿದ್ದಾರೆ. ‘ಭಾಗ್ ಮಿಲ್ಖಾ ಭಾಗ್’, ‘ತಾರೆ ಜಮೀನ್ ಪರ್’ ಅಂತಹ ಚಿತ್ರಗಳಿಗೆ ಅವರು ಬರೆದ ಗೀತೆಗಳು ಅಪಾರ ಜನಪ್ರಿಯತೆ ಗಳಿಸಿವೆ.
