ಬೆಂಗಳೂರು: ವಿವಿಧ ಕಾರಣಗಳಿಂದ ತೆರವಾಗಿರುವ ನಗರ ಸ್ಥಳೀಯ ಸದಸ್ಯರ ಸ್ಥಾನಗಳಿಗೆ ಬೆಂಗಳೂರು ನಗರ ಜಿಲ್ಲಾ ವ್ಯಾಪ್ತಿಯಲ್ಲಿರುವ ಹೆಬ್ಬಗೋಡಿ ನಗರ ಸಭೆ ವಾರ್ಡ್ ಸಂಖ್ಯೆ -27, ಆನೇಕಲ್‍ ಪುರಸಭೆ ವಾರ್ಡ್ ಸಂಖ್ಯೆ -22 ಮತ್ತು ಚಂದಾಪುರ ಪುರಸಭೆ ವಾರ್ಡ್ ಸಂಖ್ಯೆ -21ರಲ್ಲಿ ಉಪ ಚುನಾವಣೆ ನಡೆಯಲಿದ್ದು, ಚುನಾವಣೆ ವೇಳಾಪಟ್ಟಿಯನ್ನು ಪ್ರಕಟಿಸಲಾಗಿದೆ ಎಂದು ಬೆಂಗಳೂರು ನಗರ ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾ ಚುನಾವಣಾಧಿಕಾರಿಗಳಾದ ಜಗದೀಶ.ಜಿ ಅವರು ತಿಳಿಸಿದ್ದಾರೆ.
ಆನೇಕಲ್‍ ತಾಲ್ಲೂಕು ವ್ಯಾಪ್ತಿಯಲ್ಲಿರುವ ಹೆಬ್ಬಗೋಡಿ ನಗರ ಸಭೆ ವಾರ್ಡ್ ಸಂಖ್ಯೆ -27 ರಲ್ಲಿ ಸಾಮಾನ್ಯ (ಮಹಿಳೆ) ಮೀಸಲಾತಿ, ಆನೇಕಲ್‍ ಪುರಸಭೆ ವಾರ್ಡ್ ಸಂಖ್ಯೆ -22ರಲ್ಲಿ ಸಾಮಾನ್ಯ ಹಾಗೂ ಚಂದಾಪುರ ಪುರಸಭೆ ವಾರ್ಡ್ ಸಂಖ್ಯೆ -21ರಲ್ಲಿ ಸಾಮಾನ್ಯ (ಮಹಿಳೆ) ರವರಿಗೆ ಮೀಸಲಾತಿ ನಿಗದಿಪಡಿಸಲಾಗಿದೆ.
ನವೆಂಬರ್ 04 ರಂದು ಜಿಲ್ಲಾಧಿಕಾರಿಗಳು ಚುನಾವಣಾ ಅಧಿಸೂಚನೆ ಹೊರಡಿಸಿದ್ದು, ಅಭ್ಯರ್ಥಿಗಳು ನಾಮಪತ್ರಗಳನ್ನು ನವೆಂಬರ್ 11 (ಸೋಮವಾರ) ರೊಳಗೆ ಸಲ್ಲಿಸಬಹುದು. ನವೆಂಬರ್ 12 ರಂದು (ಮಂಗಳವಾರ) ನಾಮಪತ್ರಗಳನ್ನು ಪರಿಶೀಲಿಸಲಾಗುವುದು. ಉಮೇದುವಾರಿಕೆಗಳನ್ನು ಹಿಂತೆಗೆದುಕೊಳ್ಳಲು ನವೆಂಬರ್ 14 (ಗುರುವಾರ) ಕೊನೆಯ ದಿನವಾಗಿರುತ್ತದೆ.
ಮತದಾನ ಅವಶ್ಯವಿದ್ದರೆ ನವೆಂಬರ್ 23 ರಂದು (ಶನಿವಾರ) (ಬೆಳಿಗ್ಗೆ 7 ಗಂಟೆಯಿಂದ ಸಂಜೆ 5 ಗಂಟೆಯವರಿಗೆ) ಮತದಾನ ನಡೆಯಲಿದ್ದು. ಮರು ಮತದಾನ ಅವಶ್ಯವಿದ್ದರೆ ನವೆಂಬರ್ 25 ರಂದು (ಸೋಮವಾರ) (ಬೆಳಿಗ್ಗೆ 7 ಗಂಟೆಯಿಂದ ಸಂಜೆ 5 ಗಂಟೆಯವರಿಗೆ) ಮತದಾನ ನಡೆಸಬಹುದು. ನವೆಂಬರ್ 26 ರಂದು (ಮಂಗಳವಾರ) ಬೆಳಗ್ಗೆ 8 ಗಂಟೆಯಿಂದ ತಾಲ್ಲೂಕು ಕೇಂದ್ರಗಳಲ್ಲಿ ಮತಗಳ ಎಣಿಕೆ ನಡೆಯಲಿದೆ ಎಂದಿದ್ದಾರೆ.
JOB ALERT: ‘ಮಿಷನ್ ಶಕ್ತಿ ಯೋಜನೆ’ಯಡಿ ವಿವಿಧ ಹುದ್ದೆಗಳ ನೇಮಕಾತಿಗೆ ಅರ್ಜಿ ಆಹ್ವಾನ
