ಸೆಕೆಂಡ್ ಹ್ಯಾಂಡ್ ಕಾರುಗಳ ಸರ್ವಿಸಿಂಗ್ ಯಾವಾಗ ಮಾಡಬೇಕು? ದೀರ್ಘಕಾಲ ಪಾರ್ಕ್ ಮಾಡಿದರೆ ಈ ಭಾಗಗಳು ಹಾಳಾಗಬಹುದು ಎಚ್ಚರ!

ಹೊಸ ಕಾರು ಖರೀದಿಸುವ ಅನೇಕರಿಗೆ ಅದರ ಕಾರ್ಯಕ್ಷಮತೆ ಮತ್ತು ಫೀಚರ್ಗಳ ಬಗ್ಗೆ ಸಂಪೂರ್ಣ ಮಾಹಿತಿ ಇರುವುದಿಲ್ಲ. ಈ ಕಾರಣದಿಂದಾಗಿ, ಕಾರನ್ನು ಯಾವಾಗ ಸರ್ವಿಸಿಂಗ್ಗೆ ನೀಡಬೇಕು ಎಂಬ ಗೊಂದಲ ತಲೆದೂರುತ್ತದೆ. ಕಾರನ್ನು ಹೆಚ್ಚಾಗಿ ಬಳಸದಿದ್ದರೆ ಅದಕ್ಕೆ ಸರ್ವಿಸಿಂಗ್ ಅಗತ್ಯವಿಲ್ಲ ಎಂದು ಹಲವರು ಭಾವಿಸುತ್ತಾರೆ. ಆದರೆ, ಕಾರಿನ ಸರ್ವಿಸಿಂಗ್ ಎಂಬುದು ಕೇವಲ ಅದು ಕ್ರಮಿಸಿದ ಕಿಲೋಮೀಟರ್ಗಳ ಮೇಲೆ ಮಾತ್ರವಲ್ಲ, ಸಮಯದ ಮೇಲೂ ಆಧಾರಪಟ್ಟಿರುತ್ತದೆ. ಹಾಗಾದರೆ ಕಡಿಮೆ ಬಳಸಿದ ಕಾರಿಗೆ ಎಷ್ಟು ದಿನಗಳಿಗೊಮ್ಮೆ ಸರ್ವಿಸಿಂಗ್ ಅಗತ್ಯ ಎಂಬುದನ್ನು ಇಲ್ಲಿ ತಿಳಿಯೋಣ.

ಸರ್ವಿಸಿಂಗ್ ನಿಯಮವೇನು?

ವಾಹನವನ್ನು ಹೆಚ್ಚಾಗಿ ಚಲಾಯಿಸಲಿ ಅಥವಾ ಇಲ್ಲದಿರಲಿ, ಹೆಚ್ಚಿನ ಕಾರು ತಯಾರಿಕಾ ಸಂಸ್ಥೆಗಳು ಪ್ರತಿ 10,000 ಕಿಲೋಮೀಟರ್ಗಳಿಗೆ ಅಥವಾ ಒಂದು ವರ್ಷಕ್ಕೆ (ಯಾವುದು ಮೊದಲೋ ಅದು) ಒಮ್ಮೆ ಸರ್ವಿಸಿಂಗ್ ಮಾಡಿಸಲು ಶಿಫಾರಸು ಮಾಡುತ್ತವೆ ಎಂದು ಆಟೋ ತಜ್ಞರು ಸಲಹೆ ನೀಡುತ್ತಾರೆ.

