ವಿಮಾನ ಪ್ರಯಾಣಿಕರಿಗೆ ಇಂಧನ ಬರೆ: ಏರ್ ಇಂಡಿಯಾ ಟಿಕೆಟ್ ದರ ಏರಿಕೆ; ಇಂದಿನಿಂದಲೇ ಹೆಚ್ಚುವರಿ ಶುಲ್ಕ ಜಾರಿ!

ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷದಿಂದಾಗಿ ಜಾಗತಿಕ ಮಟ್ಟದಲ್ಲಿ ಕಚ್ಚಾ ತೈಲ ಬೆಲೆ ಗಗನಕ್ಕೇರುತ್ತಿದೆ. ಇದರ ನೇರ ಪರಿಣಾಮ ಈಗ ವಿಮಾನ ಪ್ರಯಾಣಿಕರ ಮೇಲೆ ಬೀರಿದ್ದು, ಟಾಟಾ ಸಮೂಹದ ಏರ್ ಇಂಡಿಯಾ (Air India) ಮತ್ತು ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ವಿಮಾನಯಾನ ಸಂಸ್ಥೆಗಳು ಟಿಕೆಟ್ ದರವನ್ನು ಹೆಚ್ಚಿಸಿವೆ.

​ಯಾವ ಮಾರ್ಗಕ್ಕೆ ಎಷ್ಟು ಶುಲ್ಕ? (ಹಂತ-1: ಮಾರ್ಚ್ 12ರಿಂದ ಅನ್ವಯ)
​ವಿಮಾನ ಇಂಧನ ಬೆಲೆ ಶೇ. 40ರಷ್ಟು ಏರಿಕೆಯಾಗಿರುವ ಹಿನ್ನೆಲೆಯಲ್ಲಿ ಈ ಕೆಳಗಿನಂತೆ ‘ಫ್ಯುಯೆಲ್ ಸರ್ಚಾರ್ಜ್’ ವಿಧಿಸಲಾಗಿದೆ:
​ದೇಶೀಯ ವಿಮಾನಗಳು: ಭಾರತದೊಳಗಿನ ಪ್ರತಿ ಟಿಕೆಟ್ ಮೇಲೆ ₹399 ಹೆಚ್ಚುವರಿ ಶುಲ್ಕ.
​ನೆರೆಹೊರೆಯ ರಾಷ್ಟ್ರಗಳು (SAARC): ಶ್ರೀಲಂಕಾ, ನೇಪಾಳದಂತಹ ದೇಶಗಳಿಗೆ ಹೋಗುವವರಿಗೆ ₹399 ಹೆಚ್ಚುವರಿ ಹೊರೆ.
​ಪಶ್ಚಿಮ ಏಷ್ಯಾ (Middle East): ಪ್ರತಿ ಟಿಕೆಟ್ ಮೇಲೆ 10 ಡಾಲರ್ (ಸುಮಾರು ₹840) ಹೆಚ್ಚಳ.
​ಆಫ್ರಿಕಾ ಮತ್ತು ಆಗ್ನೇಯ ಏಷ್ಯಾ: ಆಫ್ರಿಕಾ ಮಾರ್ಗಗಳಿಗೆ 30 ರಿಂದ 90 ಡಾಲರ್ ಹಾಗೂ ಆಗ್ನೇಯ ಏಷ್ಯಾ ಮಾರ್ಗಗಳಿಗೆ (ಸಿಂಗಾಪುರ ಸೇರಿ) 20 ರಿಂದ 60 ಡಾಲರ್ ಹೆಚ್ಚುವರಿ ಶುಲ್ಕ.
​ಹಂತ-2: ಮಾರ್ಚ್ 18ರಿಂದ ಜಾರಿಯಾಗುವ ದರಗಳು
​ದೂರದ ಪ್ರಯಾಣದ ಅಂತರಾಷ್ಟ್ರೀಯ ವಿಮಾನಗಳಿಗೆ ಎರಡನೇ ಹಂತದಲ್ಲಿ ದರ ಏರಿಕೆಯಾಗಲಿದೆ:
​ಯುರೋಪ್: ಪ್ರಸ್ತುತ ಇರುವ ಶುಲ್ಕಕ್ಕಿಂತ 25 ಡಾಲರ್ ಹೆಚ್ಚಳ (ಒಟ್ಟು 125 ಡಾಲರ್).
​ಅಮೆರಿಕ ಮತ್ತು ಆಸ್ಟ್ರೇಲಿಯಾ: ಪ್ರತಿ ಟಿಕೆಟ್ ಮೇಲೆ 50 ಡಾಲರ್ ಹೆಚ್ಚಳ (ಒಟ್ಟು 200 ಡಾಲರ್).