ತುಮಕೂರು : ತೆಂಗಿನ ನಗರಿ ತಿಪಟೂರಿನ ಎಪಿಎಂಸಿ ಮಾರುಕಟ್ಟೆಯಲ್ಲಿ ಒಣಕೊಬ್ಬರಿ (ಉಂಡೆ ಕೊಬ್ಬರಿ) ಬೆಲೆ ಸಾರ್ವಕಾಲಿಕ ದಾಖಲೆ ಬರೆದಿದೆ. ಸೋಮವಾರ ನಡೆದ ಟೆಂಡರ್ ಪ್ರಕ್ರಿಯೆಯಲ್ಲಿ ಗುಣಮಟ್ಟದ ಕೊಬ್ಬರಿಯು ಕ್ವಿಂಟಲ್ಗೆ ₹38,000 ದರಕ್ಕೆ ಮಾರಾಟವಾಗುವ ಮೂಲಕ ಇತಿಹಾಸ ನಿರ್ಮಿಸಿದೆ.
ಕೊಬ್ಬರಿ ಮಾರುಕಟ್ಟೆಯ ಇತಿಹಾಸದಲ್ಲೇ ಕ್ವಿಂಟಲ್ಗೆ ಲಭಿಸಿದ ಗರಿಷ್ಠ ಮೊತ್ತ ಇದಾಗಿದೆ.ಕಳೆದ ಸೋಮವಾರವಷ್ಟೇ ₹32,000 ಗಡಿ ದಾಟಿದ್ದ ಕೊಬ್ಬರಿ ಬೆಲೆ, ಗುರುವಾರ ವೇಳೆಗೆ ₹36,000ಕ್ಕೆ ತಲುಪಿತ್ತು. ಈಗ ಕೇವಲ ನಾಲ್ಕೇ ದಿನಗಳಲ್ಲಿ ₹38,000ಕ್ಕೆ ಜಿಗಿದಿದೆ.
ಮಾರುಕಟ್ಟೆಯಲ್ಲಿ ಕೊಬ್ಬರಿಗೆ ಭಾರೀ ಬೇಡಿಕೆ ಇರುವುದರಿಂದ ಮುಂಬರುವ ದಿನಗಳಲ್ಲಿ ಬೆಲೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಮಾರುಕಟ್ಟೆ ಮೂಲಗಳು ತಿಳಿಸಿವೆ. ಕೊಬ್ಬರಿ ಬೆಲೆಯಲ್ಲಿನ ಈ ದಿಢೀರ್ ಏರಿಕೆಯು ತೆಂಗು ಬೆಳೆಗಾರರಲ್ಲಿ ಹೊಸ ಭರವಸೆ ಮತ್ತು ಸಂತಸ ಮೂಡಿಸಿದೆ.
