ಹಿರಹಟ್ಟಿ (ಗದಗ ಜಿಲ್ಲೆ): ತಾಲ್ಲೂಕಿನ ಸೇವಾನಗರ ಹೊರವಲಯದಲ್ಲಿ 47 ಕುರಿಗಳು ಹಠಾತ್ ಸಾವನ್ನಪ್ಪಿದ್ದು, ಆಂಥ್ರಾಕ್ಸ್ ಶಂಕೆ ವ್ಯಕ್ತವಾಗಿದೆ.
ಶನಿವಾರ ಪೋಮಪ್ಪ ಲಮಾಣಿ ಎಂಬುವರಿಗೆ ಸೇರಿದ ಕುರಿಗಳ ಹಿಂಡಿನ 22 ಕುರಿಗಳು ಮೃತಪಟ್ಟಿದ್ದು, ಮರುದಿನ 25 ಕುರಿಗಳು ಮೃತಪಟ್ಟಿವೆ
ಪಶುವೈದ್ಯರು ಶವದ ಮೂಗಿನ ಹೊಳ್ಳೆಗಳಿಂದ ಸಂಗ್ರಹಿಸಿದ ರಕ್ತ ಮತ್ತು ಸ್ವ್ಯಾಬ್ ಮಾದರಿಗಳನ್ನು ಪರೀಕ್ಷೆಗಾಗಿ ಪ್ರಯೋಗಾಲಯಕ್ಕೆ ಕಳುಹಿಸಿದ್ದಾರೆ.
“ಕುರಿಗಳಲ್ಲಿ ಆಂಥ್ರಾಕ್ಸ್ ಲಕ್ಷಣಗಳು ಕಾಣಿಸಿಕೊಂಡಿವೆ. ಮಾದರಿಗಳನ್ನು ಬಾಗಲಕೋಟೆಯ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ. ಅಲ್ಲಿಂದ ಆಂಥ್ರಾಕ್ಸ್ ನಿರೋಧಕ ಲಸಿಕೆಗಳನ್ನು ಸಂಗ್ರಹಿಸಿ ಸೇವಾನಗರ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿನ ಕುರಿ ಮತ್ತು ಜಾನುವಾರುಗಳಿಗೆ ನೀಡಿದ್ದೇವೆ ಎಂದು ತಾಲ್ಲೂಕು ಪಶುವೈದ್ಯ ಡಾ.ನಿಂಗಪ್ಪ ಓಲೇಕಾರ ಸುದ್ದಿಗಾರರಿಗೆ ತಿಳಿಸಿದರು