ಕಾರನ್ನು ಪಾರ್ಕ್ ಮಾಡಿಟ್ಟರೂ ಹಾಳಾಗುವ ಭಾಗಗಳು:

ಕಾರನ್ನು ಬಳಸದೆ ಸುಮ್ಮನೆ ಪಾರ್ಕ್ ಮಾಡಿಟ್ಟರೂ ಸಹ ಸಮಯ ಕಳೆದಂತೆ ಈ ಕೆಳಗಿನ ಸಮಸ್ಯೆಗಳು ಎದುರಾಗುತ್ತವೆ:

ಇಂಜಿನ್ ಆಯಿಲ್: ಇದರ ಗುಣಮಟ್ಟ ಮತ್ತು ದಕ್ಷತೆ ಕಡಿಮೆಯಾಗುತ್ತದೆ.

ಏರ್ ಫಿಲ್ಟರ್: ಧೂಳು ಮತ್ತು ಕಸ ತುಂಬಿಕೊಳ್ಳಬಹುದು.

ಬ್ಯಾಟರಿ: ದೀರ್ಘಕಾಲ ಬಳಸದಿದ್ದರೆ ಬ್ಯಾಟರಿ ಸಾಮರ್ಥ್ಯ ಕುಸಿಯುತ್ತದೆ.

ಬ್ರೇಕ್ ಆಯಿಲ್ ಮತ್ತು ಕೂಲಂಟ್: ಇವುಗಳ ಪ್ರಭಾವ ಮತ್ತು ಶಕ್ತಿ ಕಡಿಮೆಯಾಗುತ್ತದೆ.

ಆದ್ದರಿಂದ, ಅಪರೂಪಕ್ಕೆ ಬಳಸುವ ಕಾರುಗಳಿಗೂ ನಿಯಮಿತ ಸರ್ವಿಸಿಂಗ್ ಅತ್ಯಗತ್ಯ. ಸಾಮಾನ್ಯವಾಗಿ ಹೊಸ ಕಾರುಗಳಿಗೆ ಮೊದಲ ಸರ್ವಿಸಿಂಗ್ ಅನ್ನು 1,000 ಕಿಮೀ, ಎರಡನೇ ಸರ್ವಿಸಿಂಗ್ ಅನ್ನು 5,000 ಕಿಮೀ ಅಥವಾ 6 ತಿಂಗಳಿಗೆ ಮತ್ತು ಮೂರನೇ ಸರ್ವಿಸಿಂಗ್ ಅನ್ನು 10,000 ಕಿಮೀ ಅಥವಾ 1 ವರ್ಷಕ್ಕೆ ನಿಗದಿಪಡಿಸಲಾಗುತ್ತದೆ. ಆದರೆ ಇದು ಕಂಪನಿಯಿಂದ ಕಂಪನಿಗೆ ಸ್ವಲ್ಪ ಬದಲಾಗುವುದರಿಂದ ಕಾರಿನ ಮ್ಯಾನುಯಲ್ ಪರಿಶೀಲಿಸುವುದು ಉತ್ತಮ.

ಹಳೆಯ ಕಾರುಗಳಿದ್ದರೆ ಜಾಗರೂಕರಾಗಿರಿ!

ನಿಮ್ಮ ಕಾರು 5 ವರ್ಷಕ್ಕಿಂತ ಹಳೆಯದಾಗಿದ್ದರೆ ಅಥವಾ 70,000 ಕಿಲೋಮೀಟರ್ಗಿಂತ ಹೆಚ್ಚು ಚಲಿಸಿದ್ದರೆ, ಅದರ ಭಾಗಗಳು ಬೇಗನೆ ಸವೆದುಹೋಗಲು ಪ್ರಾರಂಭಿಸುತ್ತವೆ. ಅಂತಹ ಸಂದರ್ಭಗಳಲ್ಲಿ, ಪ್ರತಿ 5,000 ಕಿಲೋಮೀಟರ್ಗಳಿಗೆ ಅಥವಾ ಪ್ರತಿ 3 ರಿಂದ 6 ತಿಂಗಳಿಗೊಮ್ಮೆ ಸರ್ವಿಸಿಂಗ್ ಮಾಡಿಸುವುದು ಉತ್ತಮ ಎಂದು ತಜ್ಞರು ಹೇಳುತ್ತಾರೆ.

