ಇಸ್ಲಾಮಾಬಾದ್/ಕಾಬೂಲ್: ನೆರೆ ರಾಷ್ಟ್ರಗಳಾದ ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನದ ನಡುವಿನ ಗಡಿ ಸಂಘರ್ಷ ಈಗ ಯುದ್ಧದ ರೂಪ ಪಡೆದುಕೊಂಡಿದೆ. ಅಫ್ಘಾನಿಸ್ತಾನದ ತಾಲಿಬಾನ್ ನೆಲೆಗಳನ್ನು ಗುರಿಯಾಗಿಸಿಕೊಂಡು ಪಾಕಿಸ್ತಾನ ನಡೆಸಿದ ಭೀಕರ ವಾಯುದಾಳಿಯಲ್ಲಿ 133ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ.
ಆಪರೇಷನ್ ‘ಗಜಬ್ ಲಿಲ್-ಹಕ್’
ಪಾಕಿಸ್ತಾನವು ‘ಆಪರೇಷನ್ ಗಜಬ್ ಲಿಲ್-ಹಕ್’ ಹೆಸರಿನಲ್ಲಿ ಈ ಕಾರ್ಯಾಚರಣೆ ನಡೆಸಿದ್ದು, ಅಫ್ಘಾನಿಸ್ತಾನದ ಪ್ರಮುಖ ನಗರಗಳಾದ ಕಾಬೂಲ್, ಕಂದಹಾರ್ ಮತ್ತು ಪಕ್ತಿಕಾಗಳ ಮೇಲೆ ಕ್ಷಿಪಣಿ ದಾಳಿ ನಡೆಸಿದೆ.
ದಾಳಿಯ ಪ್ರಮುಖ ಮುಖ್ಯಾಂಶಗಳು:
ಜೀವಹಾನಿ: 133 ತಾಲಿಬಾನ್ ಕಾರ್ಯಕರ್ತರು ಸಾವು, 200ಕ್ಕೂ ಹೆಚ್ಚು ಜನರಿಗೆ ಗಂಭೀರ ಗಾಯ.
ನೆಲೆಗಳ ಧ್ವಂಸ: ತಾಲಿಬಾನ್ ಆಡಳಿತದ 27 ಪೋಸ್ಟ್ಗಳು ನಾಶವಾಗಿದ್ದು, 9 ಪೋಸ್ಟ್ಗಳನ್ನು ಪಾಕ್ ಸೇನೆ ವಶಪಡಿಸಿಕೊಂಡಿದೆ.
ಮಿಲಿಟರಿ ಆಸ್ತಿಪಾಸ್ತಿ ನಾಶ: 2 ಕಾರ್ಪ್ಸ್ ಕೇಂದ್ರ ಕಚೇರಿಗಳು, 3 ಬ್ರಿಗೇಡ್ ಕೇಂದ್ರ ಕಚೇರಿಗಳು, ಮದ್ದುಗುಂಡು ಡಿಪೋಗಳು ಸೇರಿದಂತೆ 80ಕ್ಕೂ ಹೆಚ್ಚು ಟ್ಯಾಂಕ್ಗಳು ಮತ್ತು ಫಿರಂಗಿಗಳನ್ನು ಧ್ವಂಸಗೊಳಿಸಿರುವುದಾಗಿ ಪಾಕಿಸ್ತಾನದ ಮಾಹಿತಿ ಸಚಿವ ಅತ್ತೌಲ್ಲಾ ತರಾರ್ ತಿಳಿಸಿದ್ದಾರೆ.
ಪ್ರತೀಕಾರ ತೀರಿಸಿಕೊಂಡ ಅಫ್ಘಾನಿಸ್ತಾನ?
ಪಾಕಿಸ್ತಾನದ ಈ ದಾಳಿಗೆ ಪ್ರತಿಯಾಗಿ ಅಫ್ಘಾನಿಸ್ತಾನ ಕೂಡ ತಿರುಗೇಟು ನೀಡಿದೆ. ಗುರುವಾರ ತಡರಾತ್ರಿ ಗಡಿಯಾಚೆಗಿನ ದಾಳಿ ನಡೆಸಿದ ಕಾಬೂಲ್ ಪಡೆಗಳು, ಪಾಕಿಸ್ತಾನದ ಒಂದು ಡಜನ್ಗೂ ಹೆಚ್ಚು ಸೇನಾ ಠಾಣೆಗಳನ್ನು ವಶಪಡಿಸಿಕೊಂಡಿರುವುದಾಗಿ ಹೇಳಿಕೊಂಡಿವೆ. ಕಾಬೂಲ್ ನಗರದಲ್ಲಿ ರಾತ್ರಿಯಿಡೀ ಸ್ಫೋಟದ ಶಬ್ದಗಳು ಮತ್ತು ಯುದ್ಧ ವಿಮಾನಗಳ ಅಬ್ಬರ ಕೇಳಿಬಂದಿದ್ದು, ಗಡಿ ಭಾಗದಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದೆ.
