ಇಂದಿನ ಧಾವಂತದ ಜೀವನಶೈಲಿಯಲ್ಲಿ ಫಿಟ್ ಆಗಿರುವುದು ಒಂದು ದೊಡ್ಡ ಸವಾಲು. ಗಂಟೆಗಟ್ಟಲೆ ಕಂಪ್ಯೂಟರ್ ಮುಂದೆ ಕುಳಿತು ಕೆಲಸ ಮಾಡುವುದು ಮತ್ತು ದೈಹಿಕ ಶ್ರಮದ ಕೊರತೆಯಿಂದಾಗಿ ಅನೇಕ ಆರೋಗ್ಯ ಸಮಸ್ಯೆಗಳು ನಮ್ಮನ್ನು ಕಾಡುತ್ತಿವೆ. ಜಿಮ್ಗೆ ಹೋಗಿ ಭಾರ ಎತ್ತಲು ಸಮಯವಿಲ್ಲದವರಿಗೆ ಅಥವಾ ಆಸಕ್ತಿ ಇಲ್ಲದವರಿಗೆ ಆರೋಗ್ಯ ತಜ್ಞರು ಸೂಚಿಸುವ ಅತ್ಯುತ್ತಮ ಮತ್ತು ಸುಲಭ ಮಾರ್ಗವೆಂದರೆ ನಡಿಗೆ.
ಇತ್ತೀಚಿನ ದಿನಗಳಲ್ಲಿ ದಿನಕ್ಕೆ 10,000 ಹೆಜ್ಜೆ ನಡೆಯುವ ಗುರಿ ವಿಶ್ವಾದ್ಯಂತ ಜನಪ್ರಿಯವಾಗಿದೆ. ಸ್ಮಾರ್ಟ್ ವಾಚ್ಗಳು ಮತ್ತು ಮೊಬೈಲ್ ಆಪ್ಗಳ ಬಳಕೆ ಹೆಚ್ಚಾದಂತೆ ಈ ಟ್ರೆಂಡ್ ಮತ್ತಷ್ಟು ಚುರುಕುಗೊಂಡಿದೆ. ಹಾಗಾದರೆ, ನಿಜವಾಗಿಯೂ 10 ಸಾವಿರ ಹೆಜ್ಜೆ ನಡೆದರೆ ಏನಾಗುತ್ತದೆ? ಅದಕ್ಕೆ ಎಷ್ಟು ದೂರ ನಡೆಯಬೇಕು? ಎಷ್ಟು ಕ್ಯಾಲರಿ ಕರಗುತ್ತದೆ? ಎಂಬ ಕುತೂಹಲಕಾರಿ ಅಂಶಗಳು ಇಲ್ಲಿವೆ.
10 ಸಾವಿರ ಹೆಜ್ಜೆ ಎಂದರೆ ಎಷ್ಟು ಕಿಲೋಮೀಟರ್?
ಹತ್ತು ಸಾವಿರ ಹೆಜ್ಜೆ ಎನ್ನುವುದು ಕೇಳಲು ದೊಡ್ಡ ಸಂಖ್ಯೆಯಂತೆ ಎನಿಸಬಹುದು. ಆದರೆ, ಒಬ್ಬ ಸರಾಸರಿ ವ್ಯಕ್ತಿ 10 ಸಾವಿರ ಹೆಜ್ಜೆ ಪೂರ್ಣಗೊಳಿಸಲು ಸುಮಾರು 7 ರಿಂದ 8 ಕಿಲೋಮೀಟರ್ ದೂರ ನಡೆಯಬೇಕಾಗುತ್ತದೆ. ಈ ದೂರವು ವ್ಯಕ್ತಿಯ ಎತ್ತರ ಮತ್ತು ಅವರ ಹೆಜ್ಜೆಯ ಉದ್ದದ ಮೇಲೆ ಅವಲಂಬಿತವಾಗಿರುತ್ತದೆ. ನೀವು ಸಾಮಾನ್ಯ ವೇಗದಲ್ಲಿ ಯಾವುದೇ ವಿರಾಮವಿಲ್ಲದೆ ನಡೆದರೆ, ಈ ಗುರಿಯನ್ನು ತಲುಪಲು ಸುಮಾರು ಒಂದರಿಂದ ಒಂದೂವರೆ ಗಂಟೆ ಸಮಯ ಬೇಕಾಗುತ್ತದೆ.
ಎಷ್ಟು ಕ್ಯಾಲರಿಗಳು ಕರಗುತ್ತವೆ?
ತೂಕ ಇಳಿಸಿಕೊಳ್ಳಲು ಬಯಸುವವರಿಗೆ ಕ್ಯಾಲರಿಗಳ ಲೆಕ್ಕಾಚಾರ ಬಹಳ ಮುಖ್ಯ. ದಿನಕ್ಕೆ ಹತ್ತು ಸಾವಿರ ಹೆಜ್ಜೆ ನಡೆಯುವುದರಿಂದ ಸರಾಸರಿ 300 ರಿಂದ 500 ಕ್ಯಾಲರಿಗಳು ಬರ್ನ್ ಆಗುತ್ತವೆ. ನಿಮ್ಮ ದೇಹದ ತೂಕ, ವಯಸ್ಸು ಮತ್ತು ನೀವು ನಡೆಯುವ ವೇಗಕ್ಕೆ ಅನುಗುಣವಾಗಿ ಈ ಕ್ಯಾಲರಿ ಪ್ರಮಾಣದಲ್ಲಿ ಬದಲಾವಣೆ ಇರುತ್ತದೆ. ಸ್ವಲ್ಪ ವೇಗವಾಗಿ, ಬೆವರು ಬರುವಂತೆ ನಡೆದರೆ ಹೆಚ್ಚಿನ ಕ್ಯಾಲರಿಗಳನ್ನು ಕರಗಿಸಬಹುದು.
