ಬೆಂಗಳೂರು: ದೇಶದಲ್ಲಿ ವಾಸಿಸುವ ಪ್ರತಿಯೊಬ್ಬರಿಗೂ ಆಧಾರ್ ಕಾರ್ಡ್ ಅತ್ಯಂತ ಪ್ರಮುಖವಾದ ದಾಖಲೆಯಾಗಿದೆ. ಈ ಗುರುತಿನ ಚೀಟಿ ಇಲ್ಲದೆ ಯಾವುದೇ ಸರ್ಕಾರಿ ಅಥವಾ ಖಾಸಗಿ ಸೇವೆಗಳನ್ನು ಪಡೆಯುವುದು ಅಸಾಧ್ಯ. ಯಾವುದೇ ರೀತಿಯ ಪರಿಶೀಲನೆಗಾದರೂ ಆಧಾರ್ ಕಾರ್ಡ್ ಕಡ್ಡಾಯವಾಗಿ ಬೇಕೇ ಬೇಕು. ಹೀಗಾಗಿ ಈ ಕಾರ್ಡ್ ಅನ್ನು ನಾವು ಯಾವಾಗಲೂ ನಮ್ಮ ಬಳಿ ಇಟ್ಟುಕೊಳ್ಳಬೇಕಾಗುತ್ತದೆ. ಬಹುತೇಕ ಪ್ರತಿ ಸಣ್ಣ ಮತ್ತು ದೊಡ್ಡ ಕೆಲಸಕ್ಕೂ ಆಧಾರ್ ಅನಿವಾರ್ಯವಾಗಿದೆ. ಇಂತಹ ಪ್ರಮುಖ ಕಾರ್ಡ್ನಲ್ಲಿರುವ ಎಲ್ಲಾ ವಿವರಗಳು ಸರಿಯಾಗಿದ್ದರೆ, ಪರಿಶೀಲನೆಯ ಸಮಯದಲ್ಲಿ ಯಾವುದೇ ತಾಂತ್ರಿಕ ತೊಂದರೆಗಳು ಎದುರಾಗುವುದಿಲ್ಲ. ಆದರೆ, ಮುಖ್ಯವಾಗಿ ಫೋಟೋ ವಿಷಯದಲ್ಲಿ ಹಲವರು ಸಮಸ್ಯೆಗಳನ್ನು ಎದುರಿಸುತ್ತಿರುತ್ತಾರೆ. ಆಧಾರ್ ಕಾರ್ಡ್ನಲ್ಲಿರುವ ಫೋಟೋವನ್ನು ನೋಡಿ ಗುರುತಿಸುವುದು ಹಲವು ಬಾರಿ ಕಷ್ಟವಾಗುತ್ತದೆ.
ಸುಲಭವಾಗಿ ಬದಲಾಯಿಸಿಕೊಳ್ಳಲು ಅವಕಾಶ
ಅನೇಕ ಜನರ ಆಧಾರ್ ಕಾರ್ಡ್ನಲ್ಲಿರುವ ಫೋಟೋ ತುಂಬಾ ಹಳೆಯದಾಗಿರುತ್ತದೆ ಅಥವಾ ಅಸ್ಪಷ್ಟವಾಗಿರುತ್ತದೆ. ಇದರಿಂದಾಗಿ ವೆರಿಫಿಕೇಶನ್ ಸಮಯದಲ್ಲಿ ವಿಳಂಬವಾಗಬಹುದು ಮತ್ತು ನಿಮ್ಮನ್ನು ಗುರುತಿಸುವುದು ಕಷ್ಟವಾಗಬಹುದು. ಇಂತಹ ಸಂದರ್ಭಗಳಲ್ಲಿ ನಿಮ್ಮ ಆಧಾರ್ ಕಾರ್ಡ್ನಲ್ಲಿರುವ ಫೋಟೋವನ್ನು ನೀವು ಸುಲಭವಾಗಿ ಬದಲಾಯಿಸಿಕೊಳ್ಳಬಹುದು. UIDAI ಆಧಾರ್ ಕಾರ್ಡ್ನಲ್ಲಿ ಫೋಟೋ ಅಪ್ಡೇಟ್ ಮಾಡಲು ಅವಕಾಶ ನೀಡಿದೆ. ಆದರೆ, ಇದನ್ನು ನೀವು ಆನ್ಲೈನ್ನಲ್ಲಿ ಬದಲಾಯಿಸಲು ಸಾಧ್ಯವಿಲ್ಲ. ನಿಮ್ಮ ಹತ್ತಿರದ ಆಧಾರ್ ಸೇವಾ ಕೇಂದ್ರಕ್ಕೆ ಭೇಟಿ ನೀಡುವ ಮೂಲಕ ಮಾತ್ರ ಇದನ್ನು ಬದಲಾಯಿಸಿಕೊಳ್ಳಬಹುದು. ಅದು ಹೇಗೆ ಎಂಬುದನ್ನು ಇಲ್ಲಿ ತಿಳಿಯಿರಿ.
ಫೋಟೋ ಬದಲಾಯಿಸುವುದು ಹೇಗೆ..?
ಆಧಾರ್ ಕೇಂದ್ರಕ್ಕೆ ಭೇಟಿ ನೀಡಿ: ಮೊದಲಿಗೆ ನಿಮ್ಮ ಮನೆಗೆ ಹತ್ತಿರವಿರುವ ಯಾವುದೇ ಅಧಿಕೃತ ಆಧಾರ್ ಸೇವಾ ಕೇಂದ್ರ ಅಥವಾ ಆಧಾರ್ ನೋಂದಣಿ ಕೇಂದ್ರಕ್ಕೆ ಹೋಗಬೇಕು.
