ಉದ್ಯೋಗದಾತ ಸಂಸ್ಥೆಯು ಹೊಸದಾಗಿ ಜಾರಿಗೆ ತಂದಿರುವ ‘ವರ್ಕ್ ಫ್ರಮ್ ಹೋಮ್’ (WFH) ನೀತಿಯ ವಿವರಗಳನ್ನು ಉದ್ಯೋಗಿಯೊಬ್ಬರು ಆನ್ಲೈನ್ನಲ್ಲಿ ಹಂಚಿಕೊಂಡ ನಂತರ ಅದು ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಈ ಹೊಸ ನೀತಿಯು ಸಿಬ್ಬಂದಿಗಳು ತಮ್ಮ ಸ್ವಂತ ಊರುಗಳಿಂದ ಕೆಲಸ ಮಾಡುವುದನ್ನು ನಿರ್ಬಂಧಿಸುತ್ತದೆ ಮತ್ತು ಉದ್ಯೋಗಿಗಳ ಲೊಕೇಶನ್ ಅನ್ನು ಮೇಲ್ವಿಚಾರಣೆ ಮಾಡಲು ಜಿಪಿಎಸ್ (GPS) ಆಧಾರಿತ ಅಟೆಂಡೆನ್ಸ್ ಟ್ರ್ಯಾಕಿಂಗ್ ವ್ಯವಸ್ಥೆಯನ್ನು ಬಳಸುತ್ತದೆ.
ಉದ್ಯೋಗಿಯ ಪ್ರಕಾರ, ಕಂಪನಿಯು ಇತ್ತೀಚೆಗೆ ದೊಡ್ಡ ಮಟ್ಟದಲ್ಲಿ ಉದ್ಯೋಗಿಗಳ ವಜಾ ಪ್ರಕ್ರಿಯೆಯನ್ನು (layoffs) ನಡೆಸಿದ್ದು, ತನ್ನ ಸಿಬ್ಬಂದಿ ಬಲವನ್ನು 40 ರಿಂದ ಕೇವಲ 15 ಕ್ಕೆ ಇಳಿಸಿದೆ. ಈ ಲೇಆಫ್ ಬೆನ್ನಲ್ಲೇ, ಕಂಪನಿಯು ಆರನೇ ಮಹಡಿಯಲ್ಲಿದ್ದ ತನ್ನ ಲೀಸ್ ಕಚೇರಿ ಜಾಗವನ್ನು ಬಿಟ್ಟುಕೊಟ್ಟು, ಅದರ ಕೆಳಗಿನ ಮಹಡಿಯಲ್ಲಿರುವ ಅತ್ಯಂತ ಚಿಕ್ಕದಾದ ಕಚೇರಿಗೆ ಸ್ಥಳಾಂತರಗೊಂಡಿದೆ.
ಚಿಕ್ಕ ಕಚೇರಿಯಿಂದಾಗಿ ರಿಮೋಟ್ ವರ್ಕಿಂಗ್ ವ್ಯವಸ್ಥೆ
ಈ ಬದಲಾವಣೆಯನ್ನು ವಿವರಿಸಿರುವ ಉದ್ಯೋಗಿ, ಹೊಸ ಕಚೇರಿಯಲ್ಲಿ ಇಡೀ ತಂಡಕ್ಕೆ ಏಕಕಾಲದಲ್ಲಿ ಕುಳಿತುಕೊಳ್ಳಲು ಸಾಕಷ್ಟು ಜಾಗವಿಲ್ಲದ ಕಾರಣ, ಮ್ಯಾನೇಜ್ಮೆಂಟ್ ರೊಟೇಷನಲ್ (ಸರದಿ ಸಾಲಿನ) ಡಬ್ಲ್ಯುಎಫ್ಹೆಚ್ (WFH) ವ್ಯವಸ್ಥೆಯನ್ನು ಜಾರಿಗೆ ತಂದಿದೆ ಎಂದು ಹೇಳಿದ್ದಾರೆ.
”ಐದನೇ ಮಹಡಿಯಲ್ಲಿ ನಮ್ಮೆಲ್ಲರಿಗೂ ಸಾಕಾಗುವಷ್ಟು ಜಾಗವಿಲ್ಲದ ಕಾರಣ, ಕಂಪನಿಯು ವರ್ಕ್ ಫ್ರಮ್ ಹೋಮ್ ಪರಿಚಯಿಸಲು ನಿರ್ಧರಿಸಿದೆ. ನಮಗೆ ಐದನೇ ಮಹಡಿಯಲ್ಲಿ ಕೇವಲ 4 ಸೀಟುಗಳನ್ನು ಮಾತ್ರ ನಿಗದಿಪಡಿಸಲಾಗಿದೆ, ಆದ್ದರಿಂದ ಉಳಿದ ತಂಡದವರು ಸರದಿಯ ಆಧಾರದ ಮೇಲೆ ಮನೆಯಿಂದ ಕೆಲಸ ಮಾಡಲಿದ್ದಾರೆ” ಎಂದು ರೆಡ್ಡಿಟ್ ಬಳಕೆದಾರರೊಬ್ಬರು ಬರೆದಿದ್ದಾರೆ.
