ಭಾರತ ಸರ್ಕಾರವು ಸಾಮಾನ್ಯ ಜನರಿಗಾಗಿ ಜಾರಿಗೆ ತಂದಿರುವ ‘ಪ್ರಧಾನ ಮಂತ್ರಿ ಜನ್ ಧನ್ ಯೋಜನೆ’ (PMJDY) ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಕ್ರಾಂತಿಕಾರಕ ಬದಲಾವಣೆಗಳನ್ನು ತಂದಿದೆ. ಇದು ಕೇವಲ ಬ್ಯಾಂಕ್ ಖಾತೆಯಷ್ಟೇ ಅಲ್ಲದೆ, ಜನಸಾಮಾನ್ಯರಿಗೆ ಆರ್ಥಿಕ ಭದ್ರತೆ ನೀಡುವ ಹಲವು ವಿಶೇಷ ಸೌಲಭ್ಯಗಳನ್ನು ಹೊಂದಿದೆ. ಈ ಯೋಜನೆಯ ಪ್ರಮುಖ ಲಾಭಗಳು ಇಲ್ಲಿವೆ.
₹10,000 ಓವರ್ಡ್ರಾಫ್ಟ್ ಸೌಲಭ್ಯ
ಜನ್ ಧನ್ ಖಾತೆಯ ಅತ್ಯಂತ ಆಕರ್ಷಕ ಫೀಚರ್ ಎಂದರೆ ಅದು ಓವರ್ಡ್ರಾಫ್ಟ್ (Overdraft). ನಿಮ್ಮ ಖಾತೆಯಲ್ಲಿ ಹಣವೇ ಇಲ್ಲದಿದ್ದರೂ (ಜೀರೋ ಬ್ಯಾಲೆನ್ಸ್), ತುರ್ತು ಸಂದರ್ಭದಲ್ಲಿ ನೀವು ಬ್ಯಾಂಕ್ನಿಂದ ₹10,000 ವರೆಗೆ ಹಣವನ್ನು ಪಡೆಯಬಹುದು.
ಆರಂಭದಲ್ಲಿ ಯಾವುದೇ ಷರತ್ತುಗಳಿಲ್ಲದೆ ₹2,000 ವರೆಗೆ ಓವರ್ಡ್ರಾಫ್ ಸೌಲಭ್ಯ ಸಿಗುತ್ತದೆ.
ಖಾತೆಯನ್ನು ಕನಿಷ್ಠ 6 ತಿಂಗಳುಗಳ ಕಾಲ ಸರಿಯಾಗಿ ನಿರ್ವಹಿಸಿದವರಿಗೆ ಈ ಮೊತ್ತವನ್ನು ₹10,000 ವರೆಗೆ ಏರಿಸಲಾಗುತ್ತದೆ.
ಉಚಿತ ವಿಮಾ ಸೌಲಭ್ಯ
ಈ ಖಾತೆದಾರರಿಗೆ ಸರ್ಕಾರವು ಉಚಿತವಾಗಿ ವಿಮಾ ರಕ್ಷಣೆಯನ್ನು ಒದಗಿಸುತ್ತದೆ:
ಅಪಘಾತ ವಿಮೆ: ಈ ಖಾತೆಯೊಂದಿಗೆ ನೀಡಲಾಗುವ ರುಪೇ (RuPay) ಡೆಬಿಟ್ ಕಾರ್ಡ್ ಮೇಲೆ ₹2 ಲಕ್ಷದವರೆಗೆ ಉಚಿತ ಅಪಘಾತ ವಿಮೆ ದೊರೆಯುತ್ತದೆ.
ಜೀವ ವಿಮೆ: ಅರ್ಹ ಖಾತೆದಾರರಿಗೆ ₹30,000 ವರೆಗೆ ಜೀವ ವಿಮಾ ಕವರೇಜ್ ಕೂಡ ಲಭ್ಯವಿರುತ್ತದೆ.
ಜೀರೋ ಬ್ಯಾಲೆನ್ಸ್ ಖಾತೆ
ಸಾಮಾನ್ಯ ಉಳಿತಾಯ ಖಾತೆಗಳಲ್ಲಿ ಕನಿಷ್ಠ ಮೊತ್ತ (Minimum Balance) ಇಲ್ಲದಿದ್ದರೆ ಬ್ಯಾಂಕ್ಗಳು ದಂಡ ವಿಧಿಸುತ್ತವೆ. ಆದರೆ, ಜನ್ ಧನ್ ಖಾತೆಯಲ್ಲಿ ಬ್ಯಾಲೆನ್ಸ್ ಇಲ್ಲದಿದ್ದರೂ ಯಾವುದೇ ದಂಡ ವಿಧಿಸಲಾಗುವುದಿಲ್ಲ.
ನೇರ ನಗದು ವರ್ಗಾವಣೆ (DBT)
ಸರ್ಕಾರದ ವಿವಿಧ ಯೋಜನೆಗಳ ಹಣ (ಗ್ಯಾಸ್ ಸಬ್ಸಿಡಿ, ಕಿಸಾನ್ ಸಮ್ಮಾನ್ ನಿಧಿ, ಪೆನ್ಷನ್ ಇತ್ಯಾದಿ) ನೇರವಾಗಿ ಈ ಖಾತೆಗಳಿಗೆ ಜಮೆಯಾಗುತ್ತದೆ. ಇದರಿಂದ ಮಧ್ಯವರ್ತಿಗಳ ಕಾಟವಿಲ್ಲದೆ ಹಣ ನೇರವಾಗಿ ಜನರಿಗೆ ತಲುಪುತ್ತದೆ.
ಇತರೆ ಸೌಲಭ್ಯಗಳು
ದೇಶದಾದ್ಯಂತ ಎಲ್ಲಿಗಾದರೂ ಸುಲಭವಾಗಿ ಹಣ ವರ್ಗಾವಣೆ ಮಾಡಬಹುದು.
ಉಚಿತ ಮೊಬೈಲ್ ಬ್ಯಾಂಕಿಂಗ್ ಮತ್ತು ರುಪೇ ಕಾರ್ಡ್ ಸೌಲಭ್ಯ.
ಈ ಖಾತೆಯ ಮೂಲಕ ಸುಲಭವಾಗಿ ಪಿಂಚಣಿ ಮತ್ತು ಇತರೆ ವಿಮಾ ಯೋಜನೆಗಳಿಗೆ ನೋಂದಾಯಿಸಿಕೊಳ್ಳಬಹುದು.
ಖಾತೆ ತೆರೆಯಲು ಅರ್ಹತೆಗಳು:
ಭಾರತದ ಪ್ರಜೆಯಾಗಿರಬೇಕು.
10 ವರ್ಷ ಮೇಲ್ಪಟ್ಟ ಯಾರು ಬೇಕಾದರೂ ಈ ಖಾತೆ ಆರಂಭಿಸಬಹುದು.
ಆಧಾರ್ ಕಾರ್ಡ್ ಮತ್ತು ಭಾವಚಿತ್ರವಿದ್ದರೆ ಸಾಕು. ಆಧಾರ್ ಇಲ್ಲದಿದ್ದಲ್ಲಿ ಸರ್ಕಾರ ಗುರುತಿಸಿದ ಇತರೆ ದಾಖಲೆಗಳನ್ನು ನೀಡಿ ಖಾತೆ ತೆರೆಯಬಹುದು.