ಅರ್ಜಿ ಫಾರಂ ಪಡೆಯಿರಿ: ಆಧಾರ್ ಕೇಂದ್ರಕ್ಕೆ ತಲುಪಿದ ನಂತರ, ಅಲ್ಲಿನ ಸಿಬ್ಬಂದಿಯಿಂದ ‘ಆಧಾರ್ ಅಪ್ಡೇಟ್ ಫಾರಂ’ (Aadhaar Update Form) ಅನ್ನು ಪಡೆದುಕೊಳ್ಳಿ.
ಮಾಹಿತಿ ಭರ್ತಿ ಮಾಡಿ: ಈ ಫಾರಂನಲ್ಲಿ ಕೇಳಲಾದ ಅಗತ್ಯ ಮತ್ತು ಸರಿಯಾದ ಮಾಹಿತಿಯನ್ನು ಜಾಗರೂಕತೆಯಿಂದ ಭರ್ತಿ ಮಾಡಿ.
ಬಯೋಮೆಟ್ರಿಕ್ ಪರಿಶೀಲನೆ: ಫಾರಂ ಅನ್ನು ಸಲ್ಲಿಸಿದ ನಂತರ, ಅಲ್ಲಿನ ಸಿಬ್ಬಂದಿ ನಿಮ್ಮ ಬೆರಳಚ್ಚು (Fingerprints) ಮತ್ತು ಕಣ್ಣಿನ ಪಾಪೆಯನ್ನು (Iris) ಸ್ಕ್ಯಾನ್ ಮಾಡುವ ಮೂಲಕ ಬಯೋಮೆಟ್ರಿಕ್ ವಿವರಗಳನ್ನು ಪರಿಶೀಲಿಸುತ್ತಾರೆ.
ಹೊಸ ಫೋಟೋ ತೆಗೆಯುವುದು: ತದನಂತರ ಅಲ್ಲಿನ ಕಂಪ್ಯೂಟರ್ ಆಪರೇಟರ್ ನಿಮ್ಮ ಹೊಸ ಫೋಟೋವನ್ನು ಸ್ಥಳದಲ್ಲೇ ಕ್ಲಿಕ್ ಮಾಡುತ್ತಾರೆ. ಈ ಹೊಸ ಫೋಟೋವನ್ನೇ ಮುಂದೆ ನಿಮ್ಮ ಆಧಾರ್ ಕಾರ್ಡ್ನಲ್ಲಿ ಮುದ್ರಿಸಲಾಗುತ್ತದೆ.
ಶುಲ್ಕ ಪಾವತಿ ಮತ್ತು ರಶೀದಿ: ಆಧಾರ್ ಕಾರ್ಡ್ನಲ್ಲಿ ಫೋಟೋ ಅಪ್ಡೇಟ್ ಮಾಡಲು ನಿಗದಿಪಡಿಸಿದ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ. ಹಣ ಪಾವತಿಸಿದ ನಂತರ ನಿಮಗೆ ಒಂದು ‘ಅಕ್ನಾಲೆಡ್ಜ್ಮೆಂಟ್ ಸ್ಲಿಪ್’ (Acknowledgement Slip) ನೀಡಲಾಗುತ್ತದೆ.
ಆನ್ಲೈನ್ನಲ್ಲಿ ಸ್ಟೇಟಸ್ ಚೆಕ್ ಮಾಡಿ: ನಿಮ್ಮ ಹೊಸ ಫೋಟೋ ಸಾಮಾನ್ಯವಾಗಿ ಕೆಲವು ದಿನಗಳಲ್ಲಿ UIDAI ನ ಪ್ರಮುಖ ದಾಖಲೆಗಳಲ್ಲಿ ಅಪ್ಡೇಟ್ ಆಗುತ್ತದೆ. ಈ ಸ್ಲಿಪ್ನಲ್ಲಿರುವ ‘ಅಪ್ಡೇಟ್ ರಿಕ್ವೆಸ್ಟ್ ನಂಬರ್’ (URN) ಬಳಸಿ ನೀವು ಮನೆಯಲ್ಲೇ ಕುಳಿತು ಆನ್ಲೈನ್ನಲ್ಲಿ ನಿಮ್ಮ ಫೋಟೋ ಸ್ಟೇಟಸ್ ಪರಿಶೀಲಿಸಬಹುದು.
ಇ-ಆಧಾರ್ ಡೌನ್ಲೋಡ್ ಮಾಡಿ: ನಿಮ್ಮ ಫೋಟೋ ಅಪ್ಡೇಟ್ ಆಗಿರುವುದು ಕನ್ಫರ್ಮ್ ಆದ ತಕ್ಷಣ, ನೀವು UIDAI ಅಧಿಕೃತ ವೆಬ್ಸೈಟ್ಗೆ ಭೇಟಿ ನೀಡುವ ಮೂಲಕ ‘ಇ-ಆಧಾರ್’ (e-Aadhaar) ಅನ್ನು ಡೌನ್ಲೋಡ್ ಮಾಡಿಕೊಳ್ಳಬಹುದು. ಈ ಹೊಸ ಡಿಜಿಟಲ್ ಆಧಾರ್ ಕಾರ್ಡ್ನಲ್ಲಿ ನಿಮ್ಮ ಅಪ್ಡೇಟ್ ಆದ ಹೊಸ ಫೋಟೋವನ್ನು ನೀವು ನೋಡಬಹುದು.
