ನವದೆಹಲಿ: ಭಾರತೀಯ ಸಶಸ್ತ್ರ ಪಡೆಗಳಲ್ಲಿ (ಸೇನೆ, ನೌಕಾಪಡೆ ಮತ್ತು ವಾಯುಪಡೆ) ಸೇವೆ ಸಲ್ಲಿಸುತ್ತಿರುವ ಮಹಿಳಾ ಶಾರ್ಟ್ ಸರ್ವಿಸ್ ಕಮಿಷನ್ (SSC) ಅಧಿಕಾರಿಗಳಿಗೆ ‘ಪರ್ಮನೆಂಟ್ ಕಮಿಷನ್’ (ಖಾಯಂ ಆಯೋಗ) ನೀಡುವುದು ಕಡ್ಡಾಯ ಎಂದು ಸುಪ್ರೀಂ ಕೋರ್ಟ್ ಇಂದು (ಮಾರ್ಚ್ 24, 2026) ಮಹತ್ವದ ತೀರ್ಪು ನೀಡಿದೆ. ಮಹಿಳಾ ಅಧಿಕಾರಿಗಳ ವಿರುದ್ಧದ “ವ್ಯವಸ್ಥಿತ ತಾರತಮ್ಯ”ವನ್ನು ಕೊನೆಗಾಣಿಸಿರುವ ನ್ಯಾಯಾಲಯ, ಅವರಿಗೆ ಪುರುಷ ಅಧಿಕಾರಿಗಳಿಗೆ ಸಮಾನವಾದ ವೃತ್ತಿಜೀವನದ ಅವಕಾಶಗಳನ್ನು ಒದಗಿಸಬೇಕು ಎಂದು ಆದೇಶಿಸಿದೆ.
ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್ ನೇತೃತ್ವದ ಪೀಠವು ಈ ತೀರ್ಪು ಪ್ರಕಟಿಸಿದ್ದು, ಈ ಹಿಂದೆ ಮಹಿಳೆಯರಿಗೆ ವಿಧಿಸಲಾಗಿದ್ದ ವಾರ್ಷಿಕ 250 ಅಧಿಕಾರಿಗಳ ಮಿತಿಯನ್ನು (Cap) ‘ಅನಿಯಂತ್ರಿತ ಮತ್ತು ಅನ್ಯಾಯ’ ಎಂದು ರದ್ದುಗೊಳಿಸಿದೆ.
ಮಹಿಳಾ ಅಧಿಕಾರಿಗಳನ್ನು ಮೌಲ್ಯಮಾಪನ ಮಾಡುವ ವಿಧಾನವು ದೋಷಪೂರಿತವಾಗಿದೆ ಎಂದು ನ್ಯಾಯಾಲಯ ಹೇಳಿದೆ. ಮಹಿಳೆಯರು ದೀರ್ಘಕಾಲದವರೆಗೆ ವೃತ್ತಿಜೀವನ ಮುಂದುವರಿಸುವುದಿಲ್ಲ ಎಂಬ ಪೂರ್ವಾಗ್ರಹ ಪೀಡಿತ ಮನಸ್ಥಿತಿಯಿಂದ ಅವರ ವಾರ್ಷಿಕ ವರದಿಗಳನ್ನು (ACR) ಸಿದ್ಧಪಡಿಸಲಾಗುತ್ತಿದೆ ಎಂದು ಸಿಜೆಐ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
14 ವರ್ಷಗಳ ಸೇವೆ ಮುಗಿಸಿ ಬಿಡುಗಡೆಯಾದ ಮಹಿಳಾ ಅಧಿಕಾರಿಗಳಿಗೂ ಈಗ ಪಿಂಚಣಿ ಸೌಲಭ್ಯ ಸಿಗಲಿದೆ. 20 ವರ್ಷಗಳ ಕನಿಷ್ಠ ಸೇವೆಯನ್ನು ಪೂರೈಸದಿದ್ದರೂ, ಅವರನ್ನು ‘ಪೂರ್ಣಾವಧಿ ಸೇವೆ’ ಸಲ್ಲಿಸಿದವರು ಎಂದು ಪರಿಗಣಿಸಿ ಪಿಂಚಣಿ ನೀಡುವಂತೆ ಕೋರ್ಟ್ ವಿಶೇಷ ಅಧಿಕಾರ (ಅನುಚ್ಛೇದ 142) ಬಳಸಿ ಆದೇಶಿಸಿದೆ.
ಹಳೆಯ ಮಿತಿ ರದ್ದು: ಪರ್ಮನೆಂಟ್ ಕಮಿಷನ್ ಪಡೆಯಲು ಕೇವಲ 250 ಮಹಿಳಾ ಅಧಿಕಾರಿಗಳಿಗೆ ಮಾತ್ರ ಅವಕಾಶ ಎಂಬ ನಿಯಮವನ್ನು ಕೋರ್ಟ್ ಕಿತ್ತೆಸೆದಿದೆ. ಅರ್ಹತೆ ಮತ್ತು ವೈದ್ಯಕೀಯ ಮಾನದಂಡಗಳನ್ನು ಪೂರೈಸುವ ಎಲ್ಲಾ ಮಹಿಳಾ ಅಧಿಕಾರಿಗಳು ಇನ್ನು ಮುಂದೆ ಖಾಯಂ ಹುದ್ದೆ ಪಡೆಯಲು ಅರ್ಹರಾಗಿದ್ದಾರೆ.
ವಾಯುಪಡೆ ಮತ್ತು ನೌಕಾಪಡೆಗೂ ಅನ್ವಯ: ಈ ತೀರ್ಪು ಭೂಸೇನೆ ಮಾತ್ರವಲ್ಲದೆ ವಾಯುಪಡೆ ಮತ್ತು ನೌಕಾಪಡೆಯ ಮಹಿಳಾ ಅಧಿಕಾರಿಗಳಿಗೂ ಅನ್ವಯಿಸಲಿದೆ. 2019ರ ನಂತರ ಜಾರಿಗೆ ಬಂದಿದ್ದ ಕೆಲವು ಕಠಿಣ ಮೌಲ್ಯಮಾಪನ ನಿಯಮಗಳು ಮಹಿಳೆಯರಿಗೆ ಮಾರಕವಾಗಿದ್ದವು ಎಂದು ಕೋರ್ಟ್ ಅಭಿಪ್ರಾಯಪಟ್ಟಿದೆ.