ಸರ್ವಿಸಿಂಗ್ನಲ್ಲಿ ಏನೆಲ್ಲಾ ತಪಾಸಣೆ ಮಾಡಲಾಗುತ್ತದೆ?

ಸರ್ವಿಸಿಂಗ್ ಎಂದರೆ ಕೇವಲ ಇಂಜಿನ್ ಆಯಿಲ್ ಬದಲಾಯಿಸುವುದು ಮಾತ್ರವಲ್ಲ. ಅದರೊಂದಿಗೆ ಈ ಕೆಳಗಿನ ಭಾಗಗಳನ್ನೂ ತಪಾಸಣೆ ಮಾಡಲಾಗುತ್ತದೆ:

ಆಯಿಲ್ ಫಿಲ್ಟರ್ ಮತ್ತು ಏರ್ ಫಿಲ್ಟರ್

ಬ್ರೇಕ್ ಸಿಸ್ಟಮ್ ಮತ್ತು ಸಸ್ಪೆನ್ಷನ್

ಬ್ಯಾಟರಿ ಮತ್ತು ಟೈರ್ ಪ್ರೆಶರ್

ಕೂಲಂಟ್ ಮಟ್ಟ, ವೈಪರ್ಗಳು ಮತ್ತು ಲೈಟ್ಗಳು

ಎಲೆಕ್ಟ್ರಾನಿಕ್ ಸಿಸ್ಟಮ್ ಮತ್ತು ಇಂಜಿನ್ ಸೆನ್ಸಾರ್ಗಳ ಡಯಾಗ್ನಾಸ್ಟಿಕ್ ಸ್ಕ್ಯಾನಿಂಗ್

ಈ ಲಕ್ಷಣಗಳು ಕಂಡುಬಂದರೆ ತಕ್ಷಣ ಸರ್ವಿಸಿಂಗ್ ಮಾಡಿಸಿ:

ನಿಮ್ಮ ಕಾರಿನಲ್ಲಿ ಕೆಳಗಿನ ಯಾವುದೇ ಬದಲಾವಣೆಗಳು ಕಂಡುಬಂದಲ್ಲಿ, ನಿಗದಿಪಡಿಸಿದ ಸರ್ವಿಸಿಂಗ್ ದಿನಾಂಕದವರೆಗೆ ಕಾಯದೆ ತಕ್ಷಣವೇ ಮೆಕ್ಯಾನಿಕ್ ಬಳಿ ತೋರಿಸಿ:

ಕಾರಿನಿಂದ ವಿಚಿತ್ರವಾದ ಶಬ್ದಗಳು ಬರುವುದು.

ಮೈಲೇಜ್ ಹಠಾತ್ತಾಗಿ ಕಡಿಮೆಯಾಗುವುದು.

ಡ್ಯಾಶ್ಬೋರ್ಡ್ನಲ್ಲಿ ‘ಚೆಕ್ ಇಂಜಿನ್’ (Check Engine) ಲೈಟ್ ಆನ್ ಆಗುವುದು.

ಕಾರು ಸ್ಟಾರ್ಟ್ ಮಾಡಲು ತೊಂದರೆಯಾಗುವುದು.

ಬ್ರೇಕ್ ಹಾಕುವಾಗ ಸ್ಟೀರಿಂಗ್ ಅಥವಾ ಕಾರು ಕಂಪಿಸಿದಂತಾಗುವುದು (Vibration).

ನಿಮ್ಮ ವಾಹನದ ದೀರ್ಘಕಾಲದ ಬಾಳಿಕೆ ಮತ್ತು ನಿಮ್ಮ ಸುರಕ್ಷತೆಗಾಗಿ ಸಕಾಲದಲ್ಲಿ ಸರ್ವಿಸಿಂಗ್ ಮಾಡಿಸುವುದು ಅತ್ಯಗತ್ಯ.