ತಮಿಳುನಾಡು : ತಮಿಳುನಾಡು ನೂತನ ಸಿಎಂ ವಿಜಯ್ ಕಪ್ಪು ಬಣ್ಣದ ಕೋರ್ಟ್ ಧರಿಸಿ ಪ್ರಮಾಣ ವಚನ ಸ್ವೀಕಾರ ಮಾಡಿದ್ದು, ಚರ್ಚೆಗೆ ಕಾರಣವಾಗಿದೆ. ಬಹುತೇಕ ಜನರು ಕಪ್ಪು ಬಟ್ಟೆ ಅಶುಭದ ಸಂಕೇತ ಅಂತ ಹೇಳ್ತಾರೆ. ಆದರೂ ವಿಜಯ್ ಕಪ್ಪು ಕಲರ್ ಬಟ್ಟೆ ಧರಿಸಿದ್ದರು. ಇದಕ್ಕೆ ಕಾರಣವೂ ಇದೆ. ಆ ಕಾರಣ ಏನು ಅನ್ನೋದನ್ನ ಇದೀಗ ತಿಳಿದುಕೊಳ್ಳೋಣ ಬನ್ನಿ.
ಸಾಮಾನ್ಯವಾಗಿ ಭಾರತೀಯ ಸಂಸ್ಕೃತಿಯಲ್ಲಿ ಕಪ್ಪು ಬಣ್ಣವನ್ನು ಅಶುಭ ಅಥವಾ ಶೋಕದ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಯಾವುದೇ ಶುಭ ಕಾರ್ಯಗಳಿಗೆ ಬಿಳಿ ಅಥವಾ ಬಣ್ಣಬಣ್ಣದ ಉಡುಪುಗಳನ್ನು ಧರಿಸುವುದು ರೂಢಿ. ಆದರೆ ತಮಿಳುನಾಡಿನ ರಾಜಕೀಯ ಇತಿಹಾಸ ಮತ್ತು ದ್ರಾವಿಡ ಚಳುವಳಿಯ ಹಿನ್ನೆಲೆಯಲ್ಲಿ ನೋಡಿದಾಗ, ಈ ಕಪ್ಪು ಬಣ್ಣ ಕೇವಲ ಒಂದು ಬಣ್ಣವಲ್ಲ; ಅದೊಂದು ಪ್ರತಿರೋಧದ ಸಂಕೇತ. ವಿಜಯ್ ಅವರ ಈ ನಡೆ ಕೇವಲ ಫ್ಯಾಷನ್ ಆಗಿರದೆ, ಅವರ ರಾಜಕೀಯ ಸಿದ್ಧಾಂತದ ಪ್ರಬಲ ಸಂದೇಶವಾಗಿದೆ.
ಕಪ್ಪು ಬಣ್ಣಕ್ಕೂ ತಮಿಳುನಾಡು ರಾಜಕೀಯಕ್ಕೂ ಅವಿನಾಭಾವ ಸಂಬಂಧವಿದೆ. ದ್ರಾವಿಡ ಚಳವಳಿಯ ಪಿತಾಮಹ, ಸಾಮಾಜಿಕ ಹೋರಾಟಗಾರ ಇ.ವಿ. ರಾಮಸ್ವಾಮಿ (ಪೆರಿಯಾರ್) ಅವರು ಈ ಸಂಪ್ರದಾಯಕ್ಕೆ ನಾಂದಿ ಹಾಡಿದ್ದರು. ಸಮಾಜದಲ್ಲಿ ಹಾಸುಹೊಕ್ಕಿದ್ದ ಜಾತಿ ತಾರತಮ್ಯ, ಮೇಲು-ಕೀಳು ಎಂಬ ಭಾವನೆ ಮತ್ತು ಮೌಢ್ಯಗಳ ವಿರುದ್ಧ ಪ್ರತಿಭಟಿಸಲು ಪೆರಿಯಾರ್ ಅವರು ಕಪ್ಪು ಬಟ್ಟೆಯನ್ನು ಅಸ್ತ್ರವಾಗಿ ಬಳಸಿದ್ದರು. ಶೋಷಿತ ವರ್ಗದ ನೋವು ಮತ್ತು ಸಾಮಾಜಿಕ ಅಸಮಾನತೆಯ ವಿರುದ್ಧದ ಪ್ರತಿಭಟನೆಯಾಗಿ ಅವರು ತಮ್ಮ ಅನುಯಾಯಿಗಳಿಗೆ ಕಪ್ಪು ಉಡುಪು ಧರಿಸಲು ಕರೆ ನೀಡಿದ್ದರು.