ಪ್ರತಿದಿನ 10 ಸಾವಿರ ಹೆಜ್ಜೆ ನಡೆಯುವುದರಿಂದ ಆಗುವ ಪ್ರಯೋಜನಗಳು:
ತೂಕ ನಿಯಂತ್ರಣ: ಪ್ರತಿದಿನ ನಿಯಮಿತವಾಗಿ ನಡೆಯುವುದರಿಂದ ದೇಹದ ಹೆಚ್ಚುವರಿ ಕೊಬ್ಬು ಕರಗುತ್ತದೆ. ಇದು ಬೊಜ್ಜು ಬರದಂತೆ ತಡೆಯಲು ಮತ್ತು ದೇಹದ ತೂಕವನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ.
ಹೃದಯದ ಆರೋಗ್ಯ: ನಡಿಗೆಯು ಒಂದು ಅತ್ಯುತ್ತಮ ‘ಕಾರ್ಡಿಯೋ’ ವ್ಯಾಯಾಮ. ಇದು ರಕ್ತ ಪರಿಚಲನೆಯನ್ನು ಸುಧಾರಿಸುತ್ತದೆ, ಹೃದಯದ ಸ್ನಾಯುಗಳನ್ನು ಬಲಪಡಿಸುತ್ತದೆ ಮತ್ತು ಅಧಿಕ ರಕ್ತದೊತ್ತಡ (ಬಿಪಿ) ಹಾಗೂ ಕೆಟ್ಟ ಕೊಲೆಸ್ಟ್ರಾಲ್ ಅನ್ನು ಕಡಿಮೆ ಮಾಡುವ ಮೂಲಕ ಹೃದಯಾಘಾತದ ಅಪಾಯವನ್ನು ತಪ್ಪಿಸುತ್ತದೆ.
ಮಾನಸಿಕ ಪ್ರಶಾಂತತೆ: ನೈಸರ್ಗಿಕ ಗಾಳಿಯಲ್ಲಿ ನಡೆಯುವುದರಿಂದ ಮೆದುಳಿನಲ್ಲಿ ‘ಎಂಡಾರ್ಫಿನ್’ ಎಂಬ ಫೀಲ್-ಗುಡ್ ಹಾರ್ಮೋನುಗಳು ಬಿಡುಗಡೆಯಾಗುತ್ತವೆ. ಇದು ಒತ್ತಡ, ಆತಂಕ ಮತ್ತು ಖಿನ್ನತೆಯನ್ನು ದೂರ ಮಾಡಿ ಮನಸ್ಸನ್ನು ಹಗುರಗೊಳಿಸುತ್ತದೆ.
ಮೂಳೆ ಮತ್ತು ಸ್ನಾಯುಗಳ ಬಲ: ವಯಸ್ಸಾದಂತೆ ಬರುವ ಕೀಲು ನೋವುಗಳನ್ನು ನಡಿಗೆಯಿಂದ ತಡೆಯಬಹುದು. ಇದು ಮೂಳೆಗಳ ಸಾಂದ್ರತೆಯನ್ನು ಹೆಚ್ಚಿಸಿ, ಆಸ್ಟಿಯೋಪೊರೋಸಿಸ್ ಅಂತಹ ಕಾಯಿಲೆಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ.
ದೀರ್ಘಕಾಲದ ಕಾಯಿಲೆಗಳಿಗೆ ಬ್ರೇಕ್: ಪ್ರತಿದಿನ ನಡೆಯುವ ಅಭ್ಯಾಸ ಇರುವವರಿಗೆ ಟೈಪ್-2 ಮಧುಮೇಹ ಬರುವ ಸಾಧ್ಯತೆ ಕಡಿಮೆ. ಸಂಶೋಧನೆಗಳ ಪ್ರಕಾರ, ಇದು ಕ್ಯಾನ್ಸರ್ ಅಪಾಯವನ್ನು 6% ಮತ್ತು ವಯಸ್ಸಾದ ಮೇಲೆ ಬರುವ ಮರೆವಿನ ಕಾಯಿಲೆಯ (Dementia) ಅಪಾಯವನ್ನು 38% ರಷ್ಟು ಕಡಿಮೆ ಮಾಡುತ್ತದೆ.
ಗಮನಿಸಿ: ಈ ಲೇಖನದಲ್ಲಿ ನೀಡಲಾದ ಮಾಹಿತಿಯು ಸಾಮಾನ್ಯ ಅರಿವಿಗಾಗಿ ಮಾತ್ರ. ಯಾವುದೇ ವ್ಯಾಯಾಮ ಅಥವಾ ಆರೋಗ್ಯ ಕ್ರಮವನ್ನು ಅನುಸರಿಸುವ ಮೊದಲು ನಿಮ್ಮ ವೈದ್ಯರ ಅಥವಾ ತಜ್ಞರ ಸಲಹೆಯನ್ನು ಪಡೆಯುವುದು ಸೂಕ್ತ.