”ಕೆಲವು ವಾರಗಳ ನಂತರ, ಪ್ರಸ್ತುತ ಮನೆಯಿಂದ ಕೆಲಸ ಮಾಡುತ್ತಿರುವ ಉದ್ಯೋಗಿಗಳು ಕಚೇರಿಗೆ ಬರುತ್ತಾರೆ ಮತ್ತು ಕಚೇರಿಯಲ್ಲಿದ್ದವರು ರಿಮೋಟ್ ವರ್ಕ್ (ಮನೆಯಿಂದ ಕೆಲಸ) ವ್ಯವಸ್ಥೆಗೆ ಬದಲಾಗುತ್ತಾರೆ.”
ಜಿಪಿಎಸ್ ಅಟೆಂಡೆನ್ಸ್ ಮೂಲಕ ದೆಹಲಿ-ಎನ್ಸಿಆರ್ಗಷ್ಟೇ WFH ಸೀಮಿತ
ಈ ನಿರ್ಧಾರದಿಂದ ತಮಗೆ ಕೊನೆಗೂ ಸ್ವಂತ ಊರಿನಿಂದ ಕೆಲಸ ಮಾಡಲು ಅವಕಾಶ ಸಿಗಬಹುದು ಎಂದು ಉದ್ಯೋಗಿ ಆರಂಭದಲ್ಲಿ ಸಂತಸ ಪಟ್ಟಿದ್ದರಾದರೂ, ರಿಮೋಟ್ ವರ್ಕ್ ಮಾಡಲು ಕೇವಲ ದೆಹಲಿ-ಎನ್ಸಿಆರ್ (Delhi-NCR) ಪ್ರದೇಶದೊಳಗೆ ಮಾತ್ರ ಅನುಮತಿ ನೀಡಲಾಗುವುದು ಎಂಬ ವಿಷಯ ಅವರಿಗೆ ನಂತರ ತಿಳಿದುಬಂದಿದೆ.
”ನಾನು ಅಂತಿಮವಾಗಿ ನನ್ನ ಸ್ವಂತ ಊರಿನಿಂದ ಕೆಲಸ ಮಾಡಬಹುದು ಎಂದು ಭಾವಿಸಿ ಆರಂಭದಲ್ಲಿ ಸಂತೋಷಪಟ್ಟಿದ್ದೆ. ಆದರೆ, ನಾವು ದೆಹಲಿ-ಎನ್ಸಿಆರ್ ಒಳಗಿನಿಂದ ಮಾತ್ರ ಕೆಲಸ ಮಾಡಬಹುದು ಎಂದು ನನ್ನ ಬಾಸ್ ಸ್ಪಷ್ಟಪಡಿಸಿದರು. ಇದನ್ನು ಖಚಿತಪಡಿಸಿಕೊಳ್ಳಲು ಜಿಪಿಎಸ್ ಮೂಲಕ ಹಾಜರಾತಿಯನ್ನು ಗುರುತಿಸಲಾಗುತ್ತದೆ. ಉದ್ಯೋಗಿಯು ದೆಹಲಿ ಎನ್ಸಿಆರ್ ವ್ಯಾಪ್ತಿಯಲ್ಲಿದ್ದರೆ ಮಾತ್ರ ಸಿಸ್ಟಮ್ ಆತನನ್ನು ಪ್ರೆಸೆಂಟ್ (ಹಾಜರು) ಎಂದು ದಾಖಲಿಸುತ್ತದೆ” ಎಂದು ಉದ್ಯೋಗಿ ತಿಳಿಸಿದ್ದಾರೆ.
ಈ ನಿರ್ಬಂಧಕ್ಕೆ ಮ್ಯಾನೇಜ್ಮೆಂಟ್ ಯಾವುದೇ ಅಧಿಕೃತ ಕಾರಣವನ್ನು ನೀಡಿಲ್ಲ ಎಂದು ಉದ್ಯೋಗಿ ಹೆಚ್ವುವರಿಯಾಗಿ ಹೇಳಿದ್ದಾರೆ.
”ಬಾಸ್ ಇದಕ್ಕೆ ಯಾವುದೇ ಕಾರಣ ನೀಡಲಿಲ್ಲ, ಆದರೆ ಉದ್ಯೋಗಿಯ ಅಗತ್ಯ ಕಚೇರಿಯಲ್ಲಿ ತುರ್ತಾಗಿ ಬಿದ್ದರೆ, ಅವರು ತಕ್ಷಣವೇ ಕಚೇರಿಯನ್ನು ತಲುಪಲು ಸಾಧ್ಯವಾಗಲಿ ಎಂಬ ಉದ್ದೇಶ ಇದರದ್ದಾಗಿರಬಹುದು ಎಂದು ನಾನು ಭಾವಿಸುತ್ತೇನೆ. ಇದನ್ನು ಕೇಳಿ ನನಗೆ ತುಂಬಾ ನಿರಾಶೆಯಾಯಿತು. ವರ್ಕ್ ಫ್ರಮ್ ಹೋಮ್ ಎಂದರೆ ನಿಜಕ್ಕೂ ಇದೇನಾ?” ಎಂದು ಉದ್ಯೋಗಿ ಪ್ರಶ್ನಿಸಿದ್ದಾರೆ.