ವಿಜಯ್ ಅವರು ಮೊದಲಿನಿಂದಲೂ ತಾವು ಪೆರಿಯಾರ್ ಅವರ ಆದರ್ಶಗಳಿಂದ ಪ್ರೇರಿತರಾಗಿದ್ದೇವೆ ಎಂದು ಹೇಳುತ್ತಾ ಬಂದಿದ್ದಾರೆ. ಅವರ ‘ತಮಿಳಗ ವೆಟ್ರಿ ಕಳಗಂ’ ಪಕ್ಷದ ಸಿದ್ಧಾಂತವೂ ಸಾಮಾಜಿಕ ನ್ಯಾಯ ಮತ್ತು ಸಮಾನತೆಯ ಮೇಲೆ ನಿಂತಿದೆ. ಹೀಗಾಗಿ, ಅತ್ಯುನ್ನತ ಪದವಿಯ ಪ್ರಮಾಣ ವಚನ ಸ್ವೀಕರಿಸುವ ಸಂದರ್ಭದಲ್ಲಿ ಕಪ್ಪು ಕೋಟು ಧರಿಸುವ ಮೂಲಕ, ತಾವು ಇಂದಿಗೂ ದ್ರಾವಿಡ ಸಿದ್ಧಾಂತಕ್ಕೆ ಬದ್ಧರಾಗಿದ್ದೇವೆ ಮತ್ತು ಪೆರಿಯಾರ್ ಅವರ ಹಾದಿಯಲ್ಲಿ ಸಾಗುತ್ತೇವೆ ಎಂಬ ಸ್ಪಷ್ಟ ಸಂದೇಶವನ್ನು ತಮ್ಮ ಬೆಂಬಲಿಗರಿಗೆ ಹಾಗೂ ವಿರೋಧಿಗಳಿಗೆ ರವಾನಿಸಿದ್ದಾರೆ.
ಒಟ್ಟಾರೆಯಾಗಿ, ವಿಜಯ್ ಅವರ ಈ ಉಡುಪು ತಮಿಳುನಾಡಿನ ಮಣ್ಣಿನ ಗುಣ ಮತ್ತು ದ್ರಾವಿಡ ರಾಜಕಾರಣದ ಬೇರುಗಳನ್ನು ನೆನಪಿಸಿದೆ. ಮೂಢನಂಬಿಕೆಗಳನ್ನು ಬದಿಗೊತ್ತಿ, ಸಮಾಜದ ಕಟ್ಟಕಡೆಯ ವ್ಯಕ್ತಿಯ ಧ್ವನಿಯಾಗುವ ಸಂಕೇತವಾಗಿ ಕಪ್ಪು ಬಣ್ಣವನ್ನು ಅವರು ಆರಿಸಿಕೊಂಡಿದ್ದಾರೆ. ಈ ಮೂಲಕ ತಮಿಳುನಾಡಿನ ನೂತನ ಸಿಎಂ ವಿಜಯ್, ಕೇವಲ ಆಡಳಿತವನ್ನಷ್ಟೇ ಅಲ್ಲ, ದಶಕಗಳ ಕಾಲದ ಸಿದ್ಧಾಂತವನ್ನೂ ಮುಂದುವರಿಸುವ ಸೂಚನೆ ನೀಡಿದ್ದಾರೆ.
