ಸಾಮಾನ್ಯವಾಗಿ ಹೃದಯಾಘಾತ ಎಂದರೆ ಕೇವಲ ಎದೆನೋವು ಮಾತ್ರ ಎಂದು ನಾವು ಭಾವಿಸುತ್ತೇವೆ. ಆದರೆ ವೈದ್ಯಕೀಯ ಸಂಶೋಧನೆಗಳ ಪ್ರಕಾರ, ಮಹಿಳೆಯರಲ್ಲಿ ಹೃದಯಾಘಾತದ ಲಕ್ಷಣಗಳು ಪುರುಷರಿಗಿಂತ ಸಾಕಷ್ಟು ಭಿನ್ನವಾಗಿರುತ್ತವೆ. ಈ ಲಕ್ಷಣಗಳನ್ನು ಸಾಮಾನ್ಯ ಅಸ್ವಸ್ಥತೆ ಎಂದು ಭಾವಿಸಿ ನಿರ್ಲಕ್ಷಿಸುವುದು ಪ್ರಾಣಾಪಾಯಕ್ಕೆ ಕಾರಣವಾಗಬಹುದು.
ಮಹಿಳೆಯರು ಜಾಗರೂಕರಾಗಿರಬೇಕಾದ ಪ್ರಮುಖ ಲಕ್ಷಣಗಳು ಇಲ್ಲಿವೆ:
1. ಎದೆನೋವಿನ ಬದಲು ಒತ್ತಡದ ಅನುಭವ
ಪುರುಷರಲ್ಲಿ ತೀವ್ರವಾದ ಎದೆನೋವು ಕಾಣಿಸಿಕೊಂಡರೆ, ಮಹಿಳೆಯರಲ್ಲಿ ಎದೆಯ ಭಾಗದಲ್ಲಿ ಏನೋ ಭಾರ ಇಟ್ಟಂತೆ ಅಥವಾ ಬಿಗಿದು ಹಿಡಿದಂತ ಅನುಭವವಾಗುತ್ತದೆ. ಇದು ಎದೆಯ ಮಧ್ಯಭಾಗದಲ್ಲಿ ಕಾಣಿಸಿಕೊಳ್ಳಬಹುದು.
2. ಬೆನ್ನು, ಕುತ್ತಿಗೆ ಅಥವಾ ದವಡೆ ನೋವು
ಹೃದಯಾಘಾತದ ನೋವು ಕೇವಲ ಎದೆಗೆ ಸೀಮಿತವಾಗಿರದೆ, ಮೇಲ್ಭಾಗದ ಬೆನ್ನು, ಕುತ್ತಿಗೆ ಅಥವಾ ದವಡೆಯವರೆಗೂ ಹರಡಬಹುದು. ಅನೇಕ ಮಹಿಳೆಯರು ಇದನ್ನು ಸ್ನಾಯು ಸೆಳೆತ ಎಂದು ತಪ್ಪು ತಿಳಿಯುತ್ತಾರೆ.
3. ವಿಪರೀತ ಸುಸ್ತು ಮತ್ತು ದಣಿವಿನ ಅನುಭವ
ಯಾವುದೇ ದೈಹಿಕ ಶ್ರಮವಿಲ್ಲದಿದ್ದರೂ ಹಠಾತ್ತನೆ ವಿಪರೀತ ಸುಸ್ತು ಎನಿಸುವುದು ಅಥವಾ ದೀರ್ಘಕಾಲದವರೆಗೆ ದಣಿವಿನ ಅನುಭವವಾಗುವುದು ಹೃದಯದ ತೊಂದರೆಯ ಮುನ್ಸೂಚನೆಯಾಗಿರಬಹುದು.
4. ಉಸಿರಾಟದ ತೊಂದರೆ ಮತ್ತು ವಾಕರಿಕೆ
ಕುಳಿತಲ್ಲೇ ಉಸಿರಾಟಕ್ಕೆ ತೊಂದರೆಯಾಗುವುದು, ತಲೆಸುತ್ತು ಬರುವುದು ಅಥವಾ ವಾಂತಿ ಬಂದಂತಾಗುವುದು (Nausea) ಮಹಿಳೆಯರಲ್ಲಿ ಕಂಡುಬರುವ ಸಾಮಾನ್ಯ ಲಕ್ಷಣಗಳು. ಇದನ್ನು ಜೀರ್ಣಕ್ರಿಯೆಯ ಸಮಸ್ಯೆ ಅಥವಾ ಗ್ಯಾಸ್ಟ್ರಿಕ್ ಎಂದು ನಿರ್ಲಕ್ಷಿಸಬೇಡಿ.
5. ಅತಿಯಾದ ಬೆವರುವಿಕೆ
ವಾತಾವರಣ ತಂಪಾಗಿದ್ದರೂ ಅಥವಾ ನೀವು ವಿಶ್ರಾಂತಿ ಪಡೆಯುತ್ತಿದ್ದರೂ ಹಠಾತ್ತನೆ ಮೈಯೆಲ್ಲಾ ಬೆವರುತ್ತಿದ್ದರೆ, ಅದು ಹೃದಯಕ್ಕೆ ರಕ್ತ ಸಂಚಾರದಲ್ಲಿ ವ್ಯತ್ಯಯವಾಗುತ್ತಿರುವುದರ ಸಂಕೇತವಾಗಿರಬಹುದು.
ನೆನಪಿರಲಿ: ಮಹಿಳೆಯರು ಮನೆಯ ಜವಾಬ್ದಾರಿ ಅಥವಾ ಕೆಲಸದ ಒತ್ತಡದಲ್ಲಿ ತಮ್ಮ ಆರೋಗ್ಯದ ಸಣ್ಣಪುಟ್ಟ ಏರುಪೇರುಗಳನ್ನು ಕಡೆಗಣಿಸುತ್ತಾರೆ. ಮೇಲೆ ತಿಳಿಸಿದ ಯಾವುದೇ ಲಕ್ಷಣಗಳು ಅಸಹಜವಾಗಿ ಕಂಡುಬಂದಲ್ಲಿ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.
