ಬೆಳಿಗ್ಗೆ ನಿದ್ದೆಯಿಂದ ಎದ್ದ ತಕ್ಷಣ ಮೊದಲು ಮೊಬೈಲ್ ಫೋನ್ ಚೆಕ್ ಮಾಡುವ ಹವ್ಯಾಸ ನಿಮಗಿದೆಯೇ? ಹಾಗಿದ್ದರೆ ಜಾಗ್ರತೆ! ಈ ಪುಟ್ಟ ಹವ್ಯಾಸವು ನಿಮ್ಮ ಮಾನಸಿಕ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಲಿದ್ದು, ನಿಮ್ಮ ಇಡೀ ದಿನದ ಉತ್ಸಾಹ ಮತ್ತು ನೆಮ್ಮದಿಯನ್ನು ಕಿತ್ತುಕೊಳ್ಳಬಹುದು ಎಂದು ಇತ್ತೀಚಿನ ಸಂಶೋಧನೆಗಳು ಎಚ್ಚರಿಸಿವೆ.
ನಾವು ನಿದ್ದೆಯಿಂದ ಎದ್ದಾಗ ನಮ್ಮ ಮೆದುಳು ‘ಡೆಲ್ಟಾ’ ಹಂತದಿಂದ ‘ಥೀಟಾ’ ಹಂತಕ್ಕೆ ಸಂವಹನ ನಡೆಸುತ್ತಿರುತ್ತದೆ. ಈ ಸಮಯದಲ್ಲಿ ಹಠಾತ್ತನೆ ಫೋನ್ ನೋಡುವುದರಿಂದ ಮೆದುಳು ನೇರವಾಗಿ ‘ಬೀಟಾ’ (ಹೆಚ್ಚಿನ ಒತ್ತಡದ ಹಂತ) ಹಂತಕ್ಕೆ ತಲುಪುತ್ತದೆ. ಇದು ದಿನವಿಡೀ ನಿಮ್ಮನ್ನು ಉದ್ವಿಗ್ನರನ್ನಾಗಿ ಮಾಡುತ್ತದೆ.
ಬೆಳಿಗ್ಗೆಯೇ ಇಮೇಲ್ಗಳು, ಸಾಮಾಜಿಕ ಜಾಲತಾಣದ ನೋಟಿಫಿಕೇಶನ್ಗಳು ಅಥವಾ ಸುದ್ದಿಗಳು ನಿಮ್ಮ ಮೆದುಳನ್ನು ಪ್ರವೇಶಿಸಿದಾಗ, ಅವು ನಿಮ್ಮಲ್ಲಿ ‘ರಿಯಾಕ್ಟಿವ್ ಮೋಡ್’ (ತಕ್ಷಣ ಪ್ರತಿಕ್ರಿಯಿಸುವ ಒತ್ತಡ) ಸೃಷ್ಟಿಸುತ್ತವೆ. ಇದರಿಂದ ದಿನದ ಆರಂಭವೇ ಆತಂಕದಿಂದ ಕೂಡಿರುತ್ತದೆ.
ಬೆಳಿಗ್ಗೆ ಎದ್ದ ಮೊದಲ 30 ನಿಮಿಷಗಳು ನಿಮ್ಮ ಸೃಜನಶೀಲತೆಗೆ ಅತ್ಯಂತ ನಿರ್ಣಾಯಕ. ಫೋನ್ ನೋಡುವುದರಿಂದ ನಿಮ್ಮ ಸ್ವಂತ ಆಲೋಚನೆಗಳ ಬದಲು ಇತರರ ವಿಚಾರಗಳು ನಿಮ್ಮ ಮೇಲೆ ಸವಾರಿ ಮಾಡುತ್ತವೆ, ಇದು ನಿಮ್ಮ ಏಕಾಗ್ರತೆಯನ್ನು ಕಡಿಮೆ ಮಾಡುತ್ತದೆ.
ಬೆಳಿಗ್ಗೆ ಫೋನ್ನಲ್ಲಿ ಸಿಗುವ ‘ಲೈಕ್ಸ್’ ಮತ್ತು ಮೆಸೇಜ್ಗಳು ಕ್ಷಣಿಕ ಸಂತೋಷ (ಡೋಪಮೈನ್) ನೀಡಿದರೂ, ನಂತರದ ಗಂಟೆಗಳಲ್ಲಿ ಇದು ನಿಮ್ಮಲ್ಲಿ ಆಲಸ್ಯ ಮತ್ತು ಅತೃಪ್ತಿ ಮೂಡಿಸುತ್ತದೆ.
ತಜ್ಞರು ನೀಡುವ ಸಲಹೆಗಳೇನು?
ಬೆಳಿಗ್ಗೆ ಎದ್ದ ನಂತರ ಕನಿಷ್ಠ 30 ರಿಂದ 60 ನಿಮಿಷಗಳ ಕಾಲ ಫೋನ್ನಿಂದ ದೂರವಿರಿ.
ಮೊಬೈಲ್ ಅಲಾರಾಂ ಬಳಸುವ ಬದಲು ಹಳೆಯ ಮಾದರಿಯ ಕ್ಲಾಕ್ ಬಳಸಿ. ಇದರಿಂದ ಪದೇ ಪದೇ ಫೋನ್ ಕೈಗೆತ್ತಿಕೊಳ್ಳುವುದು ತಪ್ಪುತ್ತದೆ.
ದಿನದ ಆರಂಭವನ್ನು ಧ್ಯಾನ, ನಡಿಗೆ ಅಥವಾ ನಿಮ್ಮ ಇಷ್ಟದ ಪುಸ್ತಕ ಓದುವ ಮೂಲಕ ಆರಂಭಿಸಿ.
